Snyurtar ber soranyar na Efesus
2:1-7
1 Ne Yesus Tomwate Anaky nfalak ber yakw:
“Ka murengi surat ber malaekat ma najake Ratu Ni soranyar na Efesus farye:
Ye snyurat nof Yakw ma limangw fian komat ftunar itw.
Ma kmpwan kof diryar itw ma rose rof mase ne nir letyar.
Diryar a ne ma faduk namin.
2 Yakw kufai mir karyayar monuk.
Ma kmi mkyarya ma myat a mlyai desar ma boloka mkyoman suse nempa msyabar ma mibare.
Yakw kufai nbal feti to mpyeang tomwat yatkar.
Ma tomwatar ketnir rfalak feti mangsidkwar sir safo tate.
Ma kufai feti kmi minaumat sir lo mpa mtyungan desar feti sir rlepusuk.
3 Yakw kufai feti kmi mkyoman suse fali mlyarat Yakw,
nempa kmi msyabar ma mibare suse ne.
Ma to msyue kmi ma dedesar ma milele Yakw.
4 Nempa Yakw kurese kmi fali to mikamis a kmi far luryain ma betno milele Yakw ne.
5 Mpa ka mfyenai feti mpyan sale desar lo.
Ma ka mtyate mir salar ma myorip farlan luryain ma betno milele Yakw ne.
Farlan to myose farane,
keta kmwa ma kal a kbwali diri ma faduk namin a ne kof ain.
6 Nempa mir ngamone namin a nbal,
iane feti kmi to mpyeang Nikolaus ni manglartar a ne nir adat.
Ma Yakw to kmpweang nir adat a nbal.
7 Mpa ka mdyengar fen ngamone safe ma Ratu Smwangtany nfalak ber soranyar na pnuar mpane:
‘Ma ise ma nafufu nal smwangat yatkar nir ulun,
keta kal kuase ber i ma nane katutun buany ma nal momorip ma namin Ratu Ni let Firdaus a ne.’”
Snyurat ber soranyar na Smirna
2:8-11
8 Ne Yesus Tomwate Anaky nfalak ber yakw:
“Ka murengi surat ber malaekat ma najake Ratu Ni soranyar na Smirna farye:
Ye snyurat nof Yakw.
Yakw ye ma luryain e kumin lo,
ma famudi e kumin a kbwal.
Yakw ye ma luryain e kmwat nempa kmworip a kbwali lo.”
9 Yakw kufai feti mkyoman suse ma miwatan.
Nempa ni botuan e kmi mioskai na Ratu sounlury.
Yakw kufai feti tomwatar rsoi lamain a kmi feti myose lan kabain yatkar.
Tomwatar a ne ma ryoding feti tomwat Yahudyar sir safo ni botuan e smwangat yatkar nir ulun ni soranyar ber sir.
10 Ka kete mimtaut susar ma keta mkyoman a ne.
Ni botuan e smwangat yatkar nir ulun nwayat ma tomwatar romat ketnir rof a kmi a ne ma rnau sir a na sel dalam.
I nose farane la nateman a kmi feti kmi milele botuan Yakw nre tate.
Suse ma kmi mkyoman a ne keta terik lere buti.
Mpa boloka kmi mkyoman suse terik ma myat,
nempa ka dedesar ma milele Yakw.
Farlan myose farane keta kal hadiah ber a kmi.
Hadiah ne iane myorip dedesar myor Ratu.
11 Mpa ka mdyengar fen ngamone safe ma Ratu Smwangtany nfalak ber soranyar na pnuar mpane:
“Ma ise ma nafufu nal smwangat yatkar nir ulun keta to nkoman suse na au dalam,
iane mamate fen lain du.”
Snyurat ber soranyar na Pergamus
2:12-17
12 Ne Yesus Tomwate Anaky nfalak ber yakw:
“Ka murengi surat ber malaekat ma najake Ratu Ni soranyar na Pergamus farye:
Ye snyurat nof Yakw ma smade nbie nof babangw,
smade ne ma luri mudy e nane.
13 Yakw kufai feti mimin ain ma smwangat yatkar nir ulun nfarete neluk rai.
Nempa kmi dedesar ma myeluk Ningw manglarat.
Ma boloka kmi msyalan ma tomwatar rfen Antipas na somirlury nempa kmi to mimsoal Yakw.
Antipas ye Ningw mangkaryayar sa ma dedesar ma nafwibar Ningw ngribatnir.
