Ba-Yígúrə́-Jə-Tiu divɛn tɩ̀ʋ́ tə yoo
5
1 Sɩ́ʋ́n nə, à wá dɩ gwaran, à ma bʋ à dabɛɛ nə. Kʋ yɩ à dabaswənə də ʋ divɛn tɩ̀án kárá yuu wa nuŋə.À dabɛɛ yà jə divɛn tɩ̀án kárá,
paan dəkuu tɩa wa, ka nə ywán.
2 Ʋ gwìń tɩa tə, ʋ lɩ kapana tə,
ʋ ga cwɛn ʋ fɩra tɩ̀án, kárá tə wa.
Ʋ lwə̀ dəyuu dìə̀ kárá tə titəŋi wa,
ʋ ga kʋ̀ gwàlʋ́,
sə ba ma kàŋà divɛn tɩ̀án lənə tə.
Ʋ dàń yà jə yala də,
divɛn tɩ̀án tə wá zɩn lənə nəzəŋə,
yá lənə kʋkwɩnan nə tə pìí tə zɩn!
3 À dabɛɛ tə dàń swɩ̀n, ʋ wʋ́:
«Sɩ́ʋ́n nə, á mʋ̀ Zwerizalɛmə tɩ̀án,
də Zwida lʋʋ lɩ̀à-ba,
á bʋ̀rá à də à divɛn tɩ̀án kárá tə bʋra!
4 Bɛ̀ɛ̀ nə à yà mɛ sə à fwa à súrí lá,
à pa divɛn tɩ̀án kárá tə nə,
yá à wà fwa?
Bɛ̀ɛ̀ nə pɩn, à yà jə divɛn tɩ̀án lənə nəzəŋə yala,
yá tə pìí tə zɩn lənə kʋkwɩnan?
5 Sɩ́ʋ́n nə, à wá pa á lwarɩ kʋ tə,
à nə wá ma tʋn à divɛn tɩ̀án kárá tə:
À wá mùrí casʋran dabɔɔ tə
nə kɩkarɩ ka tə vàn don,
sə vàná zʋ tə də́ divɛn tɩ̀án tə.
À wá gwɛrɩ birinaa tə
nə kɩkarɩ kárá tə vàn tə
nə daa cwəŋə con,
sə cwəvələ twá lá, ba zʋ
ba nɩŋa divɛn tɩ̀án tə.
6 À wá pa kárá tə cʋ̀gʋ̀,
lìù mama bá tá tɩ̀án tə nɛɛ tə,
nə à yə̀ə́ ʋ vàrà tə də̀ń nə.
Gəlu də casʋran wá nan kárá tə wa,
yá à wá pa nii bakwan tə nə,
sə tə dàn ká pa dwà nà ka wa.»
7 Yá Ba-Yígúrə́-Jə-Tiu, ʋ nə yɩ kwatara Yɩɩ
divɛn tɩ̀án kárá tə nə yɩ Yɩzərayɛlə dwíí tə.
Yá tɩ̀án tə ʋ yà nə swə zənzən
nə yɩ Zwida lʋʋ lɩ̀à tə.
Ba-Yígúrə́-Jə-Tiu yà jə yala
də ba wá twá cɩ́gá nə, ndə kʋ nə mɛ nətʋ,
yá nə̀ń kʋ nə, lɩ̀à jana nə ba pìí ba lwɛ́.
Ʋ yà jə yala də ba wá tì cɩ́gá cwəŋə,
yá nə̀ń kʋ nə, yinənyɩna bubwiə nə ʋ pìí ʋ nə̀ń.
Lɩ̀à tə nə zɩ̀n Ba-Yígúrə́-Jə-Tiu lɩŋa tə yoo
8 Nə̀ń lɛɛ nyɩɛn, tə nə wá yí lɩ̀à tə,
nə lwə̀ dìì ba súrí dìì nə,
yá ba dɩ kárɩ́ tə jɩrɩ duən nə,
ba kori ba jon bwálɩ́ tə mama,
lìù don kʋ́ʋ̀ wàrɩ̀ lʋʋ nii tə wa, ʋ twá ʋ yanɩ,
də kʋ nə tà ba mʋ̀ cɩcɩ!
