Lɩ̀à tə nə zɩ̀n Yuu-Tiu lɩŋa tə
(5.8-24)
10
1 Nə̀ń lɛɛ nyɩɛn, tə nə wá yí lɩ̀à tənə pɩn nii sə ba tʋn wʋlʋŋʋ,
də ba tə nə pʋ́pʋ́nɩ́ nii yìə̀n tə nə ba cɩ́gá cwəŋə tì!
2 Ba vɩ sə ba bʋ̀rɩ̀ cɩ́gá ba pa labwana nə,
ba joŋə kʋ tə nə mɛ də à lalʋʋ tə lalaŋa tə:
ba joŋə kadənə wiən,
ba ga vɩrɩ bitara!
3 Bɛ̀ɛ̀ nə á wá fwa,
dɩɩn tə nə, Yɩɩ nə wá kə càn á nə,
dɩɩn tə nə, cʋcʋran nə wá nan yiŋʋnɩ
tə bà á nə?
Wàà con nə á wá dəri á va, sə ʋ jon aba?
Yá yə̀n nə nə á wá yá á dun tə?
4 Á lɩ̀à duən wá kʋ̀rɩ́ ba kə duən nə,
bandiə lɩ̀à titəŋi wa,
ba duən də ga wá tʋ ba tɩ, tɩga titəŋi wa.
Yá də kʋ mɛ,
Ba-Yígúrə́-Jə-Tiu lɩŋa tə ba twɩ,
ʋ jɩɩn tə te kʋ zɩga ba nə.
Lɛɛ wá yí Asiiri tɩ̀án də ba pɩ̀ʋ́
5 Ba-Yígúrə́-Jə-Tiu swɩ̀n, ʋ wʋ́:
«Nə̀ń lɛɛ nyɩɛn, tə nə wá yí Asiiri tɩ̀án,
ba mʋ̀, à lɩŋa dàʋ̀ tə!
Dangolu tə nə wulə ba jɩɩn wa,
yɩ à lɩŋa tə nə pupwin tʋtʋnzɩlɩ.
6 À tʋn ba lʋʋ nii nə,
kʋ nə yɩ cʋna lɩ̀à,
à sugu ba à kə lalʋʋ tə nə,
kʋ nə zɩ̀n à lɩŋa,
sə ba ta ba, ba vɩrɩ ba wiən,
ba ga nɩŋa ba də nɛɛ,
ndə coŋi yuu tɩtaran nə.»
7 Yá kʋ tà nətʋ nə Asiiri pɩ̀ʋ́ tì yoo tə,
ʋ pubʋŋa tà nətʋ kʋ yuu wa.
Cɩ́gá, ʋ yɩ ʋ bʋŋa sə ʋ cʋ̀gʋ̀,
ʋ pa lʋʋ dwíə́ kapʋpʋ nyʋn lá mɩ́ámɩ́án.
8 Cɩ́gá, Asiiri pɩ̀ʋ́ swɩ̀n, ʋ wʋ́:
«À kwatara yáá tɩ̀án tə
də pɛ̀gá mɛ tà won nədʋ naaa?
9 Yoo tə nə yí Kaləno tɩʋ tə,
kʋ tà kʋ mʋ̀ nə yí Karəkemiswə tɩʋ tə də naaa?
Yoo tə nə yí Hamatə tɩʋ tə,
kʋ tà kʋ mʋ̀ nə yí Arəpadə tɩʋ tə də naaa?
Yoo tə nə yí Samari tɩʋ tə,
kʋ tà kʋ mʋ̀ nə yí Damasə tɩʋ tə də naaa?
10 À jɩɩn wànɩ́ kʋ yí payun tə,
tə lɩ̀à nə pɩn dun woŋwanan nə,
yɩa nyɩnyɩga yà nə wulə lá,
kʋ doni Zwerizalɛmə də Samari.
11 Yoo tə à nə tʋn Samari də kʋ woŋwanan tə yɩra,
à bá tʋn kʋ Zwerizalɛmə də kʋ yɩa nyɩnyɩga tə yɩra naaa?»
