Abədɩasə
Edomə payuu tə gwɛrʋ yoo
1
1 Abədɩasə nɩʋn.Nə̀ń kʋ tə Yuu-Tiu Ba-Yígúrə́-Jə-Tiu nə swɩ̀n,
Edomə tɩ̀án yuu wa:
Ba-Yígúrə́-Jə-Tiu pɩn nə nì ŋwɛn,
ʋ tʋn tʋntʋnʋ lʋʋ dwíə́* tə wa, ʋ wʋ́:
«Á zaŋa! Nə zaŋa nə va
nə ta kʋ̀ʋ̀ də Edoməa tɩ̀án!
2 Nə̀ń mʋ́ nə, à pɩn n jì nəmanbiə lʋʋ dwíə́ tə wa,
yá ba wá fʋfʋlɩ mʋ́ zənzən.
3 N yɩrʋ jalɩʋ tə gɩgarɩ mʋ́, kʋ dʋgʋ,
n mʋ̀ dwíí tə nə wulə pɩ̀ràn kwə̀lə́ wa,
n yipaa bwálɩ́ nə wulə baan baan,
yá n swɩ̀n n waa con, n wʋ́:
“Wàà nə wàá ʋ pɩn à cwí tɩa?”
4 N nə swə n dɩ̀ baan baan, ndə kayɩlʋ nə,
n nə swə n kə pwalʋ kacɩlacɛ tə titəŋi wa,
à tə wá zɩgɩ lá nə, à yigu mʋ́, à dɩ tɩa.
À mʋ̀ Ba-Yígúrə́-Jə-Tiu nii sʋgʋ nə!
5 Ŋwɩna nə twi n sàń tɩtɩn nə,
nə à yə̀ə́ lɩ̀à tə nə vɩrɩ wiən,
də n nə yá ba sənbwen,
kʋ tà ba wá ŋʋ mʋ́,
kʋ yí ba dɩ̀àn máŋá naaa?
Lɩ̀à tə nə pʋ̀rɩ́ divɛn tɩ̀án lənə
nə zʋa n divɛn tɩ̀án kárá wa,
ba wá ga won lá,
də kʋ nə tà wogunə naaa?
6 Nə̀ń ba nə gwìń Ezayu dwíí tə nətʋ!
Nə̀ń ba nə lɩ ba jɩjə wiən tə nə səgə,
ba kə poni nə nətʋ!
7 Ba tə mɛ yà nə yɩ n fààn lɩ̀à dɩŋɩ mʋ́
ba lɩ n lʋʋ nii sɩswɩan wa.
N tətə dabara tə nə twá ba də́ n wodiu,
twá kʋ nə, ba gɩgarɩ mʋ́ ba ja,
ndə nyalɩ nə, ba nə ken n nɛɛ də̀ń,
yá ba dàń swɩ̀n, ba wʋ́:
“Ʋ kʋ́ʋ̀ ba pubʋŋa jə!”
8 Dɩɩn təntə nə,
à wá pa Edomə tɩ̀án wʋbʋnyɩna tə nyʋn lá,
à ga pa pubʋnyɩna jɛ́n Ezayu paan tə yuu wa.
À mʋ̀ Ba-Yígúrə́-Jə-Tiu nii sʋgʋ nə!
9 Teman tɩ̀án ba, fən wá gən á kwatara babɩran tə,
sə kʋ pa ba dʋŋa gʋ Ezayu paan yuu lɩ̀à tə mama mɩ́ámɩ́án!»
Yɩzərayɛlə lɩ̀à lɛɛ tə yɩn Edomə tɩ̀án pupwən yoo
10 Ba-Yígúrə́-Jə-Tiu kʋ́ʋ̀ swɩ̀n, ʋ wʋ́:
«N dwíí tə tʋn dɩ̀àn
n nubiu Zwakɔbə dwíí tə yɩra.
Ba nə vɩrɩ ba wiən,
ba ga gʋ ba yɩrɩ, n dwíí tə wá də́ cavɩra,
yá ba wá nyʋn tɩa yuu wa mɩ́ámɩ́án.
11 Dɩɩn tə, n dwíí tə nə nan ba zɩgɩ ba ywàń,
dʋŋa ga ja Yɩzərayɛlə dwíí tə kwatara tə,
ba vələ yongaʋ,
dɩɩn tə vərə nə zʋa ba tɩʋ tə wa də dɩ̀àn,
ba dɩlɩ pwárʋ́ bɩ̀á,
ba ma tara Zwerizalɛmə tɩʋ tə,
n də yɩn ndə dʋŋa təntə don nə.
12 N dwíí tə yà wà mɛ sə ba zɩgɩ ba ywàń,
ba ga jwɛ,
dɩɩn tə nə, lɛɛ nə yí n nubiu tə dwíí tə!
