Ləzwəntəgətəgə kʋ́ʋ̀ tə̀lə́
7
1 Lɛɛ yí nə!Cɩ́gá, à yɩ ndə lìù nə,
ʋ nə nan sə ʋ kwa tɩ̀án lənə,
ndə lìù nə, ʋ nə nan
sə ʋ gun divɛn tɩ̀án bɩ̀á, tə pʋ̀rʋ́ kwa nə:
Divɛn tɩ̀án bìú mama kʋ́ʋ̀ tə̀lə́ kʋ də́,
təntən kapɩra yàá nə jə fɩra tə pa nə,
nədʋ tətə kʋ́ʋ̀ tə̀lə́.
2 Pùə́ nədʋ tɩ̀án jɛ́n lʋʋ nii tə wa,
yá ləzwəntəgətəgə də kʋ́ʋ̀ tə̀lə́.
Ba mama yɩ ba səgə, sə ba lwá lɩ̀à jana,
lìù mama kəni nyalɩ, ʋ don nɛɛ də̀ń nə.
3 Ba jɩ̀àn mɩ̀n ka tʋn lwanɩ.
Yáá tíú kalɩ lɩ̀à,
lìù tə nə bʋ̀rɩ̀ bʋra də́ vuŋə,
ləzwənfarʋ bɩrɩ ʋ wʋkoru,
yá ba mama jə nimarʋ.
4 Ba wa lìù tə nə kʋ́kwà, yɩ ndə gəlu nə,
yá ba ləzwəntəgətəgə càn dwə səni.
Máŋá tə Yɩɩ nii sʋ̀sʋ̀nà tə nə swɩ̀n ka yoo
á con tə yí, sə Yɩɩ kə aba càn wa.
Yá sɩ́ʋ́n nə, kʋ dàń wá ya viviru, kʋ pa aba.
5 Á dànà ká jələ á dabɛɛ yuu wa,
á dànà ká ja á fàrʋ̀ dɩ̀àn.
Á lìù mama ja ʋ nii də ʋ sapaa kan tə də tətə.
6 Cɩ́gá, bìú muŋə nyɩna,
bʋ̀á nyɩ̀ń ʋ zɩga ʋ nuu nə,
bikɩnɩ zɩga ʋ barɩ nuu nə.
Lìù mama dìə̀ lɩ̀à nə pìí ba jì ʋ dʋŋa.
7 Yá à mʋ̀ yɩ Ba-Yígúrə́-Jə-Tiu yáá wa nə, à ywàŋá,
à wá kə à yala Yɩɩ tə nə, ʋ nə yɩ à jonu,
yá à tíú Yɩɩ wá le nə.
Lalʋʋ tə yala, də ba yɩjʋnɩ
8 Á dànà ká kə sisiu nə də̀ń nə, nə dʋŋa-ba!
Cɩ́gá, nə nə swə nə tʋ də,
nə tə wá pìí nə zàn.
Nə nə swə nə jə̀ə́ yikunu wa,
Ba-Yígúrə́-Jə-Tiu yɩ nə poni.
9 Nə wá pɩ́án Ba-Yígúrə́-Jə-Tiu lɩŋa tə
nə zaŋa nə yuu wa,
nə nə tʋn cʋna nə zɩgɩ ʋ nə yɩrɩ.
Yá máŋá don wa, ʋ wá ta nə kʋ̀ʋ̀,
ʋ ga bʋ̀rɩ̀ ʋ pa nəba cɩ́gá.
Ʋ wá pa nə nan poni wa,
ʋ ga pa nə na ʋ cɩ́gá cwəŋə tə.
10 Nə dʋŋa wá na kʋ nətʋ tə,
yá kʋ wá ya cavɩra nəfarʋ, kʋ pa ba,
ba mʋ̀ lɩ̀à tə yà nə swɩ̀n nə con, ba wʋ́:
«Ba-Yígúrə́-Jə-Tiu, á tíú Yɩɩ tə wulə yìə̀n nə?»
Ba dʋŋa wá nɩŋa ba də nɛɛ,
ndə tɩtaran nə, coŋi yuu wa,
yá ba wá jì wobalʋ,
ba pa nəba, nə ywàŋá.
11 Máŋá bɩ̀àn, ba nə wá pìí ba lwà á tɩʋ tə bírí tə,
yá kʋ máŋá tə wa, ba wá wàlɩ̀ á sɩswɩan tə.
12 Kʋ máŋá tə wa, lɩ̀à wá nan Asiiri lʋʋ nii,
də Ezwipətə tɩan tə wa, ba bà á con,
kʋ nə zɩgɩ Nilə mʋnaa tə nə,
kʋ va kʋ nan Əfəratə mʋnaa tə nə,
kʋ nə zɩgɩ mʋʋ don nə,
kʋ va kʋ nan kʋ don nə,
kʋ nə zɩgɩ paan don nə,
kʋ va kʋ nan ka don nə.
13 Tɩa tə gɩganɩ tə wá cʋ̀gʋ̀,
ka yuu lɩ̀à tə tʋtʋnɛɛ nə lwara yɩrɩ.
14 Ba-Yígúrə́-Jə-Tiu, ja payɩra dadɩlʋ tə,
n ma yɩ̀rɩ̀ n lɩ̀à tə.
N mʋ̀ nə tɩ ba, ndə n patuu pee nə!
Ba wulə ba cɩcɩ, pún wa,
vàná gaʋ titəŋi wa!
Yɩrɩ ba Baswan də Galadə vàná gaʋ tə wa,
ndə kʋ yà nə yɩ nətʋ fuən nə.
15 Ba-Yígúrə́-Jə-Tiu swɩ̀n, ʋ wʋ́:
«À wá tʋn yogwaran, à pa aba,
ndə à nə tʋn nətʋ, máŋá tə wa,
á nə nan Ezwipətə lʋʋ nii tə wa.»
16 Dwíə́ nəkaran* tə wá na kʋ,
yá cavɩra wá zʋ ba,
də ba jə dɩ̀àn tə mɛ.
Ba wá ja ba nii nə,
ba zɩan ga bwɩn.
17 Ba wá dàlà pùrú, ndə dən nə,
ndə tɩa yuu wiən tə nə, tə nə vəli tə pùə́ baan.
Ba wá nan ba dɩ̀àn dəkuu bwálá wa, də ba vɩvaga,
ba bà Ba-Yígúrə́-Jə-Tiu, nə tíú Yɩɩ con.
Fən wá zʋ ba, yá ba wá dəri n fən.
18 Wàà nə yɩ Yɩɩ ndə n nə?
N yá yolwan, n pɩn kʋ zwɛ̀,
n ga kwɛn cʋna n lɩ,
nə mʋ̀ n lalʋʋ tə gɩganɩ* tə yɩrɩ,
nə nə yɩ n tori!
N ba yá n pɩn n lɩŋa zaŋa wuuu,
n nə swə ka tʋn wʋywaŋʋ* yɩrɩ.
19 N kʋ́ʋ̀ wá dəri nə yinəgə,
n wá jələ nə yolwana tə,
ndə yotɔɔ nə, n nɛɛ də̀ń nə,
yá n wá dɩlɩ tə mama mʋʋ də̀ń nə.
20 N wá bɩrɩ Zwakɔbə dwíí tə nə,
də n yɩ pùə́ nədʋ tíú,
n ga tʋn wʋywaŋʋ Abərahamə dwíí tə yɩra,
ndə n nə dùə̀, n ma swɩ̀n kʋ
nə nɩbara-ba con, máŋá wa ka nə kɛ̀ń.