2
1 Nəŋə sʋ̀ràn tə Yɩɩ nə swɩ̀n Amɔsə bìú Ezayi con, ʋ nɩʋn wa, Zwida payuu tə də Zwerizalɛmə tɩʋ tə yuu wa.Dwíə́ tə mama vələ Zwerizalɛmə
2 Máŋá bɩ̀àn, paan tə Ba-Yígúrə́-Jə-Tiu
dìə̀ tə nə wulə ka yuu wa,
nə wá ya pɛɛn tə mama yuu wa.
Ka yuu danɩ wá doni pɛɛn tə mama,
yá dwíə́ nəkaran* kapʋpʋ wá bà ka yuu wa.
3 Lalʋʋ kapʋpʋ wá bà ka yuu wa, ba swɩ̀n, ba wʋ́:
«Á bɩ̀án nə dɩ̀ Ba-Yígúrə́-Jə-Tiu paan tə yuu,
Zwakɔbə Yɩɩ tə dìə̀ tə con!
Ʋ wá kàrɩ̀ nəba ʋ coŋi tə,
yá nə wá va ʋ cwəmɩnɩ tə wa.»
Cɩ́gá, Siyon tɩʋ tə wa nə, Yɩɩ nii yìə̀n tə wá nan,
Zwerizalɛmə wa nə, Ba-Yígúrə́-Jə-Tiu sʋgʋ tə wá nan.
4 Ʋ wá bʋ̀rɩ̀ dwíə́ nəkaran tə bʋra,
ʋ ga wá ya jɩrɩmʋ lìù, dwíə́ kapʋpʋ pwə́rə́ wa.
Ʋ wá pa ba ja ba kwatara sɩ̀án,
ba ma lù nɩan vànán,
ba ga ja ba cwiən,
ba ma fwa sɩkwarɩ.
Lʋʋ dwíí kʋ́ʋ̀ bá zɩ̀n kwatara sɩ̀ʋ́
kʋ zɩgɩ kʋ don nə,
yá ba kʋ́ʋ̀ bá kwè kʋ̀ʋ̀ tɛgʋ.
5 Zwakɔbə dwíí tɩ̀án-ba,
á bɩ̀àn nə kə duən nə va
Ba-Yígúrə́-Jə-Tiu poni tə wa!
Ba-Yígúrə́-Jə-Tiu dɩɩn tə yɩ bʋra dɩɩn
6 Yuu-Tiu, n vɩga n lɩ̀à tə,
ba nə yɩ Zwakɔbə dwíí, n dʋgʋ.
Cɩ́gá, ba lʋʋ nii tə súə́ də yɩɩ yipɩan con vʋra,
də ba tə nə ywàŋá lanworu,
ba ma bɩrɩ jwɩan yìə̀n, ndə Filisi tɩ̀án nə.
N lɩ̀à tə də dwíə́ nəkaran tə tʋŋa
nimarʋ yìə̀n kapʋpʋ də duən.
7 N lɩ̀à tə lʋʋ nii tə súə́ də sɩ́án də wárʋ́,
ba jɩjə wiən tə wàrɩ̀ tə gàlɩ̀ tə zwɛ̀.
Ba lʋʋ nii tə súə́ də səsen,
ba səsen kòrə̀n tə wàrɩ̀ tə gàlɩ̀ tə zwɛ̀.
8 Ba lʋʋ nii tə súə́ də kʋ̀nkʋ̀n yɩa,
ba tətə nə fwa də ba jɩ̀àn,
ba twɩ ba nadwana yuu tə yáá con,
ba pɩn dun wiən tə nə,
ba tətə jɩfwɩ nə fwa.
9 Ləzoni ken cavɩra ba tɩ̀àn nə,
Adamə nɩ̀án fʋlɩ ba tɩ̀àn.
Kʋ mʋ̀ yɩrɩ, dàn ká kwɛn ba cʋna
n lɩ n də ba pwə́rə́ wa!
10 Zʋ pɩ̀ràn kwə̀lə́ wa,
n səgə pùrú wa,
sə n wànɩ́ n jɛ́n Ba-Yígúrə́-Jə-Tiu lɩŋa nəfarʋ tə,
də ʋ dun poni tə yáá nə.
11 Yɩrʋ yiywaŋa tɩ̀án wá kə ba yɩ́á tɩa,
yá fwìə́ lɩ̀à də ga wá ziri ba yun tɩa.
Ba-Yígúrə́-Jə-Tiu cɩcɩ nə wá na dun kʋ dɩɩn tə nə.
12 Cɩ́gá, Ba-Yígúrə́-Jə-Tiu ʋ nə yɩ kwatara Yɩɩ lɩ dɩɩn ʋ tún,
sə ʋ ma zɩgɩ yɩrʋ də fwìə́ won mama nə,
sə ʋ ma zɩgɩ kʋ tə mama nə,
kʋ nə zɩ̀n kʋ tɩ̀àn yɩɩ nə,
ʋ pa kʋ cú kʋ tɩ̀àn tɩa.
13 Ʋ wá zɩgɩ Liban pún sɩsaban tə mama nə,
tə yun nə dara yɩɩ nə,
də Baswan sɩsanan tə mama nə.
14 Ʋ wá zɩgɩ pɛɛn tə mama nə,
tə yun nə dara yɩɩ nə,
də dədwələn tə mama nə,
tə yun nə dara yɩɩ nə.
15 Ʋ wá zɩgɩ dəyuu dìì tə mama nə,
tə yun nə dara yɩɩ nə,
də biritaŋan tə mama nə,
tə nə yɩ dɩ̀àn dəkuu bwálɩ́.
16 Ʋ wá zɩgɩ nɩ́á yuu bwərə nəfaran tə mama nə,
tə nə vəli yiŋʋnɩ,
də wiən tə mama nə, tə nə zɩŋa, tə nə jə fɩra.
17 Yɩrʋ tɩ̀án wá kə ba yun tɩa,
yá fwìə́ lɩ̀à də ga wá ziri ba yun tɩa.
Ba-Yígúrə́-Jə-Tiu cɩcɩ nə wá na dun kʋ dɩɩn tə nə.
18 Kʋ̀nkʋ̀n yɩa tə mama wá nyʋn lá.
19 Dɩɩn tə Ba-Yígúrə́-Jə-Tiu nə wá zàn
ʋ vuvugu tɩa tə,
ləzoni wá zʋ pɩ̀ràn bʋran,
də tɩa də̀ń pùrú wa,
sə ba wànɩ́ ba jɛ́n ʋ lɩŋa nəfarʋ tə,
də ʋ dun poni tə yáá nə,
20 Kʋ dɩɩn tə nə, ləzoni wá dɩlɩ wárʋ́ kʋ̀nkʋ̀n yɩa tə, də sɩ́án kʋ̀nkʋ̀n yɩa tə, ba nə fwa sə ba tʋ ba nadwana yuu tə yáá con, ba pɩn tə dun, ba dʋgʋ ba pa tatwaran də sɩ́sárɩ́ nə. 21 Máŋá tə Ba-Yígúrə́-Jə-Tiu nə wá zàn ʋ vuvugu tɩa tə, ləzoni wá zʋ pɩ̀ràn kwə̀lə́ wa, də pɩ̀ràn lulwərən wa, sə ba wànɩ́ ba jɛ́n ʋ lɩŋa nəfarʋ tə, də ʋ dun poni tə yáá nə.
22 Á kʋ́ʋ̀ dànà ká jələ ləzwənə yuu wa,
ʋ mɩɩ tə yɩ vʋʋ cɩcɩ.
Ʋ funə nə yɩ bɛ̀ɛ̀?