12 Yá máŋá tə Yuu-Tiu nə wá tʋn ʋ tʋtʋŋɩ tə mama ʋ zwɛ̀, Siyon paan tə yuu wa də Zwerizalɛmə wa, ʋ wá kə Asiiri pɩ̀ʋ́ tə càn wa, ʋ fwìə́ tə, də ʋ yɩrʋ tə, də ʋ yigwənə tə yɩrɩ. 13 Cɩ́gá, Asiiri pɩ̀ʋ́ swɩ̀n, ʋ wʋ́:
«À vàn dɩ̀àn nə à ma tʋn,
kʋ twá də à wʋbʋŋa,
à nə jə pubʋŋa yɩrɩ.
À fwarɩ lʋʋ dwíə́ tə sɩswɩan,
à ga vɩrɩ ba jɩjə wiən.
Yá à babarɩ wa,
à pɩn pɛ̀gá cú ba padɛɛ yuu.
14 À ken à jɩɩn lʋʋ dwíə́ tə jɩjə wiən tə wa,
ndə ba nə kəni jɩɩn zunbiə pwalʋ wa nətʋ,
yá à pɛ̀ tɩa tə mama, ndə ba nə pɛ̀ cala tə
cə̀rú nə vɩga kʋ dʋgʋ nətʋ,
yá lìù mama wà ʋ vàn pəpəgə,
nə à yə̀ə́ ʋ súrí ʋ nii, ʋ ma swɩ̀n sʋgʋ.»
15 Dèrí yàá bʋ kʋ tɩ̀àn nə lìù tə jɩɩn wa,
ʋ nə ja kʋ ʋ goŋi wiən naaa?
Nə à yə̀ə́ sɩgɩrʋ yàá fwa yɩrʋ lìù tə jɩɩn wa,
ʋ nə ja kʋ ʋ tʋŋa naaa?
Kʋ tà dadɩlʋ nə yàá pa lìù tə nə zɩ̀n kʋ vəli!
Kʋ tà dangolu nə yàá zɩ̀n lìù tə nə tà dàʋ̀ yɩɩ nə!
16 Kʋ mʋ̀ nə pɩn Yuu-Tiu Ba-Yígúrə́-Jə-Tiu,
ʋ nə yɩ kwatara Yɩɩ wá pa
Asiiri pɩ̀ʋ́ kwatara tə nə curə,
ba ga yɩ ʋ dun won bwànɩ́,
yá mən wá də́ ba,
ndə gabɩa nə yàá kwé mən nətʋ.
17 Yɩzərayɛlə lɩ̀à poni tə wá jì mən,
ba Yɩɩ tə nə yɩ parɩ* wá jì mənvwə,
tə də́ Asiiri pɩ̀ʋ́ casʋran tə də ʋ səni tə,
tə cʋ̀gʋ̀ dɩɩn nədʋ cɩcɩ.
18 Tə wá də́ ʋ pún tə də ʋ tɩ̀án kárɩ́ tə dun
tə mama, tə cʋ̀gʋ̀ mɩ́ámɩ́án,
yá ʋ wá ya ndə yayɩŋʋ nə, ʋ dɩ̀àn nə zwɛ̀.
19 Ʋ pún tɩ̀án tə gɩganɩ tə wá ga mancɩn,
kʋ pa bisɩmabiə tətə wàá tə ʋ gàlɩ̀.
Yɩzərayɛlə lɩ̀à tə nə wá tɩ ba ga
20 Kʋ dɩɩn tə nə, Yɩzərayɛlə lɩ̀à gɩganɩ tə, də Zwakɔbə dìə̀ lɩ̀à tə nə wànɩ́ ba jon ba tɩ̀àn tɩan jɩɩn wa tə, kʋ́ʋ̀ ba jələ lìù tə yuu wa, ʋ yà nə mà ba. Ba dàń wá jələ Ba-Yígúrə́-Jə-Tiu, Yɩzərayɛlə lɩ̀à Yɩɩ tə yuu wa, ʋ nə yɩ parɩ*, də ba waa mama. 21 Gɩganɩ wa pìí kʋ bà, Zwakɔbə dìə̀ lɩ̀à tə gɩganɩ wá pìí ba bà Yɩɩ tə con, ʋ nə jə dɩ̀àn. 22 Yɩzərayɛlə lɩ̀à-ba, á dwíí tə nə swə ba dáá zənzən ndə mʋʋ nii kasɩlʋ nə, ba gɩganɩ mancɩn cɩcɩ nə wá pìí ba bà. Cɩ́gá, cʋcʋran sírí ken kʋ zwɛ̀, yá cɩ́gá cwəŋə wá tàá tɩa. 23 Yuu-Tiu Ba-Yígúrə́-Jə-Tiu, ʋ nə yɩ kwatara Yɩɩ nə wá tʋn cʋcʋran təntə, tə sírí nə ken tə zwɛ̀, ʋ pa tə nii sú lʋʋ nii tə mama wa.