Sir rfen i a na Pergamus,
ain ma smwangat yatkar nir ulun nfarete tomwatar na iano.
14 Nempa Yakw to kswenang kor a kmi na ngriar ketnir ma farye:
Tomwatar ketnir nof a kmi a ne rlarat safe ma Bileam naftutu luryain a ne.
Noak a ne Bileam naftutu Balak ma nfule tomwat Israelar ma rose sale,
ma rane tnyamar ma rsompe ber ratw wawatar.
Ma naftutu Balak ma nfule sir a nbal ma ranronr.
15 Mpa kmi a nbal feleles farlan tomwat Israelar luryain a ne,
fali tomwatar ketnir nof a kmi a ne rlarat Nikolaus ni anftutwar.
16 Mpa ka mtyate mir salar!
Farlan to myose farane keta to dodo a nbal e,
Yakw kmwa ma kukmat a kmi,
ma keta kal smade ma namin babangw dalam ye la kpwet tomwatar ketnir rof a kmi ma rlarat anftutw walyetar a ne.
17 Mpa ka mdyengar fen ngamone safe ma Ratu smwangtany nfalak ber soranyar na pnuar mpane.
Ma ise ma nafufu nal smwangat yatkar nir ulun keta kal mannaa ma nane.
Ma manna ye lolone kumudim na surga.
Ma keta kal baty mafuty sa ber i.
Na bati ne rarengi ngar beberi ma to kekes a rafai,
lan tomwate ma nonri bati ne.”
Snyurat ber soranyar na Tiatira
2:18-29
18 Ne Yesus Tomwate Anaky nfalak ber yakw:
“Ka murengi surat ber malaekat ma najake Ratu Ni soranyar na Tiatira farye:
Ye snyurat nof Yakw Ratu Anaky ma matngur rfolur farlan au ma emngur e nfolur farlan ma rapu tembaga.”
19 Yakw kufai mir karyayar monuk.
Yakw kufai feti mikamis a kmi ma mimkoran ma milele Yakw.
Yakw kufai nbal feti boloka mkyoman suse na mir karyayar,
nempa msyabar ma mibare.
Ma kufai feti lere ye kmi mkyarya mlyengan myof luryain noak ma betno milele Yakw ne.
20 Nempa Yakw kurese kmi na ngrie lese ye feti kmi myinrang Isebel ma nfule Ningw soranyar nor ni anftutwar.
I nfule sir ma ranronr ma nfule sir a nbal ma rane tnyamar ma rloik ber ratw wawatar.
Isebel ye ma nyoding feti nabi i.
21 Yakw kal let ber i lo ma ntate ni salar,
nempa to ntate ni adat ma nanronr a ne.
22 La msyalan motak!
Keta kose ma to npote nal desar i.
Ma farlan tomwatar ma ranronr ror i a ne to rtate nir adat yatkar,
keta kose ma rkoman suse maberat desar.
23 Keta kfwen monuk bate ne ni manglartar.
Yakw kose farane nema Ningw soranyar monuk rafai feti;
Yakw ye ma kufai tomwatar dalmir ma nir andanwar.
Ma sir rafai nbal feti keta kbwalas tomwatar mpane klwarat safe ma sir rose.
24 Nempa ketnir nof a kmi ma mimin Tiatira ne,
to mlyarat anftutw yatak a ne.
Kmi to mlyangun anftutwar nof smwangat yatkar nir ulun.
Yakw kfwalak ber a kmi feti keta to ktwafal ngriwalyetar ma maberat ber a kmi a nbal.
25 Nempa ka dedesar ma mimkoran ma milele Yakw terik ma kmwa kbwali saryamprene ye.
26-27 Ma ise ma nafufu nal smwangat yatkar nir ulun ma nose nlarat Ningw mpempeang terik ler famudi,
keta kal kuase ma ber i.
Kuase ne feleles farlan ma Amangw nal ber Yakw.
Yakw kal kuase ne la nfarete nusar monuk.
Ma keta nukun tomwatar ma rose yatak maberat desar.
Ma ni kuase ma nukun tomwatar farane,
iane feleles farlan tomwatar ma rpaki tetekan fnutan la rbabal a rsose kudan ompak.
28 Ma Yakw keta kal ftun telyawar ma ber i a nbal.
29 Mpa ka mdyengar fen ngamone safe ma Ratu Smwangtany nfalak ber soranyar na pnuar mpane.