Zonasə
Zonasə vɩga sə ʋ sɛ̀ Yɩɩ nii
1
1 Ba-Yígúrə́-Jə-Tiu swìn sʋ̀ràn tətə Amɩtayɩ bìú Zonasə con, ʋ wʋ́: 2 «Zàn n va tɩfarʋ tə wa, ba nə boŋə Ninivə, n zɩrɩ n kə kʋ nə, ba tʋtʋnkʋkwɩnan tə nə dɩ̀gà tə yí à yáá con yɩrɩ.» 3 Yá Zonasə zàn, ʋ də̀rì, ʋ vələ Tarəsisə, sə ʋ jɛ́n Ba-Yígúrə́-Jə-Tiu yáá nə. Ʋ vəli Zwafa də nɩ́á yuu bori zɩga lá, kʋ vələ Tarəsisə. Zonasə ma ŋwɩ́n ʋ vəli tə səbiu, ʋ ga zʋ nɩ́á yuu bori tə, ʋ twá kʋ tɩ̀án nə, ʋ vələ Tarəsisə, sə ʋ wànɩ́ ʋ jɛ́n Ba-Yígúrə́-Jə-Tiu yáá nə. 4 Yá Ba-Yígúrə́-Jə-Tiu pɩn, vʋʋ nəfarʋ nyɩn kʋ zàn, kʋ fuli də dɩ̀àn mʋʋ tə yuu wa, kʋ pa nɩ́á yuu bori tə pɩ̀à, sə kʋ lwa. 5 Fən dàń zʋa nɩ́á yuu bori tə wa lɩ̀à tə, ba lìù mama dàń ga bubwi ʋ kə ʋ yɩɩ nə. Ba lɩ nɩ́á yuu bori tə wa zɩla tə, ba dɩ mʋʋ tə wa, sə kʋ dun tə fʋ tə mun, kʋ dàn ká cú nɩ́á də̀ń. Yá Zonasə mʋ̀ yà cúə́ nɩ́á yuu bori tə də̀ń con, ʋ tígə́, ʋ dwɛ̀ lɩ́gɩ́. 6 Nɩ́á yuu bori tə yáá tíú tə ma bà, ʋ swɩ̀n Zonasə con, ʋ wʋ́: «N mʋ̀ fwa nətə, n ma wàá n dwɛ̀? N də zàn n bubwi n kə n yɩɩ nə. Dɩɩn don, n yɩɩ tə wá də̀rì nə yinəgə, ʋ ga jon nəba.» 7 Nɩ́á yuu bori tə wa lɩ̀à tə ma swɩ̀n duən con, ba wʋ́: «Á bɩ̀án nə pwárɩ́, sə nə na lìù tə nə pɩn, basarʋ kʋ tə tʋ nə yuu wa.» Ba pwárɩ́, pwárʋ́ tə ma tʋ Zonasə yuu wa. 8 Ba dàń ma swɩ̀n ʋ con, ba wʋ́: «Bɩrɩ nəba lìù tə nə pɩn, basarʋ kʋ tə tʋ nə yuu wa. Bɛ̀ɛ̀ nə n tʋŋa? Yə̀n nə n nan? N yɩ lʋʋ nii kwà lìù. N yɩ dwíí kwà lìù?» 9 Zonasə ma le ba, ʋ wʋ́: «À yɩ Ebərə-ba dwíí tə wa lìù. À də̀rì Ba-Yígúrə́-Jə-Tiu fən. Ʋ mʋ̀ Baan Yɩɩ tə, ʋ nə fwa mʋʋ də tɩa.» 10 Zonasə nə swɩ̀n kʋ, ʋ bɩrɩ nɩ́á yuu bori tə wa lɩ̀à tə nə nətʋ, fən dàń kwɛn tə zʋ ba zənzən. Ba yà lwarɩ də Zonasə yɩ ʋ də̀rì, sə ʋ jɛ́n Ba-Yígúrə́-Jə-Tiu yáá nə. Ba dàń bwe wá, ba wʋ́: «Bɛ̀ɛ̀ nə n tʋn nətən!» 11 Vʋʋ tə yà kwɛn kʋ vuvugə mʋʋ tə zənzən. Nɩ́á yuu bori tə wa lɩ̀à tə ma ga, ba bwe Zonasə, ba wʋ́: «Bɛ̀ɛ̀ nə nə mɛ, sə nə fwa mʋ́, sə vʋʋ tə ma yá mʋʋ tə sənbwen?» 12 Zonasə le ba, ʋ wʋ́: «Á jana nə á dɩ mʋʋ tə wa, vʋʋ tə wá zɩgɩ. À yə̀ə́ də à mʋ̀ yɩrɩ nə, vʋʋ nəfarʋ kʋ tə wʋwalɩ aba.» 13 Lɩ̀à tə fwa kʋ tə mama ba nə wàá, sə ba lɩ nɩ́á yuu bori tə nɩ́á tə wa, ba kə bibiru yuu, yá ba wà wànɩ́. Vʋʋ tə yà fuli zənzən, kʋ pa ba wàrɩ̀ bwálɩ́ mama ba vəli. 14 Ba dàń bubwi ba kə Ba-Yígúrə́-Jə-Tiu nə, ba wʋ́: «Nə lòrì mʋ́, Ba-Yígúrə́-Jə-Tiu, dàn ká yá nəba, n pa nə tɩ, bɛɛ wà tə yɩrɩ. Dàn ká pa bɛɛ wà tə, ʋ nə wà nəba yoo fwa, tɩan tə yoo ya nə yuu wa. Ba-Yígúrə́-Jə-Tiu, n mʋ̀ nə tʋŋa kʋ tə nə ywán də mʋ́.» 15 Ba dàń ma ja Zonasə, ba dɩ mʋʋ tə wa, yá kʋ vuvugu tə cən kʋ zɩgɩ. 16 Ba-Yígúrə́-Jə-Tiu fən jɩn lɩ̀à tə zənzən. Ba fwa joŋi ba pa Ba-Yígúrə́-Jə-Tiu nə, ba ga poli nipwələ.