Pɩ̀ʋ́ kʋ́ʋ̀ tə̀lə́ Zwida payuu tə wa
3
1 Nəŋə kʋ nə, Yuu-Tiu Ba-Yígúrə́-Jə-Tiu,ʋ nə yɩ kwatara Yɩɩ wá vwəŋə Zwerizalɛmə,
də Zwida payuu tə wodiu də nɩ́á.
Ʋ wá vwəŋə ba sáŋʋ́ yiri mama.
2 Ʋ wá vwəŋə ba kwatara babɩran də kʋ̀ʋ̀ lɩ̀à,
də lɩ̀à tə nə bʋ̀rɩ̀ bʋra, də Yɩɩ nii sʋ̀sʋ̀nà,
də vʋra də nəkwɩna,
3 də kwatara finu yáá tɩ̀án, də tɩʋ tɩ̀án,
də kwenə, də lɩ̀à tə nə jə jɩɩn tʋ̀tʋ̀nán yənu,
də lɩ̀à tə nə bɩga cɩrɩ tʋ̀tʋ̀nán wa.
4 Ba-Yígúrə́-Jə-Tiu swɩ̀n ʋ wʋ́:
«À wá tún ləzwəndʋn ba yuu wa,
sə ba ya ba pɛ̀gá,
à ga pa bisɩmabii də́ dɩ̀àn ba yuu wa.»
5 Lalʋʋ tə wá fɩfɩn duən,
yá lìù mama wá tʋn dɩ̀àn ʋ jəndon yɩra.
Ləzwəndʋn wá wʋwalɩ bazʋnʋ,
yá bakʋkwanyɩna wá wʋwalɩ
lìù tə nə mɛ də dun.
6 Bɛɛ wá ja ʋ nubidon, ba nyɩna dìə̀ wa,
ʋ swɩ̀n ʋ con, ʋ wʋ́:
«N jə ganzwɩfarʋ,
kʋ mʋ̀ yɩrɩ, ya nə yáá tíú!
Jon lalʋʋ kʋ tə nə tʋa bwànɩ̀ wa pàrɩ̀, n də́!»
7 Kʋ dɩɩn tə nə, ʋ wá zɩ̀n ʋ kori ʋ kə yɩɩ nə,
ʋ swɩ̀n, ʋ wʋ́: «À tà dɩmʋtʋrʋ, yá wodiu,
nə à yə̀ə́ ganzwɩfarʋ tə̀lə́ à dìə̀ wa.
Á dànà ká tún nə,
sə à ya lalʋʋ tə yáá tíú!»
8 Cɩ́gá, Zwerizalɛmə mà kʋ nɛɛ,
yá Zwida tʋa tɩa,
ba nii sʋ̀ràn də ba tʋtʋnɛɛ nə zɩga
Ba-Yígúrə́-Jə-Tiu nə yɩrɩ.
Ba vɩga ʋ nii ʋ dun tə yáá con.
9 Ba yapɩrɩdiə swɩ̀n kaa zɩga ba nə.
Ba bɩrɩ ba cʋna tə pwənə pwənə,
ndə Sodɔmə tɩ̀án nə, ba ba tə səgə.
Nə̀ń kʋ lɛɛ nyɩɛn nʋʋ, kʋ pa ba!
Cɩ́gá, ba ken lɛɛ ba tɩ̀àn nə.
10 Á swɩan cɩ́gá tíú con də,
ʋ wá nì ʋ ywánɩ́,
də ʋ wá də́ ʋ tʋtʋnɛɛ nywarɩ.
11 Yá nə̀ń kʋ lɛɛ nyɩɛn nʋʋ,
kʋ pa wʋlʋnyiən mʋ̀ nə!
Ʋ wá na càn,
ba nə wá ja kʋ tə ʋ jɩ̀àn nə tanɩ,
ba ma ŋwɩ́n wá yɩrɩ.
12 Ba-Yígúrə́-Jə-Tiu swɩ̀n, ʋ wʋ́:
«À lalʋʋ tə yɩ bisɩmabii nə fɩfɩn ba,
yá kana nə də́ dɩ̀àn ba yuu wa.