9 À nì Ba-Yígúrə́-Jə-Tiu,
ʋ nə yɩ kwatara Yɩɩ, nə dùə̀, ʋ wʋ́:
«À dùə̀ də dìì kapʋpʋ tə tə wá cʋ̀gʋ̀,
difaran nəzəŋə tə tə wá ya diworən,
lɩ̀à bá ya tə wa.
10 Divɛn tɩ̀án kárá ɛkətarə batwa wa,
divɛn litərə finu cɩcɩ nə wá nan lá,
yá ba nə dùə̀ mɩna kilo bii, tə wá zɩn mɩna kilo fugə cɩcɩ.»
11 Nə̀ń lɛɛ nyɩɛn, tə nə wá yí lɩ̀à tə
nə zaŋa jɩjʋ fuən fuən,
ba twarɩ sana tə nə dà, sə ba nyʋn,
yá kwɩ́n tɩa kàrá wa,
divɛn nə dɩ̀gà ba yɩrɩ!
12 Ba yàá twá bànʋ́ də kwànʋ́,
də zɩnzɩran də wii kori nə,
ba ma nywɩn sana, ba bʋbʋnɩ.
Yá ba ba lwarɩ də Ba-Yígúrə́-Jə-Tiu tʋŋa,
ba ba ʋ jɩɩn tʋtʋŋɩ tə ywàŋá.
13 Kʋ mʋ̀ nə pɩn
Ba-Yígúrə́-Jə-Tiu swɩ̀n, ʋ wʋ́:
«Ba wá ja à lɩ̀à tə ba ja va yongaʋ,
ba nə wà yoo də̀ń nì yɩrɩ.
Niən wá gʋ ba pàbɩ̀á tə,
nanyʋnɩ ga kwàrɩ̀ ba lalʋʋ kapʋpʋ,
ba tɩ ba zwɛ̀.»
14 Kʋ mʋ̀ nə pɩn, ciru* ma súrí kʋ nii,
kʋ kàń kʋ kələru nəfarʋ,
sə pàbɩ̀á tə də lalʋʋ tə cú kʋ wa,
də ba cànà diŋə pupwən zizigu tə.
15 Kʋ mʋ̀ nə pɩn, ləzoni wá kwá tɩa,
Adamə nɩ̀án wá mun ba tɩ̀àn.
Fwìə́ yiywaŋa tɩ̀án mɛ sə ba kə ba yáá tɩa.
16 Ba-Yígúrə́-Jə-Tiu, ʋ nə yɩ kwatara Yɩɩ
bɩrɩ ʋ dun tə, kʋ twá cɩ́gá nə,
ndə kʋ nə mɛ nətʋ.
Yá Yɩɩ tə ʋ nə yɩ parɩ*,
wá kwɛn bɩrɩ də ʋ yɩ parɩ,
ʋ nə wá bʋ̀rɩ̀ bʋra,
kʋ twá cɩ́gá cwəŋə nə yɩrɩ.
17 Ba wá yɩ̀rɩ̀ pee tɩʋ tə dibwərən wa,
ndə ba nə yɩ̀rɩ̀ pee vàná gaʋ wa nətʋ,
yá bʋbii ba nə kʋ̀nɩ̀ tə tún nʋga,
wá va tə twarɩ tə wodiu
jɩjə tɩ̀án dibwərən tə wa.
18 Nə̀ń lɛɛ nyɩɛn, tə nə wá yí lɩ̀à tə
nə ja kʋ̀nkʋ̀n ŋoni,
ba ma vwa ba tɩ̀àn lwanɩ nə!
Ba vaŋa ba cʋna tə,
ndə ba nə vaŋa nɩan koru nətʋ.
19 Ba swɩ̀n, ba wʋ́:
«Lala, lala! Ba-Yígúrə́-Jə-Tiu tʋn kʋ tə
ʋ nə mɛ sə ʋ tʋn, ʋ pa kʋ nii sú:
Nə pɩ̀à sə nə na kʋ!
Yɩzərayɛlə lɩ̀à Yɩɩ tə nə yɩ parɩ,
pa ʋ pubʋŋa yìə̀n tə ʋ nə tanɩ jì,
yá nə wá yəni tə!»
20 Nə̀ń lɛɛ nyɩɛn, tə nə wá yí lɩ̀à tə
nə ja lwanɩ ba jì zəni,
ba ga ja zəni ba jì lwanɩ,
ba nə lwànɩ́ yikunu ba pɩn kʋ jì poni,
ba ga lwànɩ́ poni ba pɩn kʋ jì yikunu,
ba nə ja càn ba boŋə ywánɩ́,
ba ga ja ywánɩ́ ba boŋə càn!
21 Nə̀ń lɛɛ nyɩɛn, tə nə wá yí lɩ̀à tə
nə bʋŋa də ba yɩ wʋbʋnyɩna,
ba ga jələ ba tɩ̀àn ndə yənu tɩ̀án nə!
22 Nə̀ń lɛɛ nyɩɛn, tə nə wá yí sanyʋra babɩran,
də sana tə nə dà sàŋʋ̀ yənu tɩ̀án!
23 Ba pɩn cɩ́gá lìù tə nə, ʋ nə cʋ̀gʋ̀ yoo,
ba ga joŋə vwiŋə,
yá ba joŋə cɩ́gá cwəŋə, cɩ́gá tíú con.
24 Kʋ mʋ̀ nə pɩn,
ndə mən nə yàá də́ gaʋ nətʋ,
ndə gabɩa nə yàá kwé mən nətʋ,
mə nətʋ nə ba dəkurən wá pʋ,
ba pùnə́ ga jɛ́n ndə pùrú nə.
Cɩ́gá, ba vɩga Ba-Yígúrə́-Jə-Tiu
ʋ nə yɩ kwatara Yɩɩ nii yìə̀n tə,
ba ga fʋfʋlɩ Yɩzərayɛlə lɩ̀à Yɩɩ tə
nə yɩ parɩ, nii sʋgʋ tə.
Ba-Yígúrə́-Jə-Tiu lɩŋa tə yoo
25 Kʋ mʋ̀ nə pɩn, Ba-Yígúrə́-Jə-Tiu lɩŋa tə
ma kwé ndə mən nə, ʋ lɩ̀à tə yuu wa,
yá ʋ zɩ̀n ʋ jɩɩn ba yuu wa, ʋ mà ba.
Pɛɛn tə vuvugu,
yá tɩga jìgə̀ ndə ywərən nə, coŋi yuu wa.
Yá də kʋ mɛ, Ba-Yígúrə́-Jə-Tiu lɩŋa tə tə wà twɩ,
ʋ tə te ʋ jɩɩn sə ʋ mà ba.
26 Ʋ zɩ̀n mɩmɩnʋ yɩɩ nə,
ʋ pa lʋʋ dwíə́ tə nə, ba nə wulə yiŋʋnɩ.
Ʋ wúrí nabwanʋ,
yá dwíía nan tɩa nii yigurə wa,
ba dəri ba bɩ̀àn lala.
27 Ʋ con, lìù mama wà gwàrɩ̀,
lìù mama ba ʋ naa mà ʋ twɩ,
lìù mama ba zílí, ʋ ma ba dwɛ̀,
lìù mama tàŋá voru wà kʋ̀rɩ̀,
ʋ natɩrɩ ŋwənə də ma wà karɩ.
28 Ba deri ba twan cɩan,
yá ba van ba twɛn mama ba dɩ̀.
Ba səsen napaŋɩ dà ndə kapan nə,
yá ba səsen kòrə̀n nɛɛ viviri, ndə kùlì nə.
29 Ba bagʋ yɩ ndə gəkan bagʋ nə,
ba baa ndə gəbii nə, ba caga.
Ba yàá ja ba nàŋʋ́,
ba va ba tún bwálɩ́ nəzəŋu nə,
yá lìù mama bà twi ʋ joŋə kʋ ba jɩɩn wa.
30 Kʋ máŋá tə wa, bagʋ wá baa
kʋ zɩgɩ ba nə, ndə mʋʋ bagʋ nə.
Ba wá ywàń lʋʋ nii tə,
yá kʋ wá ya yikunu də twara.
Bakwan liliru wá pa
yikunu pú yɩcaʋ poni nə.