Ezayi 1

Ezayi

SAGƖ TƏ TƏNTƏN BWALƖ

(1—39)

1 Yìə̀n tə Yɩɩ nə twá Amɔsə bìú Ezayi nɩʋn wa, ʋ bɩrɩ wá, Zwida payuu tə də Zwerizalɛmə tɩʋ tə yuu wa, Zwida payuu pɛ̀gá Ozɩasə, də Yotamə, də Ahazə, də Ezekɩasə pàrɩ̀ tə máŋá wa.

Lalʋʋ kʋ nə yɩ zɩbanənyɩna

2 Lanworu, cʋgʋ!

Tɩa, guni n zɩɩn n ma cʋgʋ!

Cɩ́gá, Ba-Yígúrə́-Jə-Tiu nə swɩ̀n:

«À kʋnɩ bìsɩ́ná, ba bori,

yá ba zàn ba vɩ à nii.

3 Naʋ yə̀ə́ lìù tə nə tɩ kʋ,

bɩ̀nà də yə̀ə́ bwálɩ́ tə

ka tɩ̀án nə kəni wodiu ba pɩn ka.

Yá Yɩzərayɛlə lɩ̀à mʋ̀ yəri won mama,

à lalʋʋ tə ba yoo mama də̀ń nə̀ń.»

Yazurə kʋ́ʋ̀ tə̀lə́ Zwida lʋʋ nii wa

4 Lɛɛ wá yí lʋʋ nii tə nə tʋŋa cʋna,

á mʋ̀ lalʋʋ tə, á yuu yolwana nə dáá,

á mʋ̀ lɩ̀à tə nə yɩ yolwafwana dwíí,

á ga yɩ bisɩmakʋkwɩnan!

Á vɩga Ba-Yígúrə́-Jə-Tiu,

á fʋfʋlɩ Yɩzərayɛlə lɩ̀à Yɩɩ tə nə yɩ parɩ*,

á ga viviri á kwa á ma sà wá.

5 Á bwálɩ́ kwà nə nə à kʋ́ʋ̀ wá mà,

á mʋ̀ lɩ̀à tə á nə vɩ à nii wuuu?

Á yuu tə mama yɩ nʋran,

á bɩcan tə mama ga yɩ̀.

6 Kʋ nə zɩgɩ á napɩra nə,

kʋ ja dɩ̀ kʋ yí á yupara wa,

bwálɩ́ tə̀lə́ kʋ nə jə yazurə.

Á yɩra tə mama caŋɩ, tə tún cwara,

də bələn, də nʋran nədʋra,

tə nə wà sɩ̀n,

ba nə wà nʋga tə nə ken,

ba ga wà tə vwe də gantwan.

7 Á lʋʋ nii tə jìgə̀ ndə digə nə,

mən dí á tɩan tə.

Vərə də́ á kárɩ́ wiən á yɩ́á yuu.

Á lʋʋ nii tə cʋ̀gʋ̀, ndə dʋŋa nə cʋ̀gʋ̀ kʋ.

8 Yá Siyon bʋ̀á tə cɩcɩ nə ga lá,

ndə vuun nə, divɛn tɩ̀án kárá wa,

ndə sìlí nə, kɔnkɔnbərə kárá wa,

ndə tɩʋ nə, dʋŋa nə púə́ kʋ ba kə də kʋ̀ʋ̀.

9 Ba-Yígúrə́-Jə-Tiu, ʋ nə yɩ kwatara Yɩɩ

yà nə wà nə gɩganɩ yá,

sə ba mɩɩ ya lʋʋ wa,

nə yà wá ya ndə Sodɔmə tɩ̀án nə,

nə à yə̀ə́ ndə Gomɔrə tɩ̀án nə!

Dun tə nə yɩ cavɩyoo tə pa Yɩɩ nə

10 Á cʋga Ba-Yígúrə́-Jə-Tiu sʋgʋ,

á mʋ̀ yáá tɩ̀án tə nə nyən ndə Sodɔmə yáá tɩ̀án nə!

Á gunə á zɩan á cʋgʋ nə tíú Yɩɩ nii sʋgʋ,

á mʋ̀ lalʋʋ tə nə nyən ndə Gomɔrə tɩ̀án nə!

11 Ba-Yígúrə́-Jə-Tiu swɩ̀n, ʋ wʋ́:

«Á jwəŋə kapʋpʋ tə nywarɩ nə yɩ bɛ̀ɛ̀, kʋ pa nə?

À waa nan á pabɩran jwəŋə tə, á nə sʋ̀rɩ́*,

də á pəbii nwɩɩ tə.

Á nabɩran, də á pəbii,

də á bʋtɩlan jana tə fɩra ba nə jə.

12 Máŋá tə á nə twi à yáá con,

à mʋ̀ nə yàá lòrì aba,

sə á dɩ á naa à dìə̀ dəwee tə wa naaa?

13 Á kʋ́ʋ̀ dànà ká ja zìlə́ wiən á bà á pa nə,

kʋ yɩ tʋtʋ.

Á wusinə ŋwɩn tə yɩ wolwan tə pa nə.

Á candʋra diŋə tə, də á sìə́ dɩan tə,

də á kuni nəfaran tə yɩ tʋtʋ,

yolwan tə nə gùlí tə wa pɩn, à ba tə sɛ̀.

14 À waa nan á candʋra tə, də á candiŋə tə.

Tə yɩ zɩlɩ tə pa nə,

yá à yɩra ga də tə zɩŋʋ.

15 Á nə zɩ̀n á jɩ̀àn, sə á ma jʋn nə,

à yàá pú à yáá, à dàn ká na aba.

Á nə swə á jʋn nə nɛɛ kapʋpʋ,

à ba á con taŋa.

