Tnyanuk pupule na tomwate ma nyefar fini
13:1-9
1 Na lere ne nbal Yesus nti a ntate das a ne,
ma nti namtoran twemul Galilea seriny.
2 Ma tomwatar yadin rma iane ma ramdir a rkolu Yesus.
Iane nwayat ma I nfangat far kumal ma namtoran,
ma tomwat ngayadin a ne ramdir twemul seriny.*
3 Mpene Yesus naftutu ngriar yadin ber sir nor tnyanuk pupule.
I nfalak farye:
“Ler sa e mangosbo sa nti letar ma nyefar fini.
4 Noak ma nyefar finyar a ne,
ketnir rfufw a na lalate,
ne mangkyar rma ma rane rafere.
5 Ketnir e rfufw na ompak bati,
ne manrilak ma ratrump fali ompak manisik.
6 Nempa noak ma lere mefanas e raplai ma rmangret fali wakrir rsaup ompak das motak.
7 Ketnir a nbal e rfufw a na skiki kakari dalam,
ne ratrump ror skiki kakari ne ma rmpalam sir nwayat ma rmat.
8 Nempa ketnir a nbal e rfufw na ompak mpariang mpa ratrump ma rabu.
Ketnir e bunir buty tel,
ketnir e buty nem,
ma ketnir a nbal e rati.”
9 Ne nfalak a nbal,
“Ka mdyengar fen ngamone safe ma kfwalak ye!”
Yesus nfalyole ber Ni manglartar feti safema naftutu Ni tomwatar nor tnyanuk pupule
13:10-17
10 Mpe Yesus Ni manglartar rma ma rakmat I ma renrat,
“Maken,
safema dine muftutu tomwatar a ne mor tnyanuk pupule?”
11 Ne Yesus nfalak ber sir,
“Ratu nal andaun ngamone ber a kmi lo ma mkyaul myal safe ma tomwatar to rafai fuky.
Iane feti keta Ratu neluk Rai ma nfarete tomwatar na saryamprene felan farpe.
Nempa I to ninrang ma tomwat walyetar rkaul ral anftutwar a ne.
12 Fali tomwate ma nlangun Ratu Ni ngribatnir keta Ratu nose ma nkaul nal,
nwayat ma ntafal ma nkaul nal Ni ngribatnir a ne nbal.
Nempa tomwate ma to nlangun Ratu Ni ngribatnir,
ma boloka nkaul nal lan rufuky,
keta Ratu nkokap ni andaun a ne,
ma ntafal ma to nafai sasaf na Ratu Ni ngribatnir.*
13 Iane nwayat ma kuftutu tomwatar yadin kor tnyanuk pupule,
fali boloka rsalan nempa to rafai feti rsalan safe.
Ma boloka rdengar nempa to rafai feti rdengar safe ma to rkaul ral isiny.
14 Safe-safe monuk ma diat tomwatar a ne la rafdiat safe ma luryain e Ratu nfalak ber nabi Yesaya.
Ratu nfalak na Kitap Lelerap dalam farye,
‘Kmi dedesar ma mdyengar safe ma kfwalak
nempa to mkyaul myal safe ma mdyengar a ne,
ma dedesar ma msyalan safe ma Yakw kose,
nempa to mkyaul myal safe ma msyalan.*
15 Fali dalmir a raktem lo,
ma repat matnir ma tlingnir,
nema kete rsalan ma rdengar,
ma ka rkaul ral a na dalmir.
Sir rose farane nema kete rbali sir ber Yakw,
ma kufngamone sir.’”
16 Ne Yesus nfalak ber Ni manglartar,
“Ngamone ber a kmi fali msyalan kabanir ma Yakw kose ma mdyengar Ningw anftutwar a ne.
17 Yakw kfwalak ber a kmi:
luryain e nabyar yadin ma tomwatar ma rose kabain botunar a ne rmpeang ma rsalan safe ma msyalan lere ye nempa to bise ma rsalan.
Ma sir rmpeang ma rdengar safe ma kmi mdyengar nempa to bise ma rdengar.”*
Yesus nfalyole tnyanuk pupule na tomwate ma nyefar fini
13:18-23
18 Yesus nfalak a nbal,
“Ka mdyengar fen ngamone ma kfwalyole tnyanuk pupule na tomwate ma nyefar fini:
19 Finyar ma rfufw na dalamtene farlan tomwatar