Yudas ni surat
Ngribatin Luryain
Yudas narengi ni surat ye ber tomwatar ma ralele Yesus (1). Yudas ye Yakobus wainy ma Yesus wainy ber i a nbal (Mat. 13:55; Mrk. 6:3). I narengi surat ye nof ngarak 70-80. Kit to tafai kabanir yadin na Yudas, nempa nof surat ye kit tafai feti i ye mangnrur gereja sa ma soranyar ralang desar i.
I narengi surat ye la nafkoran soranyar ma ralele Ratu nempa to tafai feti soranyar a na mpe. Noak ma Yudas narengi surat ye tuanggurw lepuskwar ketnir rma ma rakmat soranyar ma rfule sir ror nir anftutw lepuskwar. Sir rfalak feti Ratu nfatutu Ni dalamy ngamone ma nfair sir lo mpa sir bise ma rose safe-safe motak rlarat nir makeus yatkar. Sir ramsoal Yesus ninr Ray Silai a nbal (4-8).
Yudas narengi surat ye nema soranyar dedesar ma ramkoran ma ralele Yesus ninr Ray Silai (17-23). I nsurat sir a nbal ma ka rajake sir rof tomwatar ma raftutu anftutw lepuskwar a ne (3-16). Surat ye isiny ketla feleles nor Petrus ni surat kedua.
Surat ye isiny
1-2 Yudas ni ngribatin luryain
3-16 Tuanggurw lepuskwar nir adat ma nir anftutw lepuskwar
17-23 Yudas nsurat soranyar ma ka dedesar ma ralele Yesus
24-25 Yudas nose alang ma ndangin Ratu.