Nahumə
1
1 Yɩɩ nii sʋgʋ Ninivə tɩʋ tə yuu wa. Sagɩ tə nə bɩrɩ yìə̀n tə, Yɩɩ nə bɩrɩ Nahumə nə, ʋ nə yɩ Ɛləkɔswə tíú, ʋ nɩʋn wa.Ba-Yígúrə́-Jə-Tiu ba kamandon jə, ʋ ga ziən
2 Ba-Yígúrə́-Jə-Tiu yɩ Yɩɩ tə, ʋ nə jə badoli, ʋ fwi ʋ lɩŋa.
Ba-Yígúrə́-Jə-Tiuʋ fwi ʋ lɩŋa, ʋ lɩŋa pupwin.
Ʋ fwi ʋ lɩŋa ʋ jarɩduən yuu wa.
Ba-Yígúrə́-Jə-Tiu zɩga ʋ dʋŋa nə.
3 Ba-Yígúrə́-Jə-Tiu lɩŋa ba zaŋa lala.
Ʋ jə dɩ̀àn nəfarʋ.
Ba-Yígúrə́-Jə-Tiu ba cʋna yá ʋ pɩn tə kɛ̀ń.
Ʋ túŋə́ cwəŋə kùlì də dwavʋʋ wa.
Bakwan tə yɩ ʋ nɛɛ pùrú.
4 Ʋ yàá baa mʋʋ tə nii nə, ʋ pa kʋ kʋ̀,
ʋ pɩn mʋnɛɛ tə mama wɩ.
Baswan vàná gaʋ tə, də Karəmɛlə paan pɩ̀nɩ̀,
Liban tɩ̀án punə tə pɩ̀nɩ̀.
5 Ʋ pɩn pɛɛn tə vuvugə,
dədwələn tə sisigə,
tɩa tə vɩvaga ʋ yáá con,
lʋʋ tə də kʋ wa lɩ̀à tə mama.
6 Wàà nə wàá ʋ lɩŋa tə yáá con ʋ zɩga?
Wàà nə wàá ʋ lɩŋa tə nə fʋrɩ yáá nə ʋ zɩga?
Ʋ lɩŋa tə kwé ndə mənvwə nə,
pɩ̀ràn ga pʋpʋga ʋ yáá con.
7 Ba-Yígúrə́-Jə-Tiu ziən,
ʋ yɩ yisəgə bwálɩ́ jɩgwarʋ máŋá wa.
Ʋ ywàŋá lɩ̀à tə yuu, ba nə kwálɩ́ ba yuu ʋ con.
8 Yá ʋ wá pa basarʋ nakulə còrì bwálɩ́ kʋ tə mɩ́ámɩ́án,
kʋ cú kʋ ja kʋ dəkurən nə,
ʋ ga dɩŋa ʋ dʋŋa ʋ lɩ, ʋ kə yikunu wa.
Zwida lʋʋ nii tə, də Ninivə tɩʋ tə yuu wa sʋ̀ràn
9 Bɛ̀ɛ̀ nə á vʋrɩ á zɩga Ba-Yígúrə́-Jə-Tiu nə?
Ʋ mʋ̀ nə wàá ʋ cʋ̀gà mɩ́ámɩ́án,
ʋ bá yá ʋ pa jɩgwarʋ zʋ nɛɛ bələ.
10 Dʋŋa tə yɩ ndə lɩ̀à nə, ba nə nyʋan sana, ba bʋbʋnɩ.
Yá ba nə swə ba yɩ ndə seni tuni nə,
ʋ wá pa mən də́ ba.
Tə wá də́ ba mɩ́ámɩ́án, ndə gakʋrʋ nə.
11 N mʋ̀ Ninivə tɩʋ tə wa nə bakʋkwanyiən nan,
ʋ mà lwanɩ sawara, ʋ zɩga Ba-Yígúrə́-Jə-Tiu nə.
12 Nəŋə kʋ tə Ba-Yígúrə́-Jə-Tiu nə swɩ̀n:
«Dʋŋa tə dánɩ́, də ba dɩ̀àn nə swə tə mɛ tə yɩrɩ mama,
kʋ zwɛ̀, ba mama wá tɩ.
À fʋfʋlɩ á mʋ̀ à lɩ̀à tə,
yá kʋ mɛ nətʋ, à kʋ́ʋ̀ bá pìí à fʋfʋlɩ aba.
13 À dàń wá kɛ́n ywə́ŋə́ dàʋ̀ tə,
á dʋŋa tə yà nə ken á bɩan nə,
yá à wá karɩ á banzala tə.»
14 Nəŋə kʋ tə Ba-Yígúrə́-Jə-Tiu nə swɩ̀n
ʋ zɩga á nə, Ninivə tɩ̀án-ba:
«Á kʋ́ʋ̀ bá ja dwíí, ba bon á yɩrɩ lʋʋ wa.
À wá lɩ á woŋwanan tə, ba nə sə̀ də dàʋ̀,
də tə ba nə nyɩan lugu ba ma fwa, á yɩa dìə̀ tə wa.
À wulə á libəri à tanɩ,
á nə yɩ ləzwənywanan yɩrɩ.»