Zwerizalɛmə yɩ sìə́ patɩʋ
4
1 Máŋá bɩ̀àn, paan tə Ba-Yígúrə́-Jə-Tiudìə̀ tə nə wulə ka yuu wa,
nə wá ya pɛɛn tə mama yuu wa.
Ka yuu danɩ wá doni pɛɛn tə mama,
yá lalʋʋ kapʋpʋ wá bà ka yuu wa.
2 Lʋʋ dwíə́ kapʋpʋ wá bà ka yuu wa,
ba swɩ̀n, ba wʋ́:
«Á bɩ̀án nə dɩ̀ Ba-Yígúrə́-Jə-Tiu paan tə yuu,
Zwakɔbə Yɩɩ tə dìə̀ tə con!
Ʋ wá kàrɩ̀ nəba ʋ coŋi tə,
yá nə wá va ʋ cwəmɩnɩ tə wa.»
Cɩ́gá, Siyon tɩʋ tə wa nə, Yɩɩ nii yìə̀n tə wá nan,
Zwerizalɛmə wa nə, Ba-Yígúrə́-Jə-Tiu sʋgʋ tə wá nan.
3 Ʋ wá ya lìù tə nə bʋ̀rɩ̀ bʋra,
lalʋʋ kapʋpʋ pwə́rə́ wa,
ʋ wá ya jɩrɩmʋ lìù, lʋʋ dwíə́ tə pwə́rə́ wa,
tə nə jə dɩ̀àn, tə ga wulə yiŋʋnɩ.
Ʋ wá pa ba ja ba kwatara sɩ̀án,
ba ma lù nɩan vànán,
ba ga ja ba cwiən,
ba ma fwa sɩkwarɩ.
Lʋʋ dwíí kʋ́ʋ̀ bá zɩ̀n kwatara sɩ̀ʋ́,
kʋ zɩgɩ kʋ don nə,
yá ba kʋ́ʋ̀ bá kwè kʋ̀ʋ̀ tɛgʋ.
4 Lìù mama dàń wá jə̀ń ʋ divɛn tɩ̀ʋ́,
də ʋ kapɩrʋ də̀ń də yazurə,
yá lìù kʋ́ʋ̀ bá ya lá, ʋ wʋwalɩ ba.
Cɩ́gá, Ba-Yígúrə́-Jə-Tiu, ʋ nə yɩ kwatara Yɩɩ nii sʋgʋ nə!
5 Cɩ́gá, dwíə́ tə duən mama yɩ ba vəli,
dwíí mama kʋ yɩɩ yuu yɩrɩ,
yá nə mʋ̀ yɩ nə vəli,
Ba-Yígúrə́-Jə-Tiu, nə tíú Yɩɩ yuu yɩrɩ,
máŋá də máŋá mama wuuu.
Ba-Yígúrə́-Jə-Tiu wá də́ pàrɩ̀ Zwerizalɛmə nə
6 Ba-Yígúrə́-Jə-Tiu swɩ̀n, ʋ wʋ́:
«Máŋá bɩ̀àn, à nə wá pìí à kə ba tə nə dwin,
də ba tə ba yà nə dɩŋɩ ba lɩ,
à ga fɩfɩn ba zənzən, duən yáá nə.
À mʋ̀ Ba-Yígúrə́-Jə-Tiu nii sʋgʋ nə!
7 À wá pa ba tə nə dwin tə jì dwíí gɩganɩ*,
à ga pa ba tə, ba yà nə ken vàn nə,
jì dwíí kʋ nə jə dɩ̀àn.
Yá à mʋ̀ Ba-Yígúrə́-Jə-Tiu dàń wá də́ pàrɩ̀
ba yuu wa, Siyon paan tə yuu wa,
kʋ nə zɩgɩ kʋ máŋá tə wa,
kʋ ja vələ máŋá mama wuuu.
8 Yá n mʋ́, Zwerizalɛmə paan,
n ywàŋá lalʋʋ tə yuu,
ndə payɩrʋ nə zɩga dəyuu dìə̀ yuu,
ʋ ma ywàŋá pee nə.
N təntən pàrɩ̀ dɩ̀àn tə n yà nə jə,
wá pìí tə bà n con.
Zwerizalɛmə tɩzəŋu tə nə yɩ ndə kacɩɩn nə,
kʋ́ʋ̀ wá pìí kʋ jì payuu tə patɩʋ.»
Də́də́ŋú də jonu tə Zwerizalɛmə nə nɩ
9 Bɛ̀ɛ̀ nə pɩn, n ma mà bubwiə sɩ́ʋ́n nə?
N ba pɩ̀ʋ́ jə naaa?
N kwɩ̀n n kwenu tə nə,
kʋ pa n pipini də yacara,
ndə kan pùə́ nə yɩ̀ sə ʋ lɩra naaa?
10 Də́ càn də n nɩ́, Siyon bʋ̀á,
ndə kan pùə́ nə yɩ̀ sə ʋ lɩra!
Cɩ́gá, sɩ́ʋ́n nə, n wá nan tɩʋ tə wa,
n va n ya kárɩ́ wa,
yá n wá va n yí Babɩlɔnə.
Yá mə lá nə, n wá na jonu,
mə lá nə, Ba-Yígúrə́-Jə-Tiu wá pìí
ʋ jon mʋ́, n dʋŋa jɩɩn wa.
11 Sɩ́ʋ́n nə, lʋʋ dwíə́ kapʋpʋ kun duən nə,
sə ba ta mʋ́,
yá ba swɩ̀n, ba wʋ́:
«Nə cʋga tɩʋ tə, nə pa kʋ jì durən won!
Nə pɩan nə yɩ́á ywàń Siyon tɩʋ tə dibwərən!»
12 Ba mʋ̀ lɩ̀à təntə yəri Ba-Yígúrə́-Jə-Tiu pubʋŋɩ,
ba ba ʋ pubʋŋa yìə̀n tə ʋ nə tanɩ də̀ń nə̀ń:
Ʋ ja ba ʋ bà duən nə, ndə mɩgugunə nə, tʋa wa.
13 Siyon bʋ̀á, zàn yɩɩ nə, n mà mɩna tə!
À wá pa n ja dɩ̀àn, ndə lugu nyʋʋ nə,
à ga ba pa n nɛɛ ja dɩ̀àn, ndə cɩnɩan napwaŋɩ nə.
N wá nyʋnyʋgʋ lalʋʋ kapʋpʋ,
n ga tún ba wiən tə nə jə funə vàn nə,
ndə culu wiən nə,
n pa Ba-Yígúrə́-Jə-Tiu cɩcɩ nə.
N wá pa ba jɩjə wiən tə jì tɩa mama Yuu-Tiu tə nyiən.
14 Sɩ́ʋ́n nə, kwatara bʋ̀á, bɩ̀rɩ̀ gwɛɛn n yɩra!
Ba púə́ nəba ba kə də kʋ̀ʋ̀,
ba ja dàʋ̀ ba mà lìù tə nə bʋ̀rɩ̀
Yɩzərayɛlə lɩ̀à bʋra pɩpara nə.