Wahyu i

Yesus nafbotin ber Yohanes na

Safe-safe ma keta rbotin na lere ma nma ne

Ngribatin Luryain

Tomwatar rfalak kitap ye feti kitap Wahyu. Kitap Wahyu ye isiny feti safe-safe ma keta rbotin na lere ma nma ne. Tomwate ma narengi kitap ye ngarany Yohanes. Noak ma Yohanes narengi kitap ye, i namin nus Patmos. Mangfaret Roma romat Yohanes fali nafbotin snyurat nof Ratu ma safe ma Yesus nfalak ber i, mpa ryebas i far nus Patmos (1:9).

Na kitap ye dalam Yohanes npaki kabanir yadin ma neluk faniak, ma i npaki tnyanuk pupular yadin a nbal. Kit ma tmorip lere ye masumput ma tkaul tal kabanir ma tnyanuk pupular a ne. Na kitap ye dalam Yohanes npaki angka 7 terik lain buty lim resin du. Iane nfatutu feti angka 7 ye angka ma ubany desar, ma to angka fen lese ma nlengan i.

Yohanes narengi surat ye ber soranyar ma ralele Ratu na pnuar itw ma ramin propinsi Asia. Sir a ne soranyar a na Efesus, Smirna, Pergamus, Tiatira, Sardis, Filadelfia ma Laodikia (1:4-11). Noak ma Yohanes narengi surat ye tomwatar ma ralele Ratu rkoman susar yadin. Mangfaret Roma ma to ralele Ratu rtean ma rsiksa sir. Tomwat Romar nir rayar rose felnir far dewayar betno ribut tomwatar ma rsatngur ber sir. Nempa tomwatar ma ralele Yesus to rmpeang ma rsatngur ber rayar mpa rayar a ne rsiksa ketnir nof sir ma ketnir e rfen sir a nbal (2:13; 6:9). Ma yadin nof sir a ne ramtaut nwayat ma ratliur Yesus (1:11; 19).

Ratu nfatutu kabanir ber Yesus ninr Ray Silai, ma Yesus nfatutu ber malaekat ma malaekat nfatutu ber Yohanes. Yesus nfalak ber Yohanes ma narengi kabanir monuk a ne na kitpar sa. Mpa Yohanes narengi kitap ye ma nafkoran tomwatar ma ralele Yesus nema kete rsue sir ma dedesar ma ralele Yesus boloka rkoman suse. Yohanes nfalak feti Yesus nafufu smwangat yatkar nir ulun nor ni manglartar monuk lo (20:10; 11:15). Yesus keta nukun smwangat yatkar nir ulun (20:1-4; 20:9-10). Ma I keta nukun sir monuk ma rsiksa Ni tomwatar a nbal. Tomwatar ma ralele Yesus a ne rmenang lo, ma keta rmorip dedesar ror Ratu.

Surat ye isiny

1:1-8 Yohanes ni ngribatin luryain

1:9; 3:22 Yohanes narengi surtar ber soranyar na pnuar itw

4:1; 5:14 Yohanes nsalan Ratu ma namtoran Ni kadere na surga

6:1; 8:1 Domba Anaky nalin kalin meterayar itw

8:2; 11:19 Malaekat ni terompet itw

12:1; 14:20 Fanikar sa ma nlie nlengan na langit

15:1; 16:21 Malaektar romat kompi itw

17:1; 19:10 Ratu nukun kote Babel ma namsos

19:11-21 Rayar sa nof rayar monuk nmenang a na prang na surga

20:1-15 Ratu nukun smwangat yatkar nir ulun ma ntetak mangmwatar nir ngriar

22:6-21 Penutup.