Miswe
1
1 Sʋ̀ràn tə Ba-Yígúrə́-Jə-Tiu nə swɩ̀n Miswe con, ʋ nə yɩ Moreswɛtə tíú, Zwida pɛ̀gá Yotamə, də Ahazə, də Ezekɩasə máŋá wa. Kʋ yɩ nɩʋn, Yɩɩ nə bɩrɩ Miswe nə, Samari də Zwerizalɛmə tɩan tə yuu wa.Ba-Yígúrə́-Jə-Tiu swɩ̀n ʋ zɩga ʋ lɩ̀à tə nə
2 Á cʋga, á mʋ̀ dwíə́ tə mama!
Guni n zɩɩn n ma cʋgʋ à con, n mʋ̀ tɩa tə,
də won tə mama nə wulə n wa!
Yuu-Tiu Ba-Yígúrə́-Jə-Tiu wá ya dansɩa,
ʋ zɩgɩ ʋ sàń tə wa, kʋ nə yɩ parɩ,
ʋ swɩ̀n ʋ zɩgɩ á nə!
3 Cɩ́gá, nə̀ń Ba-Yígúrə́-Jə-Tiu nə,
ʋ naŋa ʋ wúlú bwálɩ́ tə wa, ʋ cwí,
ʋ vəli tɩa yuu pɛɛn tə yuparɩ wa.
4 Pɛɛn tə nyɩnɩ ʋ nɛɛ də̀ń nə,
varɩ tə súrí duən waa,
ndə tʋ̀ràn mɔɔ nə, mən yáá con,
nə à yə̀ə́ ndə nɩ́á nə pàlɩ̀ də dɩ̀àn, zizinu wa.
5 Yá kʋ mama yɩ Zwakɔbə cʋna tə yɩrɩ,
Yɩzərayɛlə dìə̀ tə lwanɩ tə yɩrɩ!
Wàà nə pɩn Zwakɔbə dwíí tə tʋŋa cʋna?
Kʋ tà Samari tɩ̀án naaa?
Wàà nə pɩn jwəŋə dədwələn wulə
Zwida lʋʋ nii tə wa?
Kʋ tà Zwerizalɛmə tɩ̀án naaa?
6 Kʋ mʋ̀ yɩrɩ, à wá pa
Samari jì kapana púlí, kárɩ́ tə wa,
sə ba ma cwɛn divɛn tɩ̀án,
à wá yigu kʋ kapana tə,
ba nə zɩ̀n ba zɩgɩ yɩɩ nə,
à lwá vara tə wa,
à wá pa kʋ dəkuu nyɩn poni nə.
7 Kʋ woŋwanan tə mama ba nə sə̀ wá pʋpʋgʋ,
à wá sʋ̀rɩ́ tə ŋwɩ́rán tə nə yɩ durən tə,
yá à wá gwɛrɩ tə woŋwanan tə mama,
ba nə twá cwàrʋ̀ ŋwɩ́rán nə, ba ma na tə,
kʋ wá pìí kʋ jì cwàrʋ̀ ŋwɩ́rán.
Lɛɛ yí Zwerizalɛmə
8 Kʋ mʋ̀ nə pɩn,
à mʋ̀ Miswe wá dɩ lúə́ pucʋnɩ gwaran,
à ga mà bubwiə tantan.
À wá va napɩrɩ sòlí də yaswələ,
à ga cə̀rí ndə cirəkurə nə,
yá à nɩ́ ndə taataa nə.
9 Cɩ́gá, Samari nʋʋ tə wàrɩ̀ kʋ zuri,
kʋ larɩ kʋ yí Zwida lʋʋ nii wa,
Kʋ yí à lalʋʋ tə mimii,
kʋ yí Zwerizalɛmə.
10 Á dànà ká bòrì kʋ Gatə tɩʋ tə wa,
Á dànà ká kwi Ako tɩʋ tə wa!
À bibili pùrú wa, Bɛtə-Leyafəra nə.
11 Swafirə tɩ̀án-ba, á kɛna də yaswələ, də cavɩra!
Sanan tɩ̀án-ba, á nə kwàá, sə á nan kàrá,
Bɛtə-Esɛlə tɩ̀án lúə́ pucʋnɩ gwaran tə pɩn,
ba vwəŋə aba ba sáŋʋ́.
12 Marɔtə tɩ̀án yɩ ba vɩvaga, ba ywánɩ́ yɩrɩ.
Cɩ́gá, lɛɛ nan Ba-Yígúrə́-Jə-Tiu con,
tə cú tə yí Zwerizalɛmə mimii.
13 Á kənə səsen korən səsen nə,
Lakiswə tɩ̀án-ba!
Á mʋ̀ nə tún lwanɩ dəkuu,
á pa Siyon bʋ̀á tə nəa.
Cɩ́gá, á mʋ̀ con nə ba nɩ Yɩzərayɛlə lɩ̀à cʋna tə.
14 Kʋ mʋ̀ nə pɩn,
á wá pwɛ̀ á tɩ̀àn də Moreswɛtə-Gatə tɩ̀án.
Akəzibə tɩ̀án dìì tə wá ya gɩgara,
tə pa Yɩzərayɛlə pɛ̀gá nə.
15 À kʋ́ʋ̀ wá ja ladʋrʋ à bà,
sə ʋ də́ dɩ̀àn á yuu wa, Mareswa tɩ̀án-ba.
Yɩzərayɛlə dun tə wá va tə səgə Adulamə nə.
16 Á fɩna á yuu, á gana á yukʋran,
á bɩ̀á tə yɩrɩ, á nə swə!
Á pàrá yukolu, ndə dəlu nə,
cɩ́gá, á bɩ̀á tə yɩ ba ja vələ yongaʋ,
kʋ bwálɩ́ nə ŋʋ́ná də aba!