9
1 Lalʋʋ tə yà nə vəli yikunu wa, nɩ poni nəfarʋ.Poni pɩ̀rɩ̀ ba mʋ̀ lɩ̀à təntə,
ba yà nə wulə tɩan yɩywara lʋʋ nii wa.
2 N Pɩn lalʋʋ tə pùlì zənzən,
n pɩn ba sú də pupwən nəfarʋ.
Ba fwa pupwən n yáá con,
ndə lɩ̀à nə yàá jwɛ woceri máŋá wa nətʋ,
ndə ba nə yàá mà pupwən cə̀rí,
ba ma tarɩ wiən tə ba nə ta ba jon kʋ̀ʋ̀ wa.
3 Cɩ́gá, n kɛ́n nɩan bɩan dàʋ̀ tə,
kʋ dun yà nə jə ba,
də dàʋ̀ tə ba yà nə ma mà ba taŋa wa,
də lìù tə yà nə fɩfɩn ba dangolu tə,
ndə n nə tʋn kʋ nətʋ, Madɩan máŋá waa.
4 Cɩ́gá, natɩra tə mama ba nə zʋa kʋ̀ʋ̀ wa,
də kʋ̀ʋ̀ gànʋ̀ mama kʋ nə bibili jana wa,
ba wá kə tə mənvwə wa, sə mən də́.
Yɩɩ pɩn nəba bisɩmaa
5 Cɩ́gá, ba lɩrɩ bisɩmaa ba pa nəba,
ba lɩrɩ bibɛɛ ba pa nəba,
yá Yɩɩ ken pàrɩ̀ dɩ̀àn mama ʋ jɩɩn wa.
Ba wá bon wá, Kwenu nəzəŋu,
Yɩɩ tə nə jə dɩ̀àn mɛ,
Nyɩna tə nə ba yígúrə́ jə, Sìə́ pabiu.
6 Nəŋə kʋ tə Ba-Yígúrə́-Jə-Tiu,
ʋ nə yɩ kwatara Yɩɩ
nə wá tʋn də sonu nəfarʋ:
Ʋ wá pa ʋ pàrɩ̀ dɩ̀àn súrí,
ʋ wá pa sìə́ tə nə ba zwɛ̀ ya
Davidə padaʋ tə də ʋ payuu tə wa,
ʋ wá pa kʋ dəkuu zʋ tɩa,
ʋ ga pa kʋ ja dɩ̀àn,
kʋ twá cɩ́gá cwəŋə
də kʋ tə nə twá cɩ́gá nə,
ndə kʋ nə mɛ nətʋ,
kʋ nə zɩgɩ sɩ́ʋ́n nə,
kʋ ja vələ máŋá mama wuuu.
Ba-Yígúrə́-Jə-Tiu lɩŋa zaŋa ʋ lalʋʋ tə yuu wa
(5.25)
7 Yuu-Tiu swɩ̀n sʋgʋ,
ʋ ma zɩga Zwakɔbə dwíí tə nə,
yá kʋ tʋa Yɩzərayɛlə lɩ̀à yuu wa.
8 Lalʋʋ tə mama wá yəni kʋ,
Efərayimə dwíí tə də Samari tɩ̀án yɩ lɩ̀à tə,
ba nə swɩ̀n fwìə́ də yɩrʋ sʋ̀ràn, ba wʋ́:
9 «Wárá bírí tə tʋa,
yá nə wá pìí nə lwà tə
də kapana ba nə sə̀!
Ba goŋi nə kapɩrɩtərən,
yá nə wá pìí nə cwɛn
sɩsaban tɩ̀án tə bwálɩ́ nə!
10 Ba-Yígúrə́-Jə-Tiu zɩ̀n Resinə jarɩduən tə,
ʋ kə Yɩzərayɛlə lɩ̀à nə,
sə ʋ pa ba də́ dɩ̀àn ba yuu wa,
yá ʋ wá pa kwatarɩ zɩla ba dʋŋa nə.
11 Siiri tɩ̀án wulə yɩɩ yipɩan con,
Filisi tɩ̀án ga wulə yɩɩ yizwɩa con,
yá ba pʋpwaga Yɩzərayɛlə lɩ̀à naa nədʋ.
Yá də kʋ mɛ,
Ba-Yígúrə́-Jə-Tiu lɩŋa tə ba twɩ,
ʋ jɩɩn tə te kʋ zɩga ba nə.
12 Lalʋʋ tə wà pìí ba bà lìù tə con,
ʋ yà nə mà ba,
ba wà Ba-Yígúrə́-Jə-Tiu,
ʋ nə yɩ kwatara Yɩɩ twarɩ.
13 Yá Ba-Yígúrə́-Jə-Tiu də dàń goŋi
Yɩzərayɛlə lɩ̀à yuu də ba nɛɛ,
ʋ goŋi kʋra naa də mɩncanɩ dɩɩn nədʋ.
14 Nəkwɩa də tɩʋ tíú nə yɩ yuu tə,
yá Yɩɩ nii sʋ̀sʋ̀nʋ̀ tə nə kʋ̀nɩ̀ kʋ̀nkʋ̀n
nə yɩ nɛɛ tə.
15 Lalʋʋ kʋ tə yáá tɩ̀án tə yɩ
ba gɩgarɩ ba, ba dʋga,
yá lɩ̀à tə nə yá ba pɩn
ba kəni ba cwəŋə wa, dʋgʋ ba tɩ̀àn.
16 Kʋ mʋ̀ nə pɩn,
Yuu-Tiu pùə́ ba ywán də ba ləzwəndʋn tə,
ʋ ga ba ba bitara də ba kadənə yinəgə dəri.
Cɩ́gá, ba mama yɩ cʋna lɩ̀à, də wʋlʋnyɩna,
sʋlwana cɩcɩ nə naŋa ba nii wa.
Yá də kʋ mɛ,
Ba-Yígúrə́-Jə-Tiu lɩŋa tə ba twɩ,
ʋ jɩɩn tə te kʋ zɩga ba nə.
17 Cɩ́gá, wʋlʋŋʋ tə jə ndə mən nə,
tə nə də́ səni də casʋran,
tə kwé pún tunə nə,
tə də́, tə ŋwɩn dɩ̀ yɩɩ.
18 Ba-Yígúrə́-Jə-Tiu, ʋ nə yɩ kwatara Yɩɩ
lɩŋa tə pɩn mən kwé lʋʋ nii tə nə,
yá lalʋʋ tə jìgə̀ ndə won nə, mən nə dí.
Lìù mama ba ʋ don yinəgə dəri.
19 Ba goŋi jɩzən yuu, yá niən tə jə ba,
ba dí jɩgwiə yuu, yá ba ba swí.
Ba pìí ba də́ ba tətə yɩra nàŋʋ́.
20 Manase dwíí tə də́ Efərayimə dwíí tə,
Efərayimə dwíí tə də də́ Manase dwíí tə,
yá ba mɛ bələ dàń zɩga Zwida dwíí tə nə.
Yá də kʋ mɛ,
Ba-Yígúrə́-Jə-Tiu lɩŋa tə ba twɩ,
ʋ jɩɩn tə te kʋ zɩga ba nə.