Ba yà wà mɛ sə ba fwa pupwən,
dɩɩn tə nə, yobɩbɩlʋ nə tʋa Zwida bɩ̀á tə yuu wa!
Ba yà wà mɛ sə ba mʋn, ba səsee,
n nubiu tə dwíí tə pucʋnɩ dɩɩn nə!
13 N dwíí tə yà wà mɛ
sə ba zʋ à lɩ̀à tə tɩʋ tə wa,
dɩɩn tə nə, dʋŋa nə cʋ̀gʋ̀ kʋ!
Ba mʋ̀ yà wà mɛ sə ba zɩgɩ,
ba ywàń kʋ lɛɛ tə, ba ga jwɛ,
dɩɩn tə nə, dʋŋa nə cʋ̀gʋ̀ kʋ!
Yá ba yà wà mɛ sə ba dwen ba jɩjə tə yɩra,
dɩɩn tə nə, dʋŋa nə cʋ̀gʋ̀ ka!
14 N dwíí tə yà wà mɛ
sə ba nan ba zɩgɩ cajɩra wa,
ba ja n nubiu tə dwíí lɩ̀à tə nə dəri
sə ba jɛ́n tɩan yáá nə, ba gʋ,
nə à yə̀ə́ ba ja ba, ba kə ba dʋŋa jɩɩn wa,
ba jɩgwarʋ dɩɩn nə!
15 Cɩ́gá, Ba-Yígúrə́-Jə-Tiu bʋra dɩɩn tə bwə́lə́,
lʋʋ dwíə́ tə mama yɩrɩ.
Kʋ tə n nə tʋn n duən tə yɩra nə,
ba wá tʋn n də yɩra,
yá n tʋtʋnɛɛ tə yoo wá pìí kʋ tʋ n tətə yuu wa.»
Yɩzərayɛlə lɩ̀à wá fwi ba lɩŋa Edomə tɩ̀án yuu wa
16 Ba-Yígúrə́-Jə-Tiu kʋ́ʋ̀ swɩ̀n, ʋ wʋ́:
«Cɩ́gá, ndə á mʋ̀ Yɩzərayɛlə lɩ̀à nə nyʋan à lɩŋa tə,
à paan tə nə yɩ parɩ yuu wa nətʋ,
mə nətʋ nə dwíə́ nəkaran* tə mama
wá nyʋn tə wuuu, ba ba kori.
Ba wá nyʋn tə, ba lìrə̀,
yá ba wá jì ndə lɩ̀à nə,
ba nə wà lʋʋ wa yɩn mɩ́ámɩ́án.
17 Yá lɩ̀à tə nə dəri ba jɛ́n tɩan yáá nə,
wá ya Siyon paan tə yuu wa.
Ba wá ya parɩ*,
yá Zwakɔbə dìə̀* lɩ̀à tə dàń wá pìí
ba jon ba bwálá tə mama,
dʋŋa yà nə jon ba con.
18 Zwakɔbə dìə̀ tə wá ya ndə mən nə,
Zʋzɛfə dìə̀ tə ga ya ndə mənvwə nə,
yá Ezayu mʋ̀ dìə̀ tə wá ya ndə gaʋ nə!
Mən təntə wá kwé ka nə, tə də́ ka,
yá ladʋa tətə mɩɩ bá ga lʋʋ wa, Ezayu dìə̀ tə wa.
Cɩ́gá, à mʋ̀ Ba-Yígúrə́-Jə-Tiu nə swɩ̀n kʋ!»
19 Negɛbə* nagwanaa lɩ̀à wá tɩnɩ Ezayu paan tə, Swefela* nagwanaa lɩ̀à ga tɩnɩ Filisi tɩ̀án lʋʋ nii tə. Ba wá tɩnɩ Efərayimə nagwanaa tə, də Samari nagwanaa tə, yá Bɛnzwamɛn dwíí tə wá tɩnɩ Galadə nagwanaa tə.
20 Yɩzərayɛlə kwatara tə ba nə ja va yongaʋ, wá tɩnɩ Kanaan tɩ̀án lʋʋ nii tə, kʋ va kʋ yí Sarɛpəta tɩʋ tə, yá Zwerizalɛmə tɩ̀án tə ba nə ja va yongaʋ, ba nə wulə Sefaradə nə, wá tɩnɩ Negɛbə nagwanaa tɩan tə. 21 Jwənə wá dɩ̀ Siyon paan tə yuu wa, ba bʋ̀rɩ̀ Ezayu paan tə bʋra,
yá Ba-Yígúrə́-Jə-Tiu dàń nə wá də́ pàrɩ̀.