2
1 Zwida lʋʋ lɩ̀à-ba, á nəŋə tʋntʋnʋ tə nə swɩ̀n sʋ̀ywáŋʋ́ tə nə pɩn bɩcan sìə́ nə,
ʋ wulə pɛɛn tə yuu wa, ʋ bɩ̀àn!
Á díə́ á cànɩ̀ tə,
á ga tʋn á nɩkana tə, á pa tə nii sú!
Cɩ́gá, bakʋkwanyiən tə kʋ́ʋ̀ bá twá á titəŋi wa ʋ kɛ̀ń,
ʋ dɩ̀àn zwɛ̀ mɩ́ámɩ́án.
2 Cʋcʋnyiən bɩ̀àn á nə, Ninivə tɩ̀án-ba.
Á cɩa á dɩ̀àn dəkuu bwálɩ́ tə nə,
á ywàŋá cwəŋə tə yuu zəni,
á vwiə á tàŋá voru, á pa kʋ ja dɩ̀àn,
á ga ja wʋdɩʋ, də á kajaŋa mama!
3 Cɩ́gá, lɩ̀à yà vɩrɩ Zwakɔbə dwíí tə wiən də dɩ̀àn,
ba ga cʋ̀gʋ̀ ba divɛn tɩ̀án tə.
Yá Ba-Yígúrə́-Jə-Tiu pìí ʋ kə Zwakɔbə dwíí tə dun wa,
ʋ pìí ʋ kə Yɩzərayɛlə lɩ̀à dun wa.
Ninivə tɩʋ tə tʋrɩ yoo
4 Tɩʋ tə kwatara tə nàtànɩ̀ yɩ nəsɩnan,
kwatara babɩran tə zʋa gansɩnan mwin.
Dɩɩn tə ba nə tanɩ sə ba ta kʋ̀ʋ̀,
səsen kòrə̀n tə tɩɩn duən nə,
yá tə lugu tə tùŋə̀ ndə mənvwə nə,
kwatara tə ga kwɛn ba cwiən ba janɩ.
5 Səsen kòrə̀n tə dəri də dɩ̀àn coŋi tə yuu,
tə dəri lala kanpwərən tə wa, ndə gabɩa mənvwə nə,
tə nɛɛ ga lɩŋa tɩa ndə dwà pɩpɩlʋ nə.
6 Ninivə pɩ̀ʋ́ tə bon ʋ kə ʋ kwatara babɩran nə,
yá ba vəli də ba mà ba nɛɛ.
Ba tə dəri ba va tɩʋ tə biritaŋʋ tə con,
ba cɩ̀ ba tɩ̀àn nə, ba ja zɩga.
7 Tɩʋ tə mimien tə nə daa mʋnaa tə con kɛ́n,
yá pɩ̀ʋ́ sàń tə tʋa!
8 Ba nɩ woŋwanʋ tə ba tì, ba ja vìí.
Kʋ tʋtʋnkana tə kwi,
ba sisigə ndə nasara gunponi nə,
də ba mà ba nyʋnɩ wa.
9 Fuən nə, Ninivə tɩʋ tə yà yɩ ndə nɩ́á gwàlʋ́ nəfarʋ nə,
yá nə̀ń kʋ nə, kʋ nɩ́á tə wulə tə wɩ!
Á zɩga! Á zɩga!
Yá lìù mama yɩ ʋ dəri,
ʋ ba ʋ kwa viviri ʋ pàlɩ̀!
10 Á pɛga wárʋ́! Á pɛga sɩ́án!
Jɩjə wiən tə wàrɩ̀ tə zwɛ̀!
Tə yɩ jɩjə wiən yirə yirə, tə nə jə funə!
11 Kʋ yɩ lagʋrɩ, də vɩra, də cʋcʋran!
Lɩ̀à tə jɩ̀àn gwàrɩ̀,
ba nɛɛ tɩga,
ba yɩra tə mama vɩvaga,
ba mama yɛ́ɛ́ cʋ̀gʋ̀.
Ninivə tɩʋ tə yɩ ndə gəru nə, ba nə dí dɩ̀àn kʋ yuu wa
12 Gərən bwálɩ́ təntə wa yə̀n nə,
kʋ mʋ̀ gəbii bwálɩ́ təntə, gəbɩa, də gəkan,
də gəbii yà nə na tə nii wodiu lá,
yà lìù mama yà ba tə wʋwalɩ?
13 Gəru tə yà gwɩ, kʋ ma kʋ̀nɩ̀ kʋ bɩ̀á,
də kʋ kàŋɩ̀ kʋ gwɩ, kʋ pɩn kʋ kana nə.
Kʋ yà ken nàŋá kʋ sú kʋ yipaa bwálɩ́,
bwálɩ́ tə kʋ nə wulə yà súə́ də tɩga.
14 Ba-Yígúrə́-Jə-Tiu, ʋ nə yɩ kwatara Yɩɩ nii sʋgʋ nə:
«Nə̀ń à nə, à zàn à zɩga á nə, Ninivə tɩ̀án-ba!
À wá sʋ̀rɩ́ á kʋ̀ʋ̀ səsen kòrə̀n tə, à pa tə jì ŋwɩn.
Kwatara sɩ̀ʋ́ wá də́ á gəbii tə,
à ga wá pa wiən tə, á nə vɩrɩ də dɩ̀àn, jɛ́n lʋʋ nii tə wa,
yá lìù mama kʋ́ʋ̀ ba nì á tʋntʋna tə kori.»