Davidə nàʋ́ don yoo
11
1 Naywalʋ wá pɛ́n kʋ nan Zwese dəkuu tə yɩra,yá tapoo wá pɛ́n kʋ nan ʋ ŋʋnan tə yɩra,
kʋ zɩn lənə.
2 Ba-Yígúrə́-Jə-Tiu Siŋu* tə wá ya ʋ yuu wa.
Kʋ yɩ Siŋu tə nə pɩn wʋbʋŋa də pubʋŋa,
də kwìə̀ də wʋdɩʋ.
Kʋ pɩn lɩ̀à lwarɩ Ba-Yígúrə́-Jə-Tiu,
ba ga dəri ʋ fən.
3 Ka dəri Ba-Yígúrə́-Jə-Tiu fən nə wá ya ʋ fɩra won.
Ʋ bá ywàń kʋ tə ʋ yɩ́á nə na cɩcɩ,
ʋ ma bʋ̀rɩ̀ bʋra,
ʋ bá twá lɩ̀à nii sʋ̀ràn nə,
ʋ ma lɩ yìə̀n yáá.
4 Yá ʋ wá bʋ̀rɩ̀ zʋra bʋra,
ʋ pa ka tì cɩ́gá cwəŋə,
ʋ ga lɩ lʋʋ nii tə yinənyɩna yìə̀n yáá,
ʋ pa kʋ twá cɩ́gá nə, ndə kʋ nə mɛ nətʋ.
Ʋ wá mà lʋʋ nii tə də ʋ nii sʋgʋ,
ʋ ga gʋ wʋlʋnyɩna də ʋ nii vʋʋ.
5 Cɩ́gá cwəŋə wá ya ndə ʋ tàŋá voru nə,
ka ya pùə́ nədʋ tíú ga ya ndə ʋ titəŋi voru nə.
6 Cirəkurə də pəbiə wá ya bwálɩ́ nədʋ wa,
gwiə də bʋbiə də ga pə̀ń duən səpuni nə.
Ba wá kʋna nabiə də gəbala bwálɩ́ nədʋ wa,
yá bisɩmabiə nə wá yɩ̀rɩ̀ tə.
7 Nakan də kənyenkuru wá də́ bwálɩ́ nədʋ wa,
tə bɩ̀á ga pə̀ń yipaa bwálɩ́ nədʋ wa.
Yá gəru wá də́ gaʋ ndə naʋ nə.
8 Bìsɩ̀ná wá bwan bwana dəkwaa yipaa bwálɩ́ nə,
yá bisɩmabiə wá kə ʋ jɩɩn kapaa bʋʋ wa.
9 Yolwan, nə à yə̀ə́ cʋcʋran bá tʋn
à culu paan tə yuu mama wa.
Cɩ́gá, lɩ̀à wá lwarɩ Ba-Yígúrə́-Jə-Tiu,
tɩa yuu bwálɩ́ mama nə,
ndə nɩ́á nə súə́ mʋʋ nətʋ.
10 Kʋ máŋá tə wa,
Zwese dwíí dəkuu tə wá zɩgɩ yɩɩ nə,
ndə kʋ̀ʋ̀ mʋmʋnʋ nə,
kʋ pa lalʋʋ kapʋpʋ nə.
Lʋʋ dwíə́ tə wá pɩ̀à kʋ,
yá kʋ dəkuu bwálɩ́ tə wá ya dun bwálɩ́.
Yongaʋ lɩ̀à túrí yoo
11 Kʋ máŋá tə wa,
Yuu-Tiu kʋ́ʋ̀ wá te ʋ jɩɩn nɛɛ bələ nii nə,
sə ʋ ma jon ʋ lalʋʋ tə gɩganɩ tə
nə mɛn Asiiri nə, də Ezwipətə nə,
də Patərɔsə nə, də Kuswə nə,
də Elamə nə, də Swineyarə nə, də Hamatə nə,
də mʋʋ titəŋi lʋʋ níə́ tə wa.
12 Ʋ wá zɩ̀n kʋ̀ʋ̀ mɩmɩnʋ yɩɩ nə,
ʋ pa lʋʋ dwíə́ tə nə.
Ʋ wá pa Yɩzərayɛlə lɩ̀à tə nə jìgə̀ ywə́ŋə́,
bà duən yáá nə,
ʋ ga kə Zwida dwíí tə duən yáá nə,
ba yà nə laga lʋʋ sapara banɩa tə wa.
13 Efərayimə wʋgwɩʋ tə dàń wá zwɛ̀,
yá Zwida dwíí dʋŋa tə də kʋ́ʋ̀ bá ya lá.
Efərayimə dwíí tə wʋgwɩʋ tə wá zwɛ̀
Zwida dwíí tə yuu wa,
yá Zwida dwíí tə də kʋ́ʋ̀ bá zɩgɩ
Efərayimə dwíí tə nə.
14 Ba wá san duən nə,
ba twá Filisi tɩ̀án kwa con,
ba ta ba, yɩɩ yizwɩa con.
Ba wá san duən nə,
ba vɩrɩ yɩɩ yipɩan con dwíə́ tə.
Ba wá də́ dɩ̀àn Edomə tɩ̀án,
də Mʋabə tɩ̀án yuu wa,
yá Amon dwíí tə də wá sɛ̀ ba nii.
15 Ba-Yígúrə́-Jə-Tiu wá pa
Ezwipətə mʋʋ tə kʋ̀.
Ʋ wá zɩ̀n ʋ jɩɩn Əfəratə mʋnaa tə yuu con,
ʋ ga fwi vʋʋ də dɩ̀àn,
ʋ pa ka pwɛ̀ nacoŋi barpɛ,
ʋ pa lɩ̀à twá ka wa,
ba nan də ba nɛɛ natɩra.
16 Ʋ wá tún cwəŋə,
ʋ pa ʋ lɩ̀à tə gɩganɩ tə nə,
ba nə ga Asiiri lʋʋ nii tə wa,
ndə ʋ nə dí yáá ʋ tún ka don,
ʋ pa Yɩzərayɛlə lɩ̀à nə nətʋ,
máŋá tə wa, ba nə nan
ba yá Ezwipətə lʋʋ nii tə.