Zonasə pucʋnɩ tə də ʋ ŋʋŋwɩan tə yoo
4
1 Kʋ nətʋ tə cʋ̀gʋ̀ Zonasə pùə́ nə zənzən, yá ʋ lɩŋa ga zàn. 2 Ʋ dàń jʋn Ba-Yígúrə́-Jə-Tiu, ʋ wʋ́: «Ba-Yígúrə́-Jə-Tiu, kʋ tà kʋ mʋ̀ nə à swɩ̀n, də à tə wulə à lʋʋ nii tə wa? Kʋ mʋ̀ nii nə nə à yə̀ə́, à yà ma də̀rì, à vələ Tarəsisə. À yə̀ə́ də n yɩ Yɩɩ tə, n nə yɩ pubwanʋ tíú, n də̀rì ləzoni yinəgə. N wʋywaŋʋ tə dáá zənzən, n lɩŋa ba zaŋa lala. Lɩ̀à nə viviri ba kwa, ba ma sà ba cʋna, n yàá kʋ́ʋ̀ ba sɛ̀, n ŋwɩ́n tə jɩŋɩ, ba yɩra. 3 Kʋ mʋ̀ yɩrɩ, sɩ́ʋ́n kʋ tə, Ba-Yígúrə́-Jə-Tiu, à lòrì mʋ́, sə n tì à mɩɩ tə. Cɩ́gá, à tɩan kʋ́kwà à lʋʋ yanʋ.»Yɩɩ caga Zonasə nii nə
4 Ba-Yígúrə́-Jə-Tiu bwe Zonasə, ʋ wʋ́: «N bʋŋa də n jə cɩ́gá, sə n lɩŋa zàn naaa?» 5 Zonasə dàń nan tɩʋ tə wa, ʋ va ʋ jə̀ə́ kʋ yɩɩ yipɩan con. Ʋ púə́ sìlí lá nə, ʋ jə̀ə́ kʋ də̀ń ywárɩ́ wa, ʋ dànɩ̀, sə ʋ jən, won tə nə wá tʋn tɩʋ tə wa. 6 Ba-Yígúrə́-Jə-Tiu pɩn tɩ̀ʋ́ nəmanbiə nan, ka fwà ywárɩ́, ka kwálɩ́ Zonasə yuu nə, sə ka wànɩ́ ka lɩ wá, ʋ pucʋnɩ tə wa. Tɩ̀ʋ́ təntə pɩn Zonasə pùə́ poli zənzən. 7 Yá kʋ tɩpʋrɩ nə, tɩbɩlakʋnʋ wa, Yɩɩ pɩn zʋnzʋgʋ də́ tɩ̀ʋ́ tə, kʋ gʋ. 8 Yɩcaʋ nə pɛ́n máŋá tə wa, Yɩɩ pɩn vʋʋ, kʋ nə jə bárí, nan yɩɩ yipɩan con, kʋ bà kʋ fuli. Yɩcaʋ tə dàń mà Zonasə yuu nə, kʋ pa ʋ jɛ. Ʋ yà swə də ʋ nə tɩga. Ʋ swɩ̀n, ʋ wʋ́: «À tɩan kʋ́kwà à lʋʋ yanʋ.» 9 Yá Yɩɩ swɩ̀n Zonasə con, ʋ wʋ́: «N bʋŋa də n jə cɩ́gá, sə n lɩŋa zàn tɩ̀ʋ́ tə yɩrɩ naaa?» Ʋ le, ʋ wʋ́: «À jə cɩ́gá, sə à lɩŋa zàn. À lɩŋa zàn zənzən, kʋ pa à na də, à tɩan kʋ́kwà à lʋʋ yanʋ.» 10 Ba-Yígúrə́-Jə-Tiu dàń swɩ̀n, ʋ wʋ́: «Tɩ̀ʋ́ nəmanbiə təntə yinəgə jə mʋ́, yá ka tà n mʋ̀ nə cwɛn ka. Ka tà n mʋ̀ nə pɩn, ka bori. Kʋ yɩ ka nan tɩtɩn nədʋ wa, ka ga tɩ tɩtɩn tə wa, kʋ nə danɩ lá. 11 Sə à mʋ̀, Ninivə tɩfarʋ təntə, yinəgə wà mɛ, sə kʋ ja nə, naaa? Lɩ̀à tə nə wulə kʋ wa, dwə mʋ̀rʋ̀ bíí də sapʋa, ba nə yəri ba jɩzən, də ba jɩgwiə swɩ́án dwən wa. a Vàná zənzən də ga wulə lá.»