Zonasə
Zonasə sagɩ tə yuu wa sʋgʋ
Zonasə sagɩ tə bɩrɩ Yɩɩ nii sʋsʋnʋ, ʋ nə pɩ̀à sə ʋ dəri ʋ jɛ́n Yɩɩ yáá nə, ʋ nə ba pɩ̀à, sə ʋ sɛ̀ Yɩɩ nii yɩrɩ. Yìə̀n tə mama, tə nə wulə sagɩ tə wa yɩ kàrà tə pɩn. Kʋ nətʋ pɩn sagɩ tə yɩ Yɩzərayɛlə lɩ̀à wʋbʋŋa saga tə wa, sagɩ don.
Zonasə yoo tə bɩrɩ yìə̀n duən, tə nə yɩ cɩ́gá. Yɩɩ tà Yɩzərayɛlə lɩ̀à cɩcɩ ʋ swə. Ʋ swə dwìə̀ tə duən də, də ba nə jələ ʋ yoo də cɩ́gá. Máŋá mama, ʋ sɛ̀ sə ʋ kwɛ̀ yolwan, kʋ yà nə wá yí lɩ̀à, də ba nə zìlí ʋ nii, ba ga lwàń ba yʋa. Kʋ tə nə súrí lá, ʋ mʋ̀ Yɩɩ nə fwa lʋʋ mama. Ʋ mʋ̀ nə pɩn mɩɩ, ʋ ga pa tɩan də wulə. Kʋ mʋ̀ nə pɩn, Yɩɩ nii sʋsʋnʋ wà mɛ, sə ʋ bʋ́n lwanɩ, də Yɩɩ nə kwɛn lɩ̀à cʋna ʋ lɩ, ba də ʋ mʋ̀ Yɩɩ pwə́rə́ wa. Zonasə sagɩ tə, tə bɩrɩ càn tə, də də́də́ŋú tə, də bábɩ̀á tə, tə nə wàá ləzwənə bɩcan wa tə yanɩ, də Yɩɩ nə tʋn wá. Sagɩ tə bɩrɩ nəba, də Yɩɩ ba ʋ tʋntʋnʋ yá ʋ cɩcɩ, sə yìə̀n yí wá, ʋ ga ba wá yá, sə ʋ dəri ʋ jɛ́n ʋ yáá nə də. Cɩ́gá, Yɩɩ pɩ̀à sə ʋ swɩ̀n máŋá mama wa, də ʋ swə lɩ̀à tə mama.
Zwezi twá Zonasə yoo tə nə, ʋ ma swɩ̀n ʋ tɩ̀án tə, də ʋ nə wá pìí ʋ bwin tə yoo, ʋ bɩrɩ. Ʋ yà pɩ̀à, sə ʋ máŋá tə wa lɩ̀à tə lìí nətʋ, Ninivə tìán nə viviri ba kwa, ba ma sà ba cʋna. (Ywàń Matiə swapitərə 12 vɛrəse 38, kʋ va kʋ yí vɛrəse 42, də Likə swapitərə 11 vɛrəse 19, kʋ va kʋ yí vɛrəse 35).