Miswe
Miswe sagɩ tə yuu wa sʋgʋ
Yɩɩ nii sʋ̀sʋ̀nʋ̀ Miswe də Yɩɩ nii sʋ̀sʋ̀nʋ̀ Yɩzayi nə ken duən ba ya lá, máŋá nədʋ wa. Yɩɩ nii sʋ̀ràn təntə yɩ Yɩzərayɛlə lɩ̀à patɩan bələ tə yɩrɩ nə, ʋ swɩ̀n tə. Tə mʋ̀ nə yɩ Samari, kʋ nə yɩ Yɩzərayɛlə payuu tə nə wulə jɩzən saparʋ yuu patɩʋ, də Zwerizalɛmə, kʋ nə yɩ Zwida payuu tə nə wulə jɩgwiə saparʋ yuu patɩʋ. Miswe yɩ ʋ swɩ̀n ʋ zɩga yáá tɩ̀án tə, də Yɩɩ joŋwana tə, də lɩ̀à tə nə bʋrɩ bʋ̀rà, də jɩjə tɩ̀án tə nə, ba tʋtʋnɛɛ nə ba cɩ́gá cwəŋə tì yɩrɩ. Ʋ gwìń kʋ̀nkʋ̀n Yɩɩ nii sʋ̀sʋ̀nà tə də də̀ń, ba nə kəni yala lalʋʋ tə waa, ba swɩ̀n də yojanʋ mama tə̀lə́. Ʋ swɩ̀n də dʋŋa wá cʋ̀gʋ̀ tə mʋ̀ patɩan bələ təntə, ba ga kə tə wa lɩ̀à tə càn wa.
Yá Yɩɩ nii sʋ̀sʋ̀nʋ̀ Miswe mʋ̀ sʋ̀ràn tə pɩn yala də jɩdaŋɩ. Yɩɩ swɩ̀n də ʋ lalʋʋ tə wá pìí ba bà ʋ con, yá lʋʋ dwíə́ tə mama wá lwarɩ də ʋ yɩ Yɩɩ (4.1-4). Yɩɩ wá tʋn Davidə dwíí lìù, sə ʋ də́ pàrɩ̀, yá sìə́ máŋá wá ya lá (5.1-4a). Miswe lwarɩ lalʋʋ tə cʋna tə, yá ʋ ken waa Ba-Yígúrə́-Jə-Tiu nə zənzən, ndə ʋ nə bɩrɩ kʋ nətʋ, sagɩ tə swapitərə 7, vɛrəse 19 də vɛrəse 20 wa.
Sagɩ tə sʋyun
Ba-Yígúrə́-Jə-Tiu wá kə càn ʋ lalʋʋ tə nə (swapitərə 1—3)
Ba-Yígúrə́-Jə-Tiu wá də́ pàrɩ̀, yá ʋ jon ʋ lɩ̀à tə (swapitərə 4—5)
Ba-Yígúrə́-Jə-Tiu cɩ́cágá Yɩzərayɛlə lɩ̀à nii nə, ʋ ga kàn nikanɩ, ʋ pa ba (swapitərə 6—7).