Bɛtəleyɛmə yɩ pɩ̀ʋ́ tə nə yɩ jonu tɩʋ
5
1 Yá n mʋ́, Bɛtəleyɛmə Efərata,n mʋ̀ nə mun Zwida dwíí tɩan tə wa,
yá n mʋ̀ wa nə, à lìù tə wá nan,
ʋ də́ pàrɩ̀ Yɩzərayɛlə lɩ̀à yuu wa.
Ʋ dəkuu yɩ kʋ nan dí yáá lʋʋ tə wa,
máŋá wa, ka nə ba yigə.
2 Kʋ mʋ̀ nə pɩn,
ʋ wá ja Yɩzərayɛlə lɩ̀à,
ʋ pa ba dʋŋa nə,
kʋ va kʋ yí máŋá tə,
kan tə nə mɛ sə ʋ lɩra, nə wá lɩra.
Yá ʋ nubɩa tə gɩganɩ* dàń wá pìí
ba bà Yɩzərayɛlə lɩ̀à tə duən tə con.
3 Ʋ wá zàn ʋ zɩgɩ, ʋ yɩ̀rɩ̀ ba,
də Ba-Yígúrə́-Jə-Tiu dɩ̀àn,
də Ba-Yígúrə́-Jə-Tiu, ʋ Yɩɩ tə pàrɩ̀ dun tə.
Yá ʋ dwíí lɩ̀à tə dàń wá jə̀ń də yazurə,
ʋ nə nɩ dun, kʋ nə zɩgɩ sɩ́ʋ́n nə,
kʋ ja va kʋ yí tɩa nii yígúrə́ wa yɩrɩ.
4 Ʋ mʋ̀ nə wá ya sìə́ lìù!
Máŋá tə Asiiri tɩ̀án nə twi nə lʋʋ nii tə wa,
yá ba nɩŋa ba nɛɛ nə padii tə wa,
nə wá sugu payɩra barpɛ,
nə à yə̀ə́ lalʋʋ tə pàbɩ̀á nana, nə kə ba nə.
5 Ba wá də́ pàrɩ̀ Asiiri lʋʋ nii tə yuu wa də kwatara sɩ̀ʋ́,
ba wá zʋ Nimərodə lʋʋ nii tə mimien wa də dɩ̀àn.
Mə kʋ wá twá nətʋ,
ʋ ma jon nəba Asiiri tɩ̀án jɩɩn wa,
máŋá tə wa ba nə twi nə lʋʋ nii tə wa,
yá ba nɩŋa ba nɛɛ nə tɩa tə yuu wa.
Yɩzərayɛlə lɩ̀à gɩganɩ* tə nə wulə dwíə́ nəkaran* tə wa
6 Lalʋʋ kapʋpʋ tə titəŋi wa,
Zwakɔbə dwíí gɩganɩ tə wá ya ndə nyʋ̀nʋ̀ nə,
kʋ nə nan Ba-Yígúrə́-Jə-Tiu con kʋ bà.
Ba wá ya ndə dwà nɩ́á nə, gaʋ yuu wa,
kʋ nə ba ləzwənə yuu wa jələ,
kʋ ma ba won mama yala jə ləzwəni con.
7 Zwakɔbə dwíí gɩganɩ tə wá ya dwíə́ nəkaran tə wa,
lalʋʋ kapʋpʋ tə titəŋi wa,
ndə gəru nə, ganaŋa titəŋi wa,
ndə gəbala nə, vanmɩnɩ titəŋi wa.
Kʋ nə kɛ̀ń, kʋ yàá tɩtaga,
kʋ ga van kʋ vuri,
yá lìù mama wàrɩ̀ ʋ joŋə.
8 Zɩ̀n n jɩɩn, n ma ta n jarɩduən,
n ga gʋ n dʋŋa mama mɩ́ámɩ́án!
Ba-Yígúrə́-Jə-Tiu wá pa kʋ̀nkʋ̀n sáŋʋ́ tə nyʋn lá
9 Ba-Yígúrə́-Jə-Tiu swɩ̀n,ʋ wʋ́:
«Kʋ máŋá təntə wa, à wá pa
n səsen tə tɩ, tə zwɛ̀ mɩ́ámɩ́án,
à ga pa n səsen kòrə̀n tə cʋ̀gʋ̀ mɩ́ámɩ́án.
À mʋ̀ Ba-Yígúrə́-Jə-Tiu nii sʋgʋ nə!
10 À wá cʋ̀gʋ̀ n lʋʋ nii tɩan tə mɩ́ámɩ́án,
à ga gwɛrɩ n dɩ̀àn dəkuu bwálá tə mama.
11 À wá lɩ cɩrɩ tʋtʋnɛɛ tə n jɩɩn wa,
yá lìù kʋ́ʋ̀ bá ya n con,
ʋ twarɩ mɩmɩnan, ʋ ma lwarɩ yìə̀n
12 À wá lɩ n woŋwanan tə, ba nə sə̀,
də n culu kapana* tə, ba nə zɩ̀n ba zɩgɩ yɩɩ nə,
yá n kʋ́ʋ̀ bá tʋ n nadwana yuu,
wiən tə yáá con, n nə fwa də n jɩ̀àn, n pa tə dun.
13 À wá mùrí Aswera* daceli tə nə wulə n con,
à ga cʋ̀gʋ̀ n tɩan tə.
14 À wá ja à lɩŋa nə zàn tə pupwin,
à ma fwi à lɩŋa dwíə́ nəkaran* tə yuu wa,
ba nə wà à nii sɛ̀ yɩrɩ.»