Lagʋrɩ tʋa lagʋra tɩʋ tə wa
3
1 Nə̀ń kʋ lɛɛ nyɩɛn nʋ̀ʋ̀, kʋ pa lagʋra tɩʋ tə nə!Kʋ súə́ də kʋ̀nkʋ̀n yìə̀n, də wʋlʋŋʋ,
vɩra də ga ba kʋ wa zwɛ̀!
2 Cʋga tanpɩrɩ kori,
də səsen kòrə̀n nɛɛ dwana!
Səsen pàrɩ̀, səsen kòrə̀n wʋwaga!
3 Səsədɩra wulə ba tɛ,
kwatara sɩ̀án də cwiən pɩpɩlɩ!
Kʋ yɩ lagʋrɩ də lagʋrɩ!
Tɩga kapʋpʋ súə́ tɩa,
lìù wàrɩ̀ ba ʋ gàlɩ̀,
ʋ lwarɩ ba nii!
Bwálɩ́ mama yɩ tɩga,
naa yinɩŋa tə̀lə́!
Ninivə tɩʋ tə dí cavɩra
4 Ninivə yà yɩ tɩʋ kʋ nə jə fɩra.
Kʋ yà jə cɩrɩ tʋ̀tʋ̀nán yənu,
kʋ yà ja kʋ kacwaan tə, kʋ yòlì lʋʋ níə́,
kʋ ga ja kʋ cɩrɩ yìə̀n tə kʋ vaŋa lʋʋ dwíə́.
Yá kʋ kacwaan tə nə ja kʋ tə mama kʋ bà.
5 Kʋ mʋ̀ nə pɩn, à ma zɩga n nə.
À mʋ̀ Ba-Yígúrə́-Jə-Tiu,
à nə yɩ kwatara Yɩɩ nii sʋgʋ nə!
À wá zɩ̀n n ganzwɩdarʋ tə, à pú n yáá nə,
à ga yá mʋ́ wàlá, lʋʋ dwíə́ tə yáá con,
sə à ma bɩrɩ n cavɩra payun tə nə.
6 À wá lwá durən n yuu nə,
à ma fʋfʋlɩ mʋ́,
à pa n jì mʋmʋn won.
7 Yá lìù mama nə nɩ mʋ́,
ʋ wá dəri ʋ nan kwa, ʋ yá mʋ́,
ʋ ga swɩ̀n, ʋ wʋ́:
«Ninivə cʋ̀gʋ̀!
Wàà nə wá kwi ʋ pa kʋ?
Yə̀n nə à wá na lɩ̀à, sə ba kòrì mʋ́?»
Yoo tə nə yí Tebɛsə tɩʋ tə nə wá yí Ninivə də
8 Ninivə tɩ̀án-ba, á bʋŋa də
á tɩʋ tə kʋkwa No-Amona tɩʋ tə,
kʋ yà nə wulə Nilə mʋnaa tə pɩna wa,
nɩ́á nə kɩkarɩ kʋ naaa?
Mʋʋ yà nə cɩ̀ kʋ nə ndə biritaŋʋ nə,
mʋʋ yà nə kɩkarɩ kʋ ndə birinaa nə.
9 Kuswəb də Ezwipətə lʋʋ níə́ tə yà nə pɩn
kʋ jə dɩ̀àn tə nə ba kamandon jə.
Putə də Libi tɩ̀án yà nə yɩ kʋ faan lɩ̀à.
10 Yá də kʋ mɛ, dʋŋa lɩ kʋ də lɩ̀à,
ba ja va yongaʋ, ba ga yá kʋ.
Ba tɩtaga kʋ də bɩ̀á kanpwərən tə mama wa,
yá ba tá kwɛ́ ba ma tara kʋ tɩʋ tɩ̀án tə,
ba ga vwa kʋ dun tɩ̀án tə mama də banzala.
11 Càn wá bʋbʋnɩ n mʋ̀ Ninivə tɩʋ tə də,
yá n wá pɩ̀à yisəgə bwálɩ́, sə n səgə, dʋŋa yáá nə.
Ninivə tɩʋ tə wàrɩ̀ kʋ dʋŋa yáá nə kʋ zɩga
12 N dɩ̀àn dəkuu bwálá tə mama yɩ ndə kapɩran nə,
tə nə zɩŋa kapɩra tə nə bɩga.
Ba nə vʋvʋgʋ tə mancɩn tətə,
tə wá kwa tə tʋ lìù tə mama nii wa,
ʋ nə pɩ̀à tə sə ʋ də́.
13 Nə̀ń n kwatara tə nə ba ga kana cɩcɩ.
N lʋʋ nii tə mimien súrí tə dʋgʋ,
tə pa n dʋŋa nə.
Mən dí n boruswaran tə.
14 Ninivə tɩ̀án-ba, á taŋa nɩ́á á tún,
dʋŋa nə wá pú á tɩʋ tə nə yɩrɩ!
Á kwɩan á dɩ̀àn dəkuu bwálá tə,
á zwɩa tɩran wa, á nɩŋa tɩbʋa,
á ga tì wárɩ́ dàʋ̀!
15 Mə lá nə mən wá də́ aba,
kwatara sɩ̀ʋ́ ga lɩ á mɩɩ.
Tə wá də́ aba ndə kayɩra nə də́ wiən nətʋ.
Á yana kapʋpʋ ndə kayɩra nə,
sə á ga ya buruburu ndə jə̀rə̀n nə!
16 N baywələ tə pùlì,
ba doni lanworu kacɩlacɛɛ tə.
Ba yɩ ndə kayɩra nə,
tə nə dí tə zwɛ̀, tə yàá piri tə vìí.
17 N tɩʋ nəcɩra tə yɩ ndə jə̀rə̀n nə,
n pɩ̀ʋ́ tʋ̀tʋ̀nà tə ga yɩ ndə kayɩra kapʋpʋ nə,
tə nə jəni tunə yuu wa, waran máŋá wa.
Yɩcaʋ nə pɛ́n, tə yàá piri tə vìí,
yá ba yàá dwá bwálɩ́ tə, tə nə jə̀ń.
18 N vàná nəcɩra tə dwɛ̀, Asiiri pɩ̀ʋ́.
N kwatara babɩran tə tígə́ sííí!
N lalʋʋ tə laga duən yáá nə, pɛɛn tə yuu wa,
yá lìù tə̀lə́ sə ʋ kə ba duən yáá!
19 Ba caŋɩ mʋ́ ba,
ba tún nʋran n yɩra, tə nə wàrɩ̀ tə zuri.
Ba caŋɩ mʋ́ ba pa tɩan nə.
Lìù mama nə nì n ŋwɛn,
ʋ wá mà jɩpwələ n yolwan tə yuu nə.
Wàà yɩra nə n wà n wʋlʋŋʋ tə tʋn,
də n bwɛ́?