Ba-Yígúrə́-Jə-Tiu swɩ̀n ʋ zɩga ʋ lalʋʋ tə nə
6
1 Á lòrì aba sə á cʋgʋ kʋ tə Ba-Yígúrə́-Jə-Tiu nə swɩ̀n:
«Zàn yɩɩ nə,
n swɩ̀n n zɩgɩ à lɩ̀à tə nə, pɛɛn tə yáá con,
sə dədwələn tə ga nì n kori!»
2 Á dàń cʋga, pɛɛn-ba,
də tɩa dəkurən tə nə wàrɩ̀ tə gùrì!
Á cʋga Ba-Yígúrə́-Jə-Tiu nə swɩ̀n,
ʋ zɩga ʋ lɩ̀à tə nə!
Váŋʋ́ wulə ʋ də Yɩzərayɛlə lɩ̀à pwə́rə́ wa.
3 Ʋ swɩ̀n, ʋ wʋ́:
«À lɩ̀à-ba, bɛ̀ɛ̀ nə à ma fwa aba?
Bɛ̀ɛ̀ yoo nə à ma wʋwalɩ aba?
Á lie nə!
4 Cɩ́gá, à pɩn á nan Ezwipətə lʋʋ nii tə wa,
à lɩ aba ywə́ŋə́ dìə̀ wa,
yá à ken Moyizə, də Aron, də Miriyamə
á yáá, sə ba bɩrɩ aba cwəŋə.
5 À lɩ̀à-ba, à lòrì aba, sə á lìí á tɩ̀àn yoo tə,
Mʋabə pɩ̀ʋ́ Balakə yà nə tanɩ, sə ʋ ma tʋn aba,
də kʋ tə Bewɔrə bìú Balamə nə le wá,
də nətʋ tə, à nə pɩn á nan Switimə nə,
á va á yí Giləgalə,
yá á dàń wá lwarɩ də,
Ba-Yígúrə́-Jə-Tiu tʋtʋnɛɛ tə tì cɩ́gá cwəŋə.»
Kʋ tə Ba-Yígúrə́-Jə-Tiu nə pɩ̀à sə ləzwənə tʋn
6 Á bwe á tɩ̀àn, á wʋ́:
«Bɛ̀ɛ̀ nə à wá ja va Ba-Yígúrə́-Jə-Tiu yáá con?
Bɛ̀ɛ̀ nə à wá ja tʋ Baan Yɩɩ yáá con, à pa wá dun?
Kʋ yɩ bɩnɩ nədʋ nàtànɩ́ nə, à wá ja va,
à ma fwa jwəŋə tə ba nə sʋ̀rɩ́* naaa?
7 Ba-Yígúrə́-Jə-Tiu wá sɛ̀, ʋ jon pabɩran mʋ̀rʋ̀ kapʋpʋ,
də nwɩɩ mʋ̀rʋ̀ dəkurən mʋ̀rʋ̀ kapʋpʋ* naaa?
À bikwɩa nə à mɛ sə à pa, à cʋna tə yɩrɩ naaa?
À kwíə́ də̀ń bìú nə à mɛ sə à pa, à lwanɩ tə yɩrɩ naaa?»
8 Ba-Yígúrə́-Jə-Tiu pɩn n mʋ̀ ləzwənə lwarɩ
kʋ tə nə ziən.
Yá kʋ tə Ba-Yígúrə́-Jə-Tiu nə pɩ̀à sə n tʋn,
kʋ yɩ sə n tʋn kʋ tə nə tì cɩ́gá cwəŋə,
sə n sóní ka tʋn wʋywaŋʋ*,
n ga mun n tɩ̀àn, n ma twá n tíú Yɩɩ nə.
Ba-Yígúrə́-Jə-Tiu wá van gɩgɩrɩnyɩna də wʋlʋnyɩna zɩɩn nə
9 Ba-Yígúrə́-Jə-Tiu cə̀rí ʋ kəni tɩʋ tə nə,
yá wʋbʋnyiən nə wulə lá,
ʋ wá dəri Ba-Yígúrə́-Jə-Tiu fən.
Á cʋga càn tə yoo, ba nə bòrì,
də lìù tə nə pɩn nii, sə tə yí aba!
10 Jɩjə wiən tə wulə wʋlʋnyiən dìə̀ wa,
ʋ nə wà cɩ́gá cwəŋə tì ʋ ma na tə,
də maŋʋ tiə* tə nə mun,
kʋ pa ka zɩ̀n lɩŋa naaa?
11 Kʋ wà mɛ sə à caga lɩ̀à tə nii nə,
ba nə tʋŋa də ŋwɩ̀rɩ̀ səkəri,
də gɩgɩra səkəri bɩ̀á, ba nə ken ganlɔɔ wa,
ba ma dwɛ́ lɩ̀à naaa?
12 Tɩʋ tə jɩjə tɩ̀án tə swə ka vɩrɩ lɩ̀à,
kʋ wa lɩ̀à tə swə ka kʋ̀nà kʋ̀nkʋ̀n,
yá ba nəndəli tə nə wulə ba nii wa,
yɩ ba ma gɩgɩrɩ lɩ̀à.
13 Kʋ mʋ̀ nə pɩn, à sinti à mà aba,
à pɩn càn yí aba,
yá à wá cʋ̀gʋ̀ aba, á cʋna tə yɩrɩ.
14 Á wá də́, yá á bá sú,
yá niən wá ja aba, máŋá mama!
Á wá cɩ̀ wiən nə, á tún vàn nə,
yá á bá wànɩ́ tə yuu nə á ywàń.
Kʋ tə á nə wá səgə,
à wá lɩ kʋ, à kə poni nə,
à pa kwatara sɩ̀ʋ́ cʋ̀gʋ̀.
15 Á wá dù, yá á bá ca.
Á wá kàŋà olivə* tɩ̀án bɩ̀á,
yá á bá tùrì nʋga.
Á wá kàŋà divɛn tɩ̀án bɩ̀á,
yá á bá nyʋn divɛn.
16 Pɩ̀ʋ́ Oməri yokʋkwɩnan tə nii nə á zìlí,
yá á twá Akabə dìə̀ tə tʋtʋnkʋkwɩnan tə mama nə,
á ga joŋə ba kwìə̀.
Kʋ mʋ̀ nə pɩn, à wá kə cʋcʋran tɩʋ tə wa,
à ga pa á mʋ̀ lɩ̀à tə nə wulə kʋ wa,
jì lɩ̀à ba nə cʋcwɩ,
yá á mʋ̀ dàń nə wá zɩn à lɩ̀à tə cavɩra tə.