Yohanes ni surat ketiga
Salam
1:1-4
1 Ye surat nof yakw ma kweluk mangnrur gereja.
Yakw kurengi surat ye ber Gayus ko ma kwamis ko kor dalangw kateman.
2 Waingw ma kwamis ko,
yakw kswampayang nema ko mungamon ma mumkoran motak farlan ma mumkoran ma mulele Ratu.
Ma safe-safe ma ko mkwaryae ne rangamon motak.
3 Yakw kswenang resi noak ma waninrar ketnir ma ralele Yesus rma e,
rafbotin feti ko mworip a mlwarat Ratu Ni anftutw botunar.
Ma sir rfalak feti ko dedesar ma mworip a mlwarat Ratu Ni anftutwar.
4 To ngrisasaf ma nose ma dalangw a nsenang resi lan ngrie ye iane:
yakw kdwengar feti angkur ma kwamis sir a ne rmorip a rlarat anftutw botunar.
Ka tlangun sir ma rafwibar Ibar Ngamone
1:5-8
5 Waingw ma kwamis ko,
safe ma ko mose ne nangafel ma mfwatutu feti ko mularat liry,
fali mlangun waninrar ma ralele Yesus boloka to mufai sir a fuky.
6 Ma ketnir nof sir a ne rma ma rafbotin ber soranyar na ye feti ko mkwamis resi sir.
Ma yakw ktwak nema farlan mtungan sir a nbal e,
ka dedesar ma mtwulung sir a na nir mpampane.
Ko mose farane iane mufsenange Ratu dalamy.
7 Fali na nir mpampane noak ma rafwibar Ibar Ngamone na Yesus ninr Ray Silai,
sir to ronri sasaf rof tomwatar ma to rafai Ratu.
8 Iane nwayat ma kit ma talele Yesus ninr Ray Silai ka tulung sir a na nir perluar.
Kit tose farane iane feti torang sir ma tafwibar Ratu Ni anftutw botunar.
Kete tlarat Diotrefes ni wewelmpampane nempa ka tlarat Demetrius ni wewelmpampane
1:9-12
9 Yakw kurengi surat ber soranyar lo,
nempa Diotrefes to nalang desar kam fali nmpeang ma neluk ulun ber soranyar.
10 Mpa farlan yakw kmwa e,
keta kfwalak monuk ni adat yatkar ma nose ber kam,
fali nfalak lan kabain lepuskwar na kam.
To lan iane nempa to nlangun waninrar ma rafwibar na Yesus ninr Ray Silai nbal.
Ma nlengan e nose nteri tomwatar ma rmpeang ma rlangun waninrar a ne,
ma sir ma rlangun waninrar a ne nalin sir a rbie soranyar.
11 Waingw ma kwamis ko,
ka mlwarat tomwate ma nose kabain ngamonar ma kete mlwarat tomwate ma nose kabain yatkar.
Ni botuan e tomwate ma nose kabain ngamonar,
i a ne Ratu anaky,
nempa tomwate ma nose kabain yatkar,
i to nafai desar Ratu.
12 Tomwatar ma ralele Yesus rdangin Demetrius ma rfalak feti nangamon fali safe ma i nose ne nfatutu feti nlarat Ratu Ni anftutw botunar.
Ma kam a nbal e mfalak ni ngamone,
ma ko mufai feti safe ma kam mfalak a ne botuan.
Penutup
1:13-15
13 Ni botuan e lolone ngriar yadin ma kufbwotin ber ko,
nempa ni ngafele e to kurengi na surat ye dalam.
14 Ma yakw kulele feti bise ma kutungan desar kor ko,
ma tadu a tatanuk.
15 Yakw ktwak ma weni Ratu nal maline ber ko.
Ma waninrar ma ralele Yesus ma ror yakw na ye rkirim salam ber ko.
Ma mfwalak salam ber waninrar mpane na iane nbal.
Nater lan ye.
Salam nof yakw,
Yohanes.