Lan Domba Anak ma Ni kuase ma nbanril nal kitap ma nalulun a ne
5:1-14
1 Mpe kswalan I ma namtoran rai ni kadere ne,
ma limany fian e nomat kitap sa ma rlulun.
Ma na kitap ne tomwatar rarengi na burit dalam,
nempa to bise ma rbaca fali rkete ror meterayar itw.
2 Ne kswalan malaektar sa ma namkoran ma nfalere,
“Ise ni kuase ma nalin kalin meterayar a ne ma nbanril kitap ma rlulun a ne?”
3 Nempa to tomwate fen lese ma ni kuase ma nbanril nal kitap ma rlulun a ne ma nsalan dalam,
boloka tomwate ne nof surga,
nre saryamprene,
nre mangmwat anir.
4 Mpa yakw ktwasing ma kulol desar,
fali to tomwate fen lese ma nbanril nal kitap ne,
ma nsalan dalam.
5 Ne mangfaret sa nof mangfarete buty du resin fat a ne rfalak ber yakw:
“Ka kete mtwasing!
No mswalan,
tomwatar sa nafufu smwangat yatkar nir ulun lo.
I a ne ma tomwatar rtar feti singa nof nus Yehuda,
ma I nof rai Daud ni dasdalam.
I ye ma Ni kuase ma nalin kalin meterayar a ne ma nbanril kitap ma rlulun a ne.”
6 Ne yakw kswalan Domba Anak lese ma namdir a nlosir rai ni kadere ne.
Ma kabanir fat ma rmorip farlan binatngar,
ma mangfaretar a ne,
ramdir a rkolu I.
Domba Anak a ne sinryar sa namin I ma nfatutu feti lain sa ma rfen I lo.
Domba ne sornir itw ma matnir itw:
iane nfatutu Ratu smwangtir itw ma rsiduk sir a rti saryamprene ni kateman.
7 Mpene Domba Anaky a ne nti nal kitap ma rlulun a ne.
I nal kitap a ne nof tomwate ma namtoran a na rai ni kadere ne ni limany fian.
8 Noak ma Domba Anak a ne nti nal kitap ma rlulun a ne,
kabanir fat ma rmorip farlan binatngar,
ma mangfaretar buty du resin fat a ne,
rsatngur na sounlury.
Ma leles mpane romat kecapi ma kompi mase.
Kompi ne nfen ber natan ma angat ma nangafel.
Natan ma angat ma nangafel a ne iane sampangar nof Ratu Ni tomwatar.
9 Sir monuk a ne rbeu bew beberi sa farye:
“Lan Ko ye ma Nim kuase ma mwal kitap ma rlulun a ne
ma mwalin kalin meterayar a ne.
Lan Ko ma Nim kuase fali lain sa ma rfen Ko lo,
ma daram ma ntarbui a ne la mtwebus tomwatar.
Ko mtwebus sir nwayat ma sir reluk Ratu Ni tomwatar.
Tomwatar a ne rma rof mpenempen na saryamprene far ma rof nusar mpane,
liliryar mpane ma das matnir mpane.a
10 Ma Ko mose sir ma reluk Ratu Ni tomwatar,
ma mfwair sir ma reluk mangsompar,
nema rkarya ma rlangun Ratu,
ma keta rfarete reluk rai na saryamprene.”
11 Mpene kswalan malaektar yadin ma to krwekan kal desar sir ma kdwengar lirnir.
Ma malaektar a ne ramdir a rkolu rai ni kadere ne,
numur kabanir fat ma rmorip farlan binatngar,
ma mangfaretar buty du resin fat a ne.
12 Sir rbeu ror lirnir silai farye:
“Ye Domba Anak ma lain sa ma rfen I lo.
Ka weni I nonri kuase,
anoskai,
andaun ngamone ma fakoran.
Ma weni tomwatar rdangin ngarany ma kam malang I a nbal,
fali lan I ma ubany ma nonri dadangin.”
13 Ne kdwengar safe-safe monuk a ne lirnir a nbal.
Sir a ne ma ramin surga,
saryamprene,
mangmwat anir,
ma tasik.
Safe-safe monuk ma ramin mpenempen a ne rbeu farye:
“Kam mdangin I ma namtoran rai ni kadere ma Domba Anak a ne,
ka malang sir,
ma weni tomwatar rdangin ngarnir,
ma lan sir ma Nir kuase terik ma dedesar.”
14 Ma kabanir rfat ma rmorip farlan binatngar a ne rfalak,
“Amen!”
Ma mangfaretar a ne rsangitil ma rsatngur ber I.