Á dànà ká pa Asiiri tɩ̀án fən ja aba
24 Kʋ mʋ̀ yɩrɩ, nə̀ń kʋ tə Yuu-Tiu Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n, ʋ wʋ́: «Ooo á mʋ̀ à lalʋʋ tə nə wulə Siyon tɩʋ tə wa, á dànà ká pa Asiiri tɩ̀án fən ja aba! Ba mà aba də dàʋ̀, ba zɩ̀n ba dangolu yɩɩ nə, á yuu con, ndə Ezwipətə tɩ̀án yà nə tʋŋa kʋ nətʋ. 25 Yá kʋ ga mancɩn cɩcɩ, máŋá mancɩn wa, à lɩŋa tə nə pupwin wá tʋ, yá tə dàń wá zàn ba mʋ̀ yuu wa, tə cʋ̀gʋ̀ ba.» 26 Ba-Yígúrə́-Jə-Tiu, ʋ nə yɩ kwatara Yɩɩ wá kə kafɩʋ ba yɩra, ndə ʋ nə mà Madɩan dwíí tə Orɛbə pɩ̀ʋ̀ tə bwálɩ́ nə nətʋ. Ʋ wá zɩ̀n ʋ dadɩlʋ tə, ndə ʋ nə zɩ̀n kʋ mʋʋ tə yuu con, ʋ zɩgɩ Ezwipətə tɩ̀án nə nətʋ.
27 Kʋ máŋá tə wa,
ʋ wá zʋrɩ Asiiri pɩ̀ʋ́ zɩlɩ tə á para wa,
ʋ ga lɩ ʋ nɩan bɩan dàʋ̀ tə á bɩan wa.
Á wá nì á ywánɩ́ zənzən kʋ pa,
nɩan bɩan dàʋ̀ tə nə wulə á bɩan wa mumuni.
Dʋŋa bwə́lə́ Zwerizalɛmə tɩʋ tə
28 Dʋŋa yí Ayatə,
ba twá Migəron wa ba kɛ̀ń,
ba tún ba zɩla Mikəmasə nə.
29 Ba púə́ duən kwa, ba vu ba kɛ̀ń,
ba ken ba dəkuu bwálɩ́ Geba nə,
Rama tɩ̀án vɩvaga,
Sayulə tɩʋ Gibeya cə́n.
30 Mà bubwiə, Galimə tɩ̀án-ba,
Cɩa á tɩ̀àn nə, Layiswə tɩ̀án ba!
Nə̀ń Anatɔtə tɩ̀án yinəgə nyɩɛn!
31 Madəmena tɩ̀án laga duən yáá nə,
Gebimə tɩ̀án pɩ̀à yuu yikwala bwálɩ́.
32 Zə̀n kʋ tə, ba wá zɩgɩ Nɔbə nə,
yá ba fɩfaga jɩfʋa Siyon bʋ̀áa paan tə nii nə,
Zwerizalɛmə paan tə.
33 Nə̀ń Yuu-Tiu Ba-Yígúrə́-Jə-Tiu,
ʋ nə yɩ kwatara Yɩɩ pɩrɩ tɩ̀án nɛɛ də dɩ̀àn.
Ʋ goŋi nɛɛ nədaran tə,
ʋ dɩga nɛɛ tə nə wulə baan baan.
34 Ʋ ja dèrí ʋ ma cɛn pún tunə tə,
yá Liban pún tə tʋa
Yɩɩ tə nə wulə tə mɛ yuu wa jɩɩn də̀ń nəb.