Snyurat ber soranyar na Sardis
3:1-6
1 Ne Yesus Tomwate Anaky nfalak ber yakw: “Ka murengi surat ber malaekat ma najake Ratu Ni soranyar na Sardis farye:
Ye snyurat nof Yakw ma Ningw kuase na Ningw smwangtar itw ma komat ftunar itw. Yakw kufai mir karyayar monuk. Ma tomwatar rsalan feti kmi myorip nempa ni botuan e smwangtimir rmat lo! 2 Ka mfyenai mbyali ma mifkoran dalmir ma milele Ratu. Kmi myose farane nema smwangtimir ma ketla rmat a ne rmorip a rbali. Yakw kfwalak farane fali kswalan feti mir karyayar a ne to fen lese ma nsor na Ratu sounlury. 3 Mpa ka minremi safe ma luryain ma raftutu ber a kmi ma mdyengar a ne lo. Ka myose mlyarat safe ma raftutu ne ma ka mtyate mir salar. Farlan to mfyenai mbyali keta kmwa ma kukmat a kmi, nempa to mifai feti bengfir e kmwa, fali keta myetrat motak ma kmwa farlan mangamnange. 4 Nempa ketnir nof a kmi ma mimin Sardis a ne mijake mir adat ma nangafel. Kmi mijake mir adat ma nangafel, iane feleles farlan tomwatar sa ma najake nir rabit ma nanglerap. Ma kmi keta mfyonak rabit mafutyar ma dedesar ma myor Yakw fali Ratu ntetak ber kmi farane lo. 5 Mpa ise bise ma nafufu nal smwangat yatkar nir ulun keta i nfonak rabit mafuti ma farane nbal. Keta to kwes kalin ngarany a nbie nof kitap momorip. Ma keta kyoding feti Ningw manglarat ber i na Amangw ma malaektar sonirlury.
6 Mpa ka mdyengar fen ngamone safe ma Ratu Smwangtany nfalak ber soranyar na pnuar mpane.”
Snyurat ber soranyar na Filadelfia
3:7-13
7 Ne Yesus Tomwate Anaky nfalak ber yakw: “Ka murengi surat ber malaekat ma najake Ratu Ni soranyar na Filadelfia farye:
Ye snyurat nof Yakw ma kunglerap ma kmworip e kumlonry. Ma Yakw komat rai Daud ni kukusi, iane Yakw Ningw kuase ma kfwarete na Ratu Ni ain farete. Mpa farlan kbwanril fofolat e, to tomwate fen lese ma bise nfolat. Ma farlan kfwolat e to tomwate fen lese ma bise nbanril. 8 Yakw kufai mir karyayar monuk. Msyalan, Yakw kbwanril fofolat ber a kmi ma keta to fen lese ma nfolat nal. Yakw kufai feti tomwat biase kmi motak ma tomwatar to releng a kmi, nempa myose mlyarat Ningw ngribatnir, ma to mimsoal Yakw. 9 No msyalan, keta kose ma smwangat yatkar nir ulun ni tomwatar ketnir rma ma rsatngur a na somirlury. Ma keta kose ma ryoding feti kmi ye Ningw tomwatar ma kwamis resi kmi. Sir a ne ma ryoding feti tomwat Yahudyar sir safo ni botuan e tate ma rlepusuk motak. 10 Kmi myose mlyarat Ningw faretar ma msyabar ma mibare mir suse ne. Iane nwayat ma keta kujake kmi nema to sasaf diat a kmi noak ma suse diat saryamprene ni kateman. Ma Ratu nose ma saryamprene ni kateman rkoman suse ma nteman tomwatar monuk na saryamprene. 11 To dodo e Yakw kmwa lo! Mpa ka mimkoran ma milele Yakw nema myonri hadiah. Ma kete myinrang tomwate fen lese nbal ma nal hadiah ne nof a kmi. 12 Mpa ise ma nafufu nal smwangat yatkar nir ulun, Yakw keta kose ma neluk diry fakoran na Ratu Ni Das Silai. Ma keta namin iane terik ma dedesar. Ma keta kurengi Ratu ma kswatngur ber I a ne ngarany na i. Ma keta kurengi Ratu Ni kote ngarany na i a nbal. Kote ne iane Yerusalem beberi ma keta ntompur nof Ratu. Ma keta kurengi Yakw ngarangw beberi na i a nbal.
13 Mpa ka mdyengar fen ngamone safe ma Ratu Smwangtany nfalak ber soranyar na pnuar mpane.”
Snyurat ber soranyar na Laodikia
3:14-22
14 Ne Yesus Tomwate Anaky nfalak ber yakw: “Ka murengi surat ber malaekat ma najake Ratu Ni soranyar na Laodikia farye:
Ye snyurat nof Yakw ma tomwatar rtar ngarangw feti Amen. Tomwatar bise ma ralele safe ma Yakw kfwalak fali kfwalak lan kabain botunar. Ma nalyole lan Yakw, Ratu nose saryamprene numur ni mparetar. 15 Yakw kufai mir karyayar monuk. Yakw kufai feti to mimsoal Yakw nbal, nempa kmi to mimkoran ma milele Yakw. Mpa kmi farlan weye ma to nrinririn ma to mefanas. Ni ngafele kmi myeluk weye ma nrinririn nre mefanas. 16 Kmi milele Yakw myor dalmir tubun farlan weye ma tutulin, mpa keta kumsoal kmi farlan ma kmwute kalin kmi monuk. 17 Ne mfyalak feti mioskai mpa to mpyerlu sasaf ma mir kabanir dengan lo. Nempa to mifai feti miwatan ma yore desar a kmi. Kmi mibol ma mimlus a nbal. 18 Iane nwayat ma kswurat a kmi nema msyelir mase myof Yakw nema mioskai. Mase ne ma tomwatar rapu terik ma neluk mas botuan. Ma ka msyelir kabain mafutyar myof Yakw nbal ma mfyonak nema kete mimlus ma myeat. Ma ka msyelir obat a nbal ma myonge matmir nema mikeban. 19 Tomwatar ma kwamis sir a ne, Yakw kswurat sir, ma kukun sir a nbal. Iane nwayat ma ka mifkoran dalmir ma mtyate mir salar a ne. 20 Msyalan! Kumdir fofolat ma kdwelak. Farlan tomwatar sa ndengar Yakw, ma nbanril fofolat a ne ber Yakw, keta ktwi dalam ma kor i. Ma keta madu a mtame. 21 Mpa ise ma nafufu nal smwangat yatkar nir ulun, keta kuftoran i ma nlosir Yakw, ma maktem a mfarete. Iane feleles farlan ma Yakw kufufu smwangat yatkar nir ulun lo, ma kumtoran klosir Amangw ma madu a mfarete.
22 Mpa ka mdyengar fen ngamone safe ma Ratu Smwangtany nfalak ber soranyar na pnuar mpane.”