Lɩ̀à tə nə fɩfɩn lɩ̀à də dɩ̀àn tə ba nə jə
2
1 Nə̀ń kʋ lɛɛ nyɩɛn nʋ̀ʋ̀, kʋ pa lɩ̀à tə nə,ba nə tanɩ wʋlʋŋʋ pubʋŋɩ,
yá ba sapaa wa, ba mà sawara,
sə ba tʋn yolwan!
Tɩbɩlakʋnʋ wa, ba yàá tʋn kʋ, kʋ nii sú,
də ba nə jə kʋ dɩ̀àn.
2 Ba yii yàá zʋ kárɩ́,
yá ba vɩrɩ tə, tə tɩ̀án con,
nə à yə̀ə́ dìì, yá ba jon tə, tə tɩ̀án con.
Ba tʋŋa dɩ̀àn dìì tɩ̀án yɩra,
ba joŋə ba dìì, də ba tɩɩ.
3 Kʋ mʋ̀ nə pɩn,
Ba-Yígúrə́-Jə-Tiu swɩ̀n, ʋ wʋ́:
«À wulə à tanɩ lɛɛ,
sə à kə ləzwənyirə təntə nə.
Á bá wànɩ́ tə yáá nə, á jɛ́n,
yá á bá wànɩ́ á zɩ̀n á yuu yɩɩ nə, á ma va.
Cɩ́gá, kʋ yɩ lɛɛ máŋá.»
4 Kʋ dɩɩn təntə nə, á wá jì yomaŋʋ,
yá ba wá dɩ lúə́ pucʋnɩ gwaran tə tə, ba wʋ́:
«Nə̀ń nəba nə, ba cʋ̀gʋ̀ nəba mɩ́ámɩ́án!
Ba-Yígúrə́-Jə-Tiu pɩn
nə lɩ̀à tə kwɩ̀n tɩa tə nə, ka nə yɩ ba tori!
Kʋ twá nətə, ʋ ma joŋə ka nə con!
Ʋ tarɩ nə kárɩ́ tə, ʋ pa zɩbanənyɩna nə!»
5 Kʋ mʋ̀ nə pɩn,
á lìù mama bá na tori tɩa tə wa,
Ba-Yígúrə́-Jə-Tiu lɩ̀à tə nə wá tara.
Lɩ̀à tə nə tɛ́n Yɩɩ nii sʋ̀sʋ̀nʋ̀ tə sʋ̀ràn tə
6 Lɩ̀à duən swɩ̀n sʋvɛɛ, ba wʋ́:
«Yá n sʋvɛɛ tə nə!»
Á yágá á sʋvɛɛ yiri təntə nə!
Á latʋra ba zwɛ̀!
7 Mə nətʋ nə á wá swɩ̀n, Zwakɔbə dìə̀ lɩ̀à-ba?
Á swɩ̀n, á wʋ́:
«Ba-Yígúrə́-Jə-Tiu ba pɩ́nʋ́ jə naaa?
Mə nətʋ nə ʋ tʋŋa naaa?»
À sʋ̀ràn tə ba ywàń tə pa lìù tə nə,
ʋ nə vəli mənəmənə naaa?
8 Á nəŋə yoo tə,
Ba-Yígúrə́-Jə-Tiu nə swɩ̀n á con:
«Dɩ̀ɩ̀n nə, á yɩn à lɩ̀à tə dʋŋa, á zɩgɩ ba nə.
Ba tə nə pìí ba nan kʋ̀ʋ̀ ba bɩ̀àn də yazurə,
á kʋ̀rɩ̀ ba ganzwɩfarʋ tə,
ba nə zʋa ba dà ba gànàn yuu.
9 Á dɩŋɩ à lɩ̀à tə kana á lɩ ba dìì wa,
ba yà nə swə də ba waa mama.
Dun tə à nə pɩn ba bɩ̀á nə,
sə ba ya à mʋ̀ nyiən,
á jon tə ba con mɩ́ámɩ́án.
10 Zaŋa á va!
Cɩ́gá, bwálɩ́ kʋ tə tà sìə́ bwálɩ́.
Durən tə nə wulə kʋ wa,
wá ja càn kʋ bà,
càn tə nə lwara zənzən.»
11 Lìù nə ywan ʋ bà,
ʋ kʋ̀nà kʋ̀nkʋ̀n, ʋ bɩrɩ aba, ʋ wʋ́:
«Á wá nyʋn divɛn, də sana tə nə dà, á sú!»
Mə sʋvɛɛ sʋ̀sʋ̀nʋ̀ təntə yiri nə mɛ də lɩ̀à ba tə!
12 Ba-Yígúrə́-Jə-Tiu swɩ̀n, ʋ wʋ́:
«À cɩ́gá wá kə á mama duən yáá, Zwakɔbə dwíí-ba!
À cɩ́gá wá kə Yɩzərayɛlə lɩ̀à gɩganɩ* tə duən yáá!
À wá ja ba à bà duən yáá,
ndə patuu nədʋ pee nə,
nə à yə̀ə́ ndə pee nə, vàná gaʋ wa.
Yá ba wá ya ləlʋʋ kapʋpʋ.»
13 Lìù tə ʋ nə súrí cwəŋə,
wulə ba yáá, ʋ vəli.
Ba súrí cwəŋə,
ba twá mimii ba nan.
Ba-Yígúrə́-Jə-Tiu nə yɩ ba pɩ̀ʋ́,
ʋ wulə ba yáá, ʋ bɩrɩ ba cwəŋə.