Ezayi swɩ̀n Ba-Yígúrə-Jə-Tiu nii sʋgʋ pɩ̀ʋ́ Akazə con
7
1 Zwida pɩ̀ʋ́ Akazə, ʋ nə yɩ Yotamə bìú, ʋ ga yɩ Ozɩasə nàʋ́ pàrɩ̀ tə máŋá wa, Siiri pɩ̀ʋ́ Resinə ken nimarʋ də Yɩzərayɛlə pɩ̀ʋ́ Peka, ʋ nə yɩ Remalɩya bìú, sə ba va ba ta Zwerizalɛmə, yá ba wà wànɩ́ ba ta kʋ. 2 Ba nə swɩ̀n pɩ̀ʋ́ Akazə con, ʋ nə yɩ pɩ̀ʋ́ Davidə dwíí lìù, də Siiri tɩ̀án jon Efərayimə nagwanaa tə, ʋ də ʋ lalʋʋ tə bɩcan vuvugu, ndə vʋʋ nə yàá vuvugu pún tɩ̀án vʋran nətʋ.3 Ba-Yígúrə́-Jə-Tiu dàń swɩ̀n Ezayi con, ʋ wʋ́: «N mʋ̀ də n bìú Cheyarə-Yaswubəa naŋa á va á jəri Akazə nàgwàlʋ́ fìù tə nii nə, baan con nɩ́á gwàlʋ́ nəfarʋ tə nii nə, cwəŋə tə wa, ka nə vələ lìù tə nə lì wiən bwɩran wa, kárá tə con. 4 N wá swɩ̀n ʋ con, n wʋ́: “Ja n tɩ̀àn sənbwen, dàn ká pa fən ja mʋ́, dàn ká pa n bɩcan vuvugu Resinə də Siiri tɩ̀án, də Remalɩya bìú tə lɩŋa tə yáá nə. Pɛ̀gá təntə yɩ ndə məndɛɛ tɩtwara bələ nə, tə ŋwɩn nə naŋa. 5 Cɩ́gá, Siiri tɩ̀án, də Efərayimə dwíí tə, də Remalɩya bìú tə tanɩ lwanɩ ba zɩgɩ n nə, yá ba vʋrɩ, ba wʋ́: 6 Nə vələ nə ta Zwida lʋʋ nii tə! Nə wá kə fən tɩʋ tə wa, nə ga ta kʋ, nə də́ dɩ̀àn kʋ yuu wa, nə pa kʋ sɛ̀ nə nii. Yá nə dàń wá tún Tabeyɛlə bìú tə kʋ wa, sə ʋ də́ pàrɩ̀. 7 Yá nə̀ń kʋ tə Yuu-Tiu Ba-Yígúrə́-Jə-Tiu nə swɩ̀n:
Kʋ nətʋ bá jì,
kʋ yoo təntə bá tʋn.
8 Cɩ́gá, Damasə nə yɩ Siiri payuu tə patɩʋ,
yá Resinə nə yɩ Damasə pɩ̀ʋ́.
Yəbə də bɩna sapwɩtwa də bonu,
Efərayimə wá cʋ̀gʋ̀, ba kʋ́ʋ̀ bá ya dwíí.
9 Samari nə yɩ Efərayimə nagwanaa tə patɩʋ,
yá Remalɩya bìú tə nə yɩ Samari pɩ̀ʋ́.
Á nə wà á waa Ba-Yígúrə́-Jə-Tiu nə ken,
á bá wànɩ́ á zɩgɩ dɩ̀àn, á ta.”»
Emanuwɛlə mɩmɩnʋ
10 Ba-Yígúrə́-Jə-Tiu kʋ́ʋ̀ swɩ̀n Akazə con, ʋ wʋ́: 11 «Lori mɩmɩnʋ Ba-Yígúrə́-Jə-Tiu, n tíú Yɩɩ con, tɩa də̀ń, ciru nə, nə à yə̀ə́ baan, lanworu wa.» 12 Yá Akazə le, ʋ wʋ́: «À bá lòrì won mama, à bá dídə́n Ba-Yígúrə́-Jə-Tiu.»
13 Ezayi ma swɩ̀n, ʋ wʋ́: «Á cʋga, Davidə dìə̀ lɩ̀à-ba. Á nə wʋwalɩ ləzoni pɩ́nʋ́ tə wà aba yí, á tə pɩ̀à sə á wʋwalɩ à tíú Yɩɩ də pɩ́nʋ́ tə? 14 Kʋ mʋ̀ nə pɩn Yuu-Tiu tətə wá pa mɩmɩnʋ: Nə̀ń, kacɩɩn tə, ʋ tə nə yəri bɛɛ, wá ja pùə́, ʋ lɩra bìú, ʋ ga wá bon wá Emanuwɛlə. (Kʋ də̀ń nə yɩ, “Yɩɩ wulə də nəba”). 15 Dɩndarʋ də tʋ̀ràn nə wá ya ʋ wodiu, kʋ va kʋ yí máŋá tə, ʋ nə wá yəni ka vɩ kʋ tə nə lwara, ʋ ga kúrí kʋ tə nə ziən ʋ tì. 16 Də máŋá tə bisɩmaa tə nə wá lwarɩ ka vɩ kʋ tə nə lwara, yá ʋ kúrí kʋ tə nə ziən ʋ tì tə wà yí, pɛ̀gá bələ təntə n nə dəri ba fən, lʋʋ nii tə lɩ̀à wá vɩ kʋ ba dʋgʋ. 17 Ba-Yígúrə́-Jə-Tiu wá pa dɩan tə nə wà dí yáá tə ya lá bà n də n lalʋʋ tə, də n nyɩna dìə̀ tə yuu wa, kʋ nə zɩgɩ dɩɩn tə nə Efərayimə dwíí tə nə pwɛ̀ ba tɩ̀àn ba lɩ Zwida dwíí tə yɩra. Asiiri pɩ̀ʋ́ nə wá bà ʋ pú lʋʋ nii tə ʋ kə də kʋ̀ʋ̀ yoo nə kʋ swɩ̀n.
Lʋʋ nii wa zwɩʋ də dɩ̀àn, də kʋ kwa yojanan
18 Kʋ dɩɩn tə nə Ba-Yígúrə́-Jə-Tiu wá fɩlɩ fɩla,
ʋ ma bon nanjwɩ tə,
nə wulə Nilə mʋnaa tə namɩnɩ tə nii nə,
də twɩɩn tə nə wulə Asiiri lʋʋ nii tə wa.
19 Tə mama wá bà tə jə̀ń
nacorən tə bəbərən nə,
də pɩ̀ràn kwə̀lə́ wa,
də tunə tə mama yuu wa,
də vàná gaʋ tə mama yuu wa.
20 Kʋ máŋá tə wa, Yuu-Tiu wá ŋwɩ́n,
ʋ ga jon yufɩna, Asiiri pɩ̀ʋ́ tə con,
Əfəratə mʋnaa tə kwa con,
ʋ ma fɩna á yun də á yɩra kʋran.
Ʋ wá fɩna á twaŋa də tətə.
21 Kʋ máŋá tə wa, lìù wá ja nacɩɩn,
də vanmɩnɩ bələ cɩcɩ,
22 yá nayɩla wá ya dánɩ́ zənzən,
kʋ pa lɩ̀à də́ nayɩlɩ nʋga.
Cɩ́gá, nayɩlɩ nʋga də tʋ̀ràn nə wá ya
lɩ̀à tə mama nə ga lʋʋ nii tə wa wodiu.
23 Kʋ máŋá tə wa, ba wá vɩ kárá mama,
divɛn tɩ̀án mʋ̀rʋ̀ nə wulə ka wa,
ka kwənə nə yí səbilurən mʋ̀rʋ̀,
ba dʋgʋ ba pa casʋran də səni nə.
24 Ba wá zʋ lá də cɩan də twan.
Cɩ́gá, lʋʋ nii tə mama wá ya casʋran də səni.
25 Yá lɩ̀à kʋ́ʋ̀ bá dɩ̀ pɛɛn tə mama yuu wa,
ba ya nə varɩ lá də vàrʋ́,
casʋran tə də səni tə yɩrɩ.
Ba wá yá tə ba pa nɩan də pee nə,
sə tə jírí tə də́ lá.