À lalʋʋ, á yáá tɩ̀án tə gɩgarɩ aba ba dʋga,
ba pɩn á dwɛ́ cwəŋə tə á nə wulə ka wa.»
13 Ba-Yígúrə́-Jə-Tiu zàn,
sə ʋ swɩ̀n ʋ zɩgɩ ba nə,
ʋ zàn ʋ zɩga yɩɩ nə,
sə ʋ bʋ̀rɩ̀ lʋʋ dwíə́ tə bʋra.
14 Ba-Yígúrə́-Jə-Tiu pɩ̀à,
sə ʋ bʋ̀rɩ̀ ʋ lalʋʋ tə tɩʋ tɩ̀án tə
də ba yáá tɩ̀án tə bʋra:
«Á mʋ̀ nə dí divɛn tɩ̀án kárɩ́ tə!
Lalaŋa wiən nə á vɩrɩ á sú á dìì!
15 Bɛ̀ɛ̀ nə pɩn á ma tɩtaga à lalʋʋ tə,
yá á nɩŋɩ lalaŋʋ dun də á nɛɛ?
Yuu-Tiu Ba-Yígúrə́-Jə-Tiu,
ʋ nə yɩ kwatara Yɩɩ nii sʋgʋ nə!»
Yɩɩ sʋgʋ tə nə zɩga Zwerizalɛmə kabwaŋa tə nə
16 Ba-Yígúrə́-Jə-Tiu swɩ̀n, ʋ wʋ́:
«Siyon* tɩ̀án bwɩ̀ɩ́ tə jə yɩrʋ:
Ba te ba bɩan yɩɩ nə, ba ja vəli,
ba ga jə nipɛrɩ yiywaŋa.
Ba dɩ nagalʋ kukwi ba ja vəli,
də ba pɩn ba nɛɛ kabaŋa dwanɩ.»
17 Kʋ mʋ̀ nə pɩn,
Yuu-Tiu wá pàrɩ́ Siyon tɩ̀án bwɩ̀ɩ́ tə yuu,
Ba-Yígúrə́-Jə-Tiu wá yá ba yukolu.
18 Kʋ dɩɩn tə nə, Yuu-Tiu wá lɩ ba yɩra bwanzɩla tə mama: Tə mʋ̀ nə yɩ nɛɛ kabaŋa tə, də zanan tə, də wonanan tə nə nyən ndə canpɩan nə, 19 də zɩnkwana tə, də vala tə, də yáá gankɩkalɩ tə, 20 də yúkwàlɩ́ tə, də nɛɛ zanan tə, də tàŋá vwərən tə, də wusinə kùnkòlí tə, də kiri tə, 21 də jɩtuŋu jɩfɩla tə, də mɩa kwana tə, 22 də cànà gànàn tə, də ganzwɩfaran tə, də gaswaran tə, də jɩ̀àn lwàràn tə, 23 də zəŋi tə, də gànàn də̀ń ganzʋbiə tə, də yubaran tə, də gankɩkalɩ tə.
24 Yá wòpʋ́pʋ́nʋ́ lwán dàń wá jon wusinə bwálɩ́,
ŋwənə wá jon voru bwálɩ́,
yuu ba nə fɩnɩ wá jon yuu ba nə pan bwálɩ́,
ganlɔɔ gànʋ̀a wá jon dun ganzwɩfarʋ bwálɩ́,
cavɩra wá jon bwaŋa bwálɩ́.
Zwerizalɛmə kadənə tə yoo
25 Kwatara sɩ̀ʋ́ wá də́ n kwatara tə,
yá n babɩran tə wá tʋ ba tɩ kʋ̀ʋ̀ wa.
26 Tɩʋ tə mama wá ya lúə́ pucʋnɩ wa,
kʋ wa lɩ̀à tə wá kwi ba sisigi.
Ba vɩrɩ tɩʋ tə, kʋ jə̀ə́ tɩpɩrɩ wa.