Cɩ́gá, á jɩ̀àn lwá lɩ̀à jana.

16 Á swɩa á yɩra,

á kwɩan á tɩ̀àn á lɩ durən yìə̀n wa.

Á yaga á wʋlʋŋʋ tʋ̀tʋ̀nán tə nə, à yáá con,

á yaga lwanɩ fwaŋʋ nə.

17 Á kwìə̀ zəni fwaŋʋ,

á twara kʋ tə nə yɩ twá cɩ́gá nə,

ndə kʋ nə mɛ nətʋ.

Á kwana lìù tə nə tʋŋa dɩ̀àn lɩ̀à yɩra,

á kə cwəzəŋu wa.

Á bʋra bɩtarʋ bʋra,

kʋ twá cɩ́gá cwəŋə nə,

á zɩga kadənə jɩrɩmʋ.»

Á nə mɛn zɩbaniu wa, lɛɛ wá yí á nə

18 Ba-Yígúrə́-Jə-Tiu swɩ̀n, ʋ wʋ́:

«Á dàń bɩ̀àn, sə nə tún nə níə́.

Á cʋna tə nə swə tə yɩ sɩ̀sɩ́nʋ́, ndə jana nə,

tə wá jì nəpon, ndə nyʋ̀nʋ̀ nə.

Tə nə kʋ́ʋ̀ yɩ nəsɩan mwin,

tə wá jì nəpon, ndə pee bɔɔ nə.

19 Á nə kúrí á tì sə á zìlí à nii,

á wá də́ lʋʋ nii tə wozəŋə.

20 Yá á nə vɩga sə á zìlí nii,

á nə yɩ zɩbanənyɩna,

kwatara sɩ̀ʋ́ nə wá də́ aba.»

Cɩ́gá, Ba-Yígúrə́-Jə-Tiu nə swɩ̀n kʋ!

Yɩɩ wá kwɛn Zwerizalɛmə ʋ lɩ durən wa

21 Nətə nə kʋ twá,

pùə́ nədʋ tɩ̀án tɩʋ tə ma jì ndə kacwarʋ nə?

Tɩʋ təntə yà yɩ kʋ tə nə twá cɩ́gá nə,

ndə kʋ nə mɛ nətʋ nə súə́ lá,

kʋ wa lɩ̀à tə ga vəli cɩ́gá cwəŋə wa.

Yá sɩ́ʋ́n nə, lagʋra dàń nə súə́ kʋ nii!

22 Zwerizalɛmə, n wárʋ́ tə zʋa durən,

nɩ́á gùlí n divɛn tə wa.

23 N pàbɩ̀á tə yɩ zɩbanənyɩna,

ba də ŋwɩna jə nimarʋ.

Ba mama swə vuŋə,

ba ga dəri ba pɩ̀à ŋwɩ́rán.

Ba ba bɩtarʋ bʋra bʋ̀rɩ̀ kʋ twá cɩ́gá nə,

ba ga ba kadənu yoo jələ.

24 Kʋ mʋ̀ nə pɩn,

nə̀ń Yuu-Tiu Ba-Yígúrə́-Jə-Tiu,

kwatara Yɩɩ tə nə yɩ Yɩzərayɛlə lɩ̀à Yɩɩ tə

nə jə dɩ̀àn, nii sʋgʋ:

«Aa! À wá tʋn à fɩra à jarɩduən yɩra,

à ga fwi à lɩŋa à dʋŋa yuu wa.

25 À kʋ́ʋ̀ wá pìí à kə jɩɩn n yɩra.

À wá kwɛn n durən tə à lɩ,

ndə ba nə nyɩan lugu lii mən wa,

ba lɩ kʋ durən nətʋ.

N wá ya ndə ba nə sɩ̀n mʋ́ də sɩpwalʋ,

yá à dàń wá lɩ n durən mama.

26 À wá pa n lɩ̀à tə nə bʋ̀rɩ̀ bʋra,

pìí ba jì ndə ba yà nə yɩ nətʋ fuən nə,

à ga pa n kwenə tə jì ndə

ba yà nə yɩ nətʋ dí yáá nə.

Kʋ kwa nə, ba dàń wá bon mʋ́

“Cɩ́gá cwəŋə tɩʋ”,

“Pùə́ nədʋ tɩ̀án tɩʋ”.»

27 Yɩɩ wá jon Siyon tɩ̀án,

də ba nə twá cɩ́gá nə,

ndə kʋ nə mɛ nətʋ,

yá cɩ́gá cwəŋə wá ja kʋ lɩ̀à tə,

kʋ pìí kʋ bà Yɩɩ con.

28 Yá cʋcʋran wá tʋ lɩ̀à tə nə vɩ nii,

də ba tə nə yɩ cʋna lɩ̀à mʋ̀ yuu wa,

yá lɩ̀à tə nə vɩga Ba-Yígúrə́-Jə-Tiu wá nyʋn lá.

29 Cavɩra dàń wá ja aba á sɩsanan tə yɩrɩ,

tə yà nə yɩ á fɩra wiən,

yá á pùə́ wá cʋ̀gʋ̀ á culu tɩ̀án kárɩ́ tə yɩrɩ,

á yà nə kúrí, á ma tʋŋa á pɩn woŋwanan nə.

30 Cɩ́gá, á wá jì ndə sɩsanʋ nə,

kʋ vʋran nə pɩ̀nɩ̀,

nə à yə̀ə́ ndə tɩ̀án kárɩ́ nə,

nɩ́á nə mùrì tə.

31 Ladɩa wá jì ndə gunmuən nə,

ʋ tʋtʋnɛɛ ga wá jì ndə mənpwana nə.

Tə mɛ bələ wá kwe mən,

lìù ga bá ya lá, sə ʋ də̀ŋə̀ tə.