Nahumə
Nahumə sagɩ tə yuu wa sʋgʋ
Nahumə sagɩ tə yɩ Ninivə tɩʋ tə tʋrɩ yoo nə kʋ swɩ̀n, də kʋ tʋrɩ máŋá tə wà yí. Ninivə yà yɩ Asiiri payuu tə patɩʋ. Asiiri tɩ̀án ta Tebɛsə tɩʋ tə ba də́, bɩna 663 bɩnɩ tə wa, də Zwezi tə wà twi, yá Babɩlɔnə tɩ̀án cʋ̀gʋ̀ Ninivə tɩʋ tə bɩna 612 bɩnɩ tə wa, də Zwezi tə wà twi: Mə yìə̀n bələ təntə pwə́rə́ wa nə Nahumə sagɩ tə pʋ́pʋ́nɩ́.
Sagɩ tə sʋyun
Sagɩ tə pwɛ̀ bwálá batwa:
Təntən bwálɩ́ tə fwa ndə sagɩ tə yuu wa sʋgʋ nə. Kʋ bɩrɩ də Yɩɩ nə də́ dɩ̀àn won mama yuu wa, ʋ mʋ̀ Yɩɩ nə fwa, ʋ mʋ̀ ga nə bʋ̀rɩ̀ lʋʋ mama bʋra (1.2-8).
Bələ nii bwálɩ́ tə bɩrɩ nətʋ tə, Yɩɩ nə wá bɩrɩ ʋ dɩ̀àn tə, Nahumə máŋá tə wa. Ʋ wá cʋ̀gʋ̀ Ninivə tɩʋ tə, ʋ ga jon Zwida lʋʋ lɩ̀à tə, ʋ pa ba tɩnɩ ba tɩ̀àn (1.9—2:3).
Batwa nii bwálɩ́ tə bɩrɩ nətʋ tə, Ninivə tɩʋ tə də kʋ pàrɩ̀ tə nə wá tʋ (2.4—3:19).
Yɩɩ nii sʋ̀sʋ̀nʋ̀* tə kori tə vəli kʋ kɛ̀ń Ninivə tɩʋ tə tʋrɩ tə yoo yuu. Cɩ́gá, Nahumə bɩrɩ də Yɩɩ bʋra jɩn Ninivə tɩʋ tə, kʋ mʋ̀ nə pɩn kʋ ma cʋ̀gʋ̀. Ninivə yɩ fwìə́ lɩ̀à, də lagʋra, də bacwaran, də kacwaran tɩʋ. Kʋ yɩ ləzoni pàrɩ̀ mɩmɩnʋ tɩʋ, ba nə lwə̀ yìə̀n yuu wa, Yɩɩ nə ba pɩ̀à. Zə̀n kʋ tə, Nahumə sagɩ tə bòrì kʋ bɩrɩ də, pàrɩ̀ yiri təntə mɛ sə kʋ nyʋn lá.