Yɩɩ bon Yɩzayi sə ʋ ya ʋ nii sʋ̀sʋ̀nʋ̀
6
1 Pɩ̀ʋ́ Ozɩasə tɩan bɩnɩ nə, à nɩ Yuu-Tiu də ʋ jə̀ə́ padaʋ yuu wa yɩɩ nə, baan baan, ʋ gasɔɔ tə ga larɩ kʋ sú Yɩɩ dìə̀ tə mama. 2 Yɩɩ sàń wonəŋə yà zɩga ʋ yuu con, kʋ nədʋ mama yà jə vànà bardʋ: Tə yà ja vànà bələ tə ma kwálɩ́ tə yáá nə, tə ja bələ duən tə ma pwí tə nɛɛ nə, tə ga ja bələ duən tə ma piri. 3 Tə boŋə tə kəni duən nə, tə wʋ́: «Parɩ*, parɩ, Ba-Yígúrə́-Jə-Tiu, ʋ nə yɩ kwatara Yɩɩ yɩ parɩ! Tɩa tə mama súə́ də ʋ dun tə!» 4 Tə kwərə pɩn mimiən bwə̀rə̀n tə dəkurən vuvugu, Yɩɩ dìə̀ tə ga sú də ŋwɩn. 5 Yá à dàń swɩ̀n, à wʋ́: «Lɛɛ yí nə! À tɩga à zwɛ̀! Cɩ́gá, à yɩ ləzwənə, à nii nə jə durən, yá à wulə lalʋʋ titəŋi wa, ba də nii nə jə durən, yá à yii dìgə̀ pɩ̀ʋ́ tə, Ba-Yígúrə́-Jə-Tiu, ʋ nə yɩ kwatara Yɩɩ!»6 Yá Yɩɩ sàń wonəŋə tə don piri kʋ bà à con. Kʋ yà jə məncalɩ kʋ jɩɩn wa, kʋ nə ja yàrá pɩ́nʋ́ kʋ ma lɩ, Yɩɩ joŋi bwálɩ́ tə yuu wa. 7 Kʋ ja məncalɩ tə kʋ dwen à nii nə, kʋ ga swɩ̀n, kʋ wʋ́:
«Ywàń, kʋ tə dwen n nipənən nə:
Yɩɩ lɩ n yolwan tə ʋ yá mʋ́,
ʋ kwɛn n cʋna tə ʋ lɩ.»
8 À nì Yuu-Tiu kori, də ʋ swɩ̀n, ʋ wʋ́: «Wàà nə à wá tʋn? wàà nə wá ya nə nii sʋ̀sʋ̀nʋ̀?» À ma le, à wʋ́: «À mʋ̀, nə̀ń nə, tʋn nə!»
9 Yá ʋ dàń swɩ̀n à con, ʋ wʋ́:
«Vəli n swɩ̀n lɩ̀à-ba tə con, n wʋ́:
“Á zɩan wá nì zəni,
yá á bá nì yoo də̀ń!
Á wá ywàń zəni,
yá á bá na won mama!”
10 Pa lalʋʋ kʋ tə bɩcan kʋ̀,
pa ba zɩan bwɩn,
n ga pa ba yɩ́á jɛ́n,
sə ba yɩ́á dàn ká na lá,
sə ba zɩan dàn ká nì yoo,
sə ba pubʋŋa dàn ká lwarɩ yoo,
sə ba dàn ká pìí ba bà à con,
sə à dàn ká pa ba yazurə.»
11 À dàń ma bwe, à wʋ́: «Kʋ nətʋ tə wá dán kʋ mɛ nətə, Yuu-Tiu?» Yá ʋ le nə, ʋ wʋ́: «Kʋ wá ya nətʋ, kʋ va kʋ yí máŋá tə tɩan tə mama nə wá cʋ̀gʋ̀, lìù kʋ́ʋ̀ tə̀lə́ tə wa, yá dìì tə də kwɩ̀n lɩ̀à nə tə wa, tɩa tə ga cʋ̀gʋ̀, ka jì pucʋnɩ bwálɩ́.
12 Cɩ́gá, Ba-Yígúrə́-Jə-Tiu wá pa ləzoni tə va yiŋʋnɩ,
ba ga yá lʋʋ nii tə mɩ́ámɩ́án.
13 Lʋʋ nii tə lɩ̀à tə pwɩ̀ʋ̀ fugə nii nyiən nə ga lá,
Ba-Yígúrə́-Jə-Tiu wá pa mən də́ ba də,
ndə sɩsanʋ, nə à yə̀ə́ culu tɩ̀ʋ́ nə,
ba nə goŋi, ba ga yá kʋ dəkuu tɩa.
Yá dəkuu təntə wá pìí kʋ twà naywalʋ,
kʋ nə yɩ Yɩɩ nyiən.