Babɩlɔnə tʋrɩ yoo
13
1 Yɩɩ sʋgʋ tə nə zɩga Babɩlɔnə lʋʋ nii tə nə. Ʋ bɩrɩ kʋ Amɔsə bìú Ezayi nə, ʋ nɩʋn wa.2 Á zɩan kʋ̀ʋ̀ mɩmɩnʋ
á zɩgɩ paan yupara wa,
ka yuu nə yɩ fee.
Á zɩan á kori,
á cə̀rə́ á kə kwatara tə nə,
á gwɩɛn ba də jɩɩn,
sə ba zʋ ləzwənfaran mimiən wa!
3 À mʋ̀ pɩn nii à kwatara tə nə,
à nə kúrí à tún vàn nə,
à bon à kə à lɩŋa kwatara babɩran tə nə,
ba nə fwa pupwən à dun tə yɩrɩ.
4 Á cʋga zizigu nəfarʋ pɛɛn tə yun wa,
ndə lakapʋpʋ zizigu nə!
Á cʋga payun də lʋʋ dwíə́
tə nə kun duən nə zizigu!
Ba-Yígúrə́-Jə-Tiu, ʋ nə yɩ kwatara Yɩɩ
wulə ʋ kwatara tə ʋ tanɩ sə ba ta kʋ̀ʋ̀.
5 Ba naŋa lʋʋ nii kʋ nə ŋʋna ba bɩ̀àn,
ba naŋa lanworu tə nii yígúrə́ wa.
Ba-Yígúrə́-Jə-Tiu də ʋ lɩŋa kwatarɩ zɩla tə
wá cʋ̀gʋ̀ lʋʋ nii tə mama.
6 Á dɩa lúə́ pucʋnɩ gwaran:
Cɩ́gá, Ba-Yígúrə́-Jə-Tiu dɩɩn tə bwə́lə́,
kʋ bɩ̀àn ndə cʋcʋnyiən nə,
Yɩɩ tə nə wulə tə mɛ yuu wa nə tʋn.
7 Kʋ mʋ̀ nə pɩn jɩ̀àn tə mɛ ma gwàrɩ̀,
yá bɛɛ mama ga wʋdɩʋ nə.
8 Fən zʋa ba, ba ŋʋnan cə̀rə̀ tə yɩ̀ ba,
ba pipini ndə kan pùə́ nə yɩ̀ sə ʋ lɩra,
kʋ gwárɩ́ ba, ba viviri ba ywàŋá duən,
ba yɛɛ ga tùŋə̀ ndə mənvwə nə.
9 Á nəŋə, Ba-Yígúrə́-Jə-Tiu dɩɩn tə bɩ̀àn,
kʋ yɩ lagʋrɩ dɩɩn,
kʋ yɩ lɩŋa nəfarʋ tə nə fʋrɩ dɩɩn.
Tə wá cʋ̀gʋ̀ tɩa tə mɩ́ámɩ́án,
tə pa ka jì kasɔɔ lanworu,
tə ga cʋ̀gʋ̀ cʋna lɩ̀à tə nə wulə ka yuu wa.
10 Cɩ́gá, lanworu kacɩlacɛɛ tə,
də tə zara tə kʋ́ʋ̀ bá pa tə poni pɩ̀rɩ̀.
Yɩcaʋ tə wá jì yikunu, kʋ pɩ́ʋ́n máŋá wa,
yá cànà tə də kʋ́ʋ̀ ba pa ka poni pɩ̀rɩ̀.
11 Ba-Yígúrə́-Jə-Tiu swɩ̀n, ʋ wʋ́:
«À wá kə lʋʋ tə càn wa, kʋ lwanɩ tə yɩrɩ,
à ga kə wʋlʋnyɩna tə càn wa, ba wʋlʋŋʋ tə yɩrɩ.
À wá pa yigwənyɩna fwìə́ tə nyʋn lá,
à ga pa dɩ̀àn jalɩʋ tɩ̀án yɩrʋ tə fʋ kʋ mun.
12 À wá pa ləzoni ja zʋrɩ,
ba doni sɩ́án tə nə ba durən jə,
à wá pa ba ja zʋrɩ ba doni Ofirə tɩ̀án sɩ́án.»
13 Kʋ mʋ̀ nə pɩn dɩɩn tə nə,
Ba-Yígúrə́-Jə-Tiu, ʋ nə yɩ kwatara Yɩɩ
lɩŋa tə nə wá zàn tə fʋrɩ,
lanworu tə wá vuvugu,
tɩa tə ga sisigi ka dəkuu wa.
14 Yá lìù mama dàń wá viviri ʋ yáá
ʋ te ʋ lɩ̀à con,
lìù mama wá dəri ʋ va ʋ lʋʋ nii con,
ndə felə nə, ba nə dɩŋɩ sə ba ja,
nə à yə̀ə́ ndə pee nə, tə nə ba lìù jə
sə ʋ kə tə duən yáá nə.
15 Lìù tə mama dʋŋa tə nə wá na,
ba wá ta wá ba cʋ̀rɩ̀,
yá lìù tə mama ba nə wá ja,
ba wá gʋ wá də kwatara sɩ̀ʋ́.
16 Ba wá tɩtaga ba bìsɩ́ná ba yɩ́á yuu,
ba wá vɩrɩ ba dìì wiən,
ba ga pə̀ń ba kana də dɩ̀àn.
17 Nə̀ń, à sugu Medi tɩ̀án
à kə Babɩlɔnə tɩ̀án nə!
Ba yáá tə̀lə́ də səbiu,
sɩ́án fɩra ma ba ba jə.
18 Ba wá ja ba twɛn ba ma ta ləzwəndʋn tə ba gʋ,
yá ba bá dəri bìsɩ̀nɩ́ yinəgə,
bìú mama bá jɛ́n ba yáá nə.
19 Babɩlɔnə, payun tə wonanʋ tə,
kʋ nə yɩ Kaləde* tɩ̀án yɩrʋ bwanzɩlɩ,
wá ya ndə Sodɔmə də Gomɔrə nə,
Yɩɩ nə cʋ̀gʋ̀.
20 Lìù kʋ́ʋ̀ bá ya kʋ wa də mama,
lalʋʋ kʋ́ʋ̀ ba pìí ba ya kʋ wa mɩ́ámɩ́án,
máŋá də máŋá mama wuuu.
Arabi ganbələ tɩ̀án kʋ́ʋ̀ bá kə ba gansilə lá,
yá payɩra də kʋ́ʋ̀ bá pa ba vàná pə̀ń lá.
21 Kasɔɔ lanworu ganaŋa nə wá pə̀ń lá,
cirəlwarɩ nə wá sú kʋ dìì tə,
tɛɛtɛɛ wá ja tə, tə ma fwa tə yipaa bwálɩ́,
yá bʋtɩlan wá fan tə wa.
22 Buyurən wá kwi kʋ pɩ̀ʋ́ sànɩ́ tə wa,
cirəkuri ga kwi kʋ dìì tə nə jə fɩra tə wa.
Babɩlɔnə tʋrɩ máŋá yí kʋ zwɛ̀,
yá kʋ dɩan bá súrí.