Zonasə 3

Zonasə swɩ̀n Yɩɩ sʋgʋ Ninivə nə

1 Ba-Yígúrə́-Jə-Tiu kʋ́ʋ̀ bwɛ́, ʋ swɩ̀n Zonasə con, nɛɛ bələ nii nə, ʋ wʋ́: 2 «Zàn n va tɩfarʋ tə wa, ba nə boŋə Ninivə, n zɩrɩ n kə kʋ nə, ndə à nə dí yáá à swɩ̀n n con nətʋ.» 3 Zonasə dàń sɛ̀ Ba-Yígúrə́-Jə-Tiu nii, ʋ ga zàn, ʋ va Ninivə. Ninivə yà yɩ tɩʋ kʋ nə dáá zənzən. Dɩan batwa nə kʋ yàá tì, sə lìù ma jijiri kʋ waa. 4 Təntən dɩɩn tə nə, Zonasə jijiri tɩʋ tə wa, ʋ zɩrɩ ʋ kə kʋ nə, ʋ wʋ́: «Yəbə də dɩan sapwɩlə, Yɩɩ wá cʋ̀gʋ̀ Ninivə tɩʋ tə.»

Ninivə tɩ̀án viviri ba kwa, ba ma sà ba cʋna

5 Ninivə tɩ̀án ken ba waa Yɩɩ nə. Kʋ nə zɩgɩ ba ləzwənfaran, kʋ va kʋ yí ba ləzwənbìí, ba ken nii nədʋ, ba vwə ba niə, ba ga ja gànlwaran, ba pipini ba tɩ̀àn. 6 Ninivə pɩ̀ʋ́ tə nə nì ŋwɛn, də yəbə də dɩan sapwɩlə, Yɩɩ wá cʋ̀gʋ̀ Ninivə, ʋ zàn ʋ padaʋ tə yuu, ʋ lɩ ʋ kàsɔ́, ʋ ja gànlɔɔ, ʋ pipini ʋ tɩ̀àn, ʋ ga jə̀ə́ tʋnan wa.\f + 3.6 Lìù nə pipini ʋ tɩ̀àn də gànlɔɔ, ʋ ga jə̀ə́ tʋnan wa, kʋ pɩ̀à kʋ bɩrɩ də ʋ wulə pʋcʋnɩ wa 7 Pɩ̀ʋ́ tə pɩn, ba bòrì Ninivə wa, ba swɩ̀n, ba wʋ́: «Kʋ tə yɩ pɩ̀ʋ́ də ʋ kwa lɩ̀à tə kori: Ləzoni tə dànà ká də́, ba dànà ká nyʋ. Ba dànà ká pa vàná tə də də́, nə à yə̀ə́, tə nyʋ. Kʋ mɛ, sə kʋ ya nətʋ, vanmɩnɩ də vanfaran mama yɩra. 8 Ləzoni tə mɛ, sə ba ja gànlwaran, ba pipini ba tɩ̀àn, ba ga pipini vàná tə də, də gànlwaran. Ba mɛ, sə ba bubwi zənzən, ba kə Yɩɩ nə. Sə lìù mama ga viviri ʋ kwa, ʋ ma sà ʋ tʋtʋnkʋkwɩnan tə, ʋ ga lɩ ʋ jɩ̀àn wʋlʋŋʋ tʋ̀tʋ̀nán tə wa. 9 Dɩɩn don, Yɩɩ lɩŋa wá tʋ, ʋ də̀rì nə yinəgə, ʋ lwàń ʋ pʋbʋŋa, yá ʋ ga jon nəba.» 10 Yɩɩ nɩ nətʋ tə, Ninivə tɩ̀án nə fwa. Ʋ nɩ də ba viviri ba kwa, ba ma sà ba tʋtʋnkʋkwɩnan tə. Yá Yɩɩ dàń də̀rì ba yinəgə. Ʋ kʋ́ʋ̀ wà ba cʋ̀gʋ̀.