Yɩɩ cɩ́cágá yáá tɩ̀án tə nii nə, ba nə yɩ wʋlʋnyɩna
3
1 À swɩ̀n, à wʋ́:«Á cʋga Zwakɔbə dìə̀ tɩ̀án-ba,
də á mʋ̀ lɩ̀à tə nə bʋ̀rɩ̀ Yɩzərayɛlə dìə̀ tə bʋra!
Kʋ tà á mʋ̀ nə mɛ sə á lwarɩ
yoo tə nə tì cɩ́gá cwəŋə naaa?
2 Yá á culi kʋ tə nə ziən,
á ga swə kʋ tə nə lwara.
Á pwànɩ̀ lɩ̀à tànʋ̀, á lɩ ba yɩra,
á ga vùrí ba nàŋʋ́, á yá ba kurən.»
3 Ba lwàrɩ̀ à lɩ̀à tə tànʋ̀,
ba də́ ba nàŋʋ́,
ba ga nyʋnyʋgʋ ba kurən.
Ba mumuni à lɩ̀à tə,
ndə won nə ba nə sàŋà nəkənə wa,
ndə nàŋʋ́ nə nagwalʋ wa.
4 Yáá tɩ̀án wʋlʋnyɩna təntə dàń wá bubwi
ba kə Ba-Yígúrə́-Jə-Tiu nə,
yá ʋ bá tan ba con.
Kʋ máŋá tə wa, ʋ wá viviri ʋ kwa,
ʋ ma sà ba,
ba tʋtʋnɛɛ tə nə lwara yɩrɩ.
Yɩɩ cɩ́cágá Yɩɩ nii sʋ̀sʋ̀nà tə nii nə, ba nə gɩgarɩ lalʋʋ tə
5 Nə̀ń kʋ tə Ba-Yígúrə́-Jə-Tiu nə swɩ̀n Yɩɩ nii sʋ̀sʋ̀nà tə yuu wa, ba nə gɩgarɩ ʋ lɩ̀à tə ba dʋga:
«Ba nə pɩn ba wodiu,
ba yàá swɩ̀n də sìə́ wulə.
Yá lìù nə wà won ba nii wa ken,
ba yàá zɩ̀n kwatara púlí,
ba zɩgɩ kʋ tíú nə də kʋ̀ʋ̀!
6 Kʋ mʋ̀ nə pɩn, á wá na tɩtɩn,
yá á kʋ́ʋ̀ bá na nɩʋn!
Á wá na yikunu,
yá á kʋ́ʋ̀ bá na jwɩan yoo, á swɩ̀n!
Yɩɩ wá zʋ kʋ dà Yɩɩ nii sʋ̀sʋ̀nà təntə nə,
tɩa wá yì kʋ pa ba.»
7 Yinara tə wá də́ cavɩra,
vʋ̀rà tə wá viviə,
ba mama wá ja ba nii nə.
Cɩ́gá, Yɩɩ kʋ́ʋ̀ ba ba le.
8 Yá à mʋ̀ súə́ də dɩ̀àn,
kʋ twá də Ba-Yígúrə́-Jə-Tiu Siŋu tə.
À jə wʋdɩʋ,
à ma tʋŋa kʋ tə nə tì cɩ́gá cwəŋə.
À swɩ̀n Zwakɔbə dwíí tə cʋna tə yoo ba con,
à ga swɩ̀n Yɩzərayɛlə lɩ̀à lwanɩ tə yoo ba də con.
Miswe pɩn ŋwɛn, də Zwerizalɛmə wá cʋ̀gʋ̀
9 Á dàń cʋga, Zwakɔbə dìə̀ tɩ̀án-ba,
də á mʋ̀ lɩ̀à tə nə bʋ̀rɩ̀ Yɩzərayɛlə dìə̀ tə bʋra!
Á culi kʋ tə nə tì cɩ́gá cwəŋə,
á ga gugoli kʋ tə mama nə yɩ mənəmənə.
10 Á lwè Siyon tɩʋ tə jana wa,
á ga tì kʋ̀nkʋ̀n coŋi,
á ma lwè Zwerizalɛmə.
11 Kʋ bʋra lɩ̀à tə joŋə vuŋə,
ba ga bʋ̀rɩ̀ bʋra,
kʋ Yɩɩ joŋwana kàrɩ̀ lɩ̀à,
ba ga joŋə ŋwɩ́rán,
kʋ Yɩɩ nii sʋ̀sʋ̀nà swɩ̀n jwɩan yìə̀n,
ba ga joŋə səbiu,
yá ba nyɩ́n Ba-Yígúrə́-Jə-Tiu yuu wa,
ba ma swɩ̀n, ba wʋ́:
«Ba-Yígúrə́-Jə-Tiu tə̀lə́ də nəba naaa?
Lɛɛ wàrɩ́ nəba tə yí!»
12 Kʋ mʋ̀ nə pɩn, á mʋ̀ yɩrɩ nə,
ba wá gwìń Siyon tɩʋ tə, ndə kárá nə,
Zwerizalɛmə ga jì kapana púlí,
yá pún wá nan kʋ pú paan tə yuu nə,
Yɩɩ dìə̀ tə nə wulə ka yuu wa.