Domba Anak nalin kalin meterayar nem
6:1-17
1 Mpene yakw kswalan Domba Anak nalin kalin meterai pertama nof meterayar itw ma namin kitap ma rlulun a ne.
Ne kdwengar liliry silai desar farlan tarpake delak ma nfalak,
“Mya ye!”
Iane kabanir sa liriny nof kabanir rfat ma rmorip farlan binatngar a ne.
2 Noak ma kswalan e kweban kud mafuty sa.
Ma tomwat sa nfangat kude ne ma nomat busir.
Ma ral makotar sa ber i ma neluk faniak feti i nmenang lo.
Ne i nmpan far lury ma nafufu ni muswar.
3 Mpene Domba Anaky a ne nalin kalin meterai kedua.
Ne kdwengar kabanir kedua liriny ma nfalak,
“Mya ye!”
4 Ne kud walyetar sa nma nbal.
Kude ne fuluny namemeye desar farlan au.
Tomwat sa nfangat kude ne.
Ratu nal kuase ber tomwate ne ma nose mimiri na saryamprene.
Iane nwayat ma sa nfen sa.
Mpe Ratu nal smad silayar sa ber i a nbal.
5 Mpene Domba Anaky a ne nalin kalin meterai ketiga.
Ne kdwengar kabanir ketiga liriny ma nfalak,
“Mya ye!”
Ne kswalan kud memetam sa.
Tomwate ma nfangat kude ne nomat timbangan.
6 Mpene kdwengar liliri ma nbie nof kabanir fat a ne twalelenir.
Liliri ne nfalak ber tomwate ne,
“Gandum ma nangafel kilo lese e kotkyan dinara lese.
Iane feleles farlan gandum ma to nangafel kotkyan kilwar tel.
Nempa kete mifyatak katutun zaitunar ma katutun anggurar.”
7 Mpene Domba Anaky ne nalin kalin meterai keempat.
Ne kdwengar kabanir keempat liriny ma nfalak,
“Mya ye!”
8 Ne kswalan kud walyetar sa nma nbal.
Kude ne fuluny nabulan.
Tomwate ma nfangat kude ne ngarany Mamate.
Ma kabanir sa nlarat i nof mudy.
Kabain a ne ma rtar feti Mangmwat Anir.
Ratu nal kuase ber sir ma rfen tomwatar seperempat na saryamprene.
Ketnir e rfen sir a na prang dalam,
ketnir e rmat fali ramlafar,
ketnir e rmat fali maningkyar diat sir,
ma ketnir e rmat fali binatang mangaresar rane sir.
9 Mpene Domba Anaky a ne nalin kalin meterai kelima.
Ne kswalan tomwatar yadin smwangtir a na snyomp ain lebaban.
Sir a ne ma tomwatar rfen sir fali rafwibar Ratu Ni ngribatnir ma fali ramkoran ma ralele Yesus.
10 Ne tomwatar smwangtir a ne rafwayak,
“O Ratu Mangnrur Silai Ko.
Ko ye ma Nim kuase silai ma nlie nlengan,
ma munglerap,
ma mumlonry!
Bengfir a betno mtwetak tomwatar na saryamprene ye nir ngriar ma mwukun sir ma rmat,
fali sir a ne ma rfen kam.”
11 Ne Ratu nal rabit melawas mafutyar mpane ber sir.
Ma I nfalak ber sir,
“Ka mnyengar motak ma rfen a kmi terik ma ti dengan monuk,
fali keta tomwatar rfen wamir ketnir ma miktem a mkyaryae Ningw karyayar a ne.
Sir keta rfen wamir a ne feleles farlan ma rfen a kmi.
Ma keta ni tewat ma ktwetak feti dengan lo betno kukun sir.”
12 Mpene kswalan Domba Anaky a ne nalin kalin meterai keenam.
Ne metryat e ruku silai desar.
Ma lere namemetam farlan nronram,
ma bulan namemeye farlan dare.
13 Ma ftunar na langit rfufw far saryamprene farlan ara buany matar ma ramtabar noak ma mnaur silai nayae sir.
14 Ne langit nalulun farlan kitap ma rlulun a ne,
ma buburir ma nusar monuk rtarpal rof anir.
15 Mpe tomwatar monuk na saryamprene ramtaut.
Sir a ne rayar,
tomwat melar,
suldadwar nir ulnir,
mangoskayar,
mangfaretar,
karwar ma tomwat biasar.
Sir monuk a ne rafla far buburir ma ramudim a na bangar ma na baty los dalmir.
16 Ne sir rafwayak ber buburir ma ber batyar a ne,
“Mfyufw ma mtyait kam!
Ma mtyeri kam nema I ma namtoran rai ni kadere ne kete nsalan kam,
ma Domba Anak a ne kete nukun kam.”
17 Fali nait ni tewat lo ma Ratu ma Domba Anaky rukun tomwatar.
Ma to tomwate fen lese ma nliak nal i nof sir.