Yohanes nsalan Ratu ma namtoran Ni kadere na Surga
4:1-11
1 Mpene kswalan kabar sa nbal.
Yakw kswalan e fofoltar sa ntakbanril na surga.
Ma kdwengar liliri farlan baluan ma kdwengar a ne.
Liliri ne farlan ma roup terompet.
Liliri ne nfalak ber yakw,
“Mwa ye,
ma kfwatutu ber ko na safe ma keta nbotin na lere ma nma ne.”
2 Metryat e Ratu Smwangtany nkuase yakw ma nor yakw far surga.
Na iane kswalan rai ni kadere sa,
ma tomwatar sa namtoran a na.
3 Tomwate ma namtoran kadere ne souny idak farlan batyar ma kotkir ma tomwatar rfalak feti permata yaspis ma permata sardis.
Ma wasbibine nbebar kadere ne,
ma idak farlan batyar sa ma kotkyan ma rfalak feti baty zamrud.
4 Ma kader walyetar buty du resi fat rbebar rai ni kadere ne.
Kaderar a ne feleles farlan rai ni kadere nbal.
Na kaderar a ne mangfarete buty du resin fat ramtoran a na.
Sir rfonak rabit mafutyar,
ma ratulu makot masar.
5 Ma fitik nbie nof kadere ma namin twalelean a ne,
ma kdwengar ma tarpake delak namimiri.
Ma obrar itw a rfolur na kadere ne souny,
iane feti Ratu Smwangtir itw.
6 Na kadere ne souny,
kabanir sa nbal farlan tasik ma namlin ma felany farlan kaca.
Na iane kabanir fat ma rmorip farlan binatngar ramdir a rkolu kadere ne.
Kabanir ma farlan binatngar a ne ma matnir yadin.
Matnir a ne nsor monuk tenir lury ma mudy.
7 Nof kabanir fat ma rmorip a ne,
pertama e farlan singa,
kedua e farlan sapi anak merwane,
ketiga e souny far tomwate,
ma keempat e farlan manik langam ma nturim.
8 Kabanir fat ma rmorip a ne leles mpane e slyapnir nenem.
Ma na slyapnir a ne burit dalam e nfen ber matnir.
Ma lere nronram e sir rdangin Ratu farye:
“Mya ma tdangin Ratu ninr Mangnrure ma ngarany nanglerap,
ma nkuase safe-safe monuk.
I ye ma namin nof luryain,
lere ye ma namin terik ma dedesar.”
9 Kabanir fat ma rmorip a ne dedesar ma rbeu dadangin la rdangin I,
ma rose alang ber I ma namtoran rai ni kadere ne.
I ye ma nmorip terik ma dedesar.
Ma noak ma rbeu bew dadangin ma farane,
10 mpe mangfarete buty du resin fat a ne rsatngur ber I ma namtoran rai ni kadere ne.
Ma sir rsatngur ber I ma nmorip terik ma dedesar.
Ne ralin nir makotar ma rnau na kadere ne souny ma rfalak:
11 O Ratu mamy Mangnrure Ko,
Ko ye Ratu ma msatngur ber Ko.
Lan Ko ye ma tomwatar rdangin Ko,
ma ralang Ko,
ma lan Ko ye ma mkuase safe-safe monuk.
Ma safe-safe monuk a ne ramin fali Ko mpweang ma ramin.
Iane nwayat ma Ko mose safe-safe monuk a ne.