Ezayi bìú tə yɩrɩ tə də̀ń
8
1 Ba-Yígúrə́-Jə-Tiu swɩ̀n à con, ʋ wʋ́: «Tí dabofarʋ, n bɩ̀rɩ̀ sʋ̀ràn tə tə də pubʋŋa, n tún kʋ yuu wa: “Zaŋa lala, á va á vɩrɩ wiən! Jaŋa wiən tə, ba nə ta ba jon kʋ̀ʋ̀ wa!”» 2 À jɩn lɩ̀à bələ, à nə wàá ba yuu wa à jələ, à ma fwa à dansɩa lɩ̀à: Ba mʋ̀ nə yɩ Yɩɩ joŋwanʋ Uri, də Yeberekɩa bìú Zakari. 3 Kʋ kwa nə, à zʋa sàrá də Yɩɩ sʋsʋnkana tə ʋ nə yɩ à kan, yá ʋ jɩn pùə́, ʋ lɩra bibɛɛ. Yá Ba-Yígúrə́-Jə-Tiu swɩ̀n à con, ʋ wʋ́: «Dɩ ʋ yɩrɩ “Mahɛrə-Swalalə-Haswə-Bazə”a. 4 Cɩ́gá, də bisɩmaa tə tə wàrɩ̀ ʋ swɩ̀n, ʋ wʋ́: “À nyɩna!”, nə à yə̀ə́ “À nuu!”, ba wá pɛ̀ Damasə tɩ̀án jɩjə wiən tə, də wiən tə Samari tɩ̀án nə ta ba jon kʋ̀ʋ̀ wa, ba ja bà Asiiri pɩ̀ʋ́ yáá con.»Asiiri tɩ̀án twi ba sú lʋʋ nii tə
5 Ba-Yígúrə́-Jə-Tiu kʋ́ʋ̀ swɩ̀n à con, ʋ wʋ́:
6 «Lalʋʋ kʋ tə nə zʋ̀nɩ̀ Silowe nɩ́á tə
nə pàlɩ̀ bʋ̀àbʋ̀à,
yá ba jwɛ Resinə, də Remalɩya bìú tə nə yɩrɩ,
7 à mʋ̀ Yuu-Tiu wá pa Əfəratə mʋnaa tə
nɩ́á kapʋpʋ tə nə jə dɩ̀àn pupwin
tə nan tə yipaa bwálɩ́ mama nə,
tə sú mʋnaa tə bəbərən mama:
Kʋ mʋ̀ nə yɩ Asiiri pɩ̀ʋ́ tə də ʋ dun tə mama.
8 Ʋ wá zʋ Zwida lʋʋ nii tə wa,
ʋ va ʋ kɛ̀ń kʋ nii sɩswɩan,
yá ʋ wá də́ kʋ mama, ʋ dɩ̀ ʋ ja kʋ yuu nə.
Ʋ wá larɩ ʋ vànà,
ʋ sú n lʋʋ nii tə mama, ooo Emanuwɛlə!
Yɩɩ wulə də nəba
9 Lalʋʋ-ba, á maga kʋ̀ʋ̀ cə̀rí,
sə bɩcapuri ga zʋ aba!
Á gunə á zɩan á cʋgʋ,
á mʋ̀ lɩ̀à tə mama, á nə wulə yiŋʋnɩ,
tɩa nii yígúrə́ wa!
Á tana á tɩ̀àn sə á ta kʋ̀ʋ̀,
yá bɩcapuri wá zʋ aba!
10 Á nə swə á tanɩ pubʋŋa yoo,
kʋ wá cʋ̀gʋ̀!
Á nə swə á swɩ̀n sʋgʋ,
kʋ bá jì!
Cɩ́gá, Yɩɩ wulə də nəba.
Ba-Yígúrə́-Jə-Tiu mɛ sə ba dəri ʋ fən
11 Cɩ́gá, nə̀ń kʋ tə Ba-Yígúrə́-Jə-Tiu nə swɩ̀n à con, máŋá tə wa ʋ nə jɩn nə, ʋ swɩ̀n à con, sə à dàn ká va lalʋʋ kʋ tə nabwɩɩ wa:
12 «Á dànà ká ja kʋ tə mama,
lalʋʋ tə nə swɩ̀n də kʋ yɩ vʋ́rá,
á ma bon vʋ́rá.
Á dànà ká dəri kʋ tə fən,
ba nə dəri kʋ fən,
á dànà ká pa kʋ fən ja aba.»
13 Á mɛ sə á yəni də Ba-Yígúrə́-Jə-Tiu,
ʋ nə yɩ kwatara Yɩɩ,
nə yɩ Yɩɩ tə ʋ nə yɩ parɩ*,
yá ʋ mʋ̀ fən nə á mɛ sə á dəri,
á ga pa wá dun.
14 Ʋ wá ya wúlú bwálɩ́,
də kapan ba nə mà nɛɛ kʋ nə,
də pɩ̀ʋ̀ kʋ nə pɩn lɩ̀à twɩ,
kʋ pa Yɩzərayɛlə lɩ̀à dìì bələ tə nə,
ʋ ga wá ya gəgəlu də nyalɩ,
ʋ pa Zwerizalɛmə tɩ̀án nə.
15 Lɩ̀à kapʋpʋ wá mà ba nɛɛ kʋ nə,
ba tʋ, ba nyʋnyʋgʋ.
Dʋŋa wá cɩ̀ ba ba kə nyalɩ wá, ba ja.
Yɩɩ nii sʋ̀sʋ̀nʋ̀ tə cɩ́nɩ́, ʋ ga cʋga Yɩɩ nə
16 Cɩ dansɩa yoo kʋ tə nə, sùń Yɩɩ nii yoo kʋ tə nii nə zəni, n tún à kwa lɩ̀à tə wa. 17 À jə yala, à ma dànɩ̀ Ba-Yígúrə́-Jə-Tiu, ʋ nə səgə ʋ yáá Zwakɔbə dìə̀ tə yáá nə. Ʋ mʋ̀ yuu wa nə à jələ. 18 Nə̀ń, Ba-Yígúrə́-Jə-Tiu, kwatara Yɩɩ tə ʋ nə wulə Siyon paan tə yuu wa, pɩn à mʋ̀ də bìsɩ́ná tə ʋ nə pɩn nə, jì mɩmɩnan də won ba ma bɩrɩ jwɩan yìə̀n Yɩzərayɛlə wa.
19 Ba nə swɩ̀n á con, ba wʋ́: «Á bwiə lɩ̀à tə nə sʋswɩ, də ba sìrì ba ma boŋə tɩga nii, də ba maŋa jwɩan yìə̀n ba bɩrɩ! Ləzoni wà mɛ sə ba bon ba kə ba yɩa nə naaa? Ba wà mɛ sə ba bon ba kə tɩga nə, ləzwəniŋə yuu yɩrɩ naaa?» 20 Á wá le ba, á wʋ́: «Pìrə́ á bà Yɩɩ nii tə, də nimarʋ dansɩa won tə con!» Ba nə wà nətʋ swɩ̀n, tɩkʋnɩ bá ya lá, kʋ pa lalʋʋ tə nə.
Yikunu wa vəli
21 Niən wá bibəni lalʋʋ tə,
ba twá lʋʋ nii tə wa ba ywaŋa.
Niən tə wá pa ba lɩŋa zàn,
yá ba wá zɩrɩ ba kə
ba pɩ̀ʋ́ tə də ba Yɩɩ tə nə.
Ba wá zɩ̀n ba yáá yɩɩ nə,
22 yá ba nə pìí ba ywàń tɩa,
ba wá na də jɩgwarʋ, də yikunu,
də yojanan tə nə dwə jɩɩn nə súə́.
Yá tə wá yigu ba tə kə yikunu bìrə̀n wa.
23 Yá yikunu bá də́ pàrɩ̀ máŋá mama wuuu,
tɩa tə yuu wa, yojanan nə wulə lá sɩ́ʋ́n nə.
Máŋá tə nə kɛ̀ń nə yɩ cavɩra máŋá,
kʋ pa Zabulon də Nɛfətali nagwanɛɛ tə nə,
máŋá tə nə bɩ̀àn wá ya dun máŋá,
kʋ pa mʋʋ nii nagwanaa tə nə,
Zʋrədɛn mʋnaa tə kwa con,
dwíə́ nəkaran* nagwanaa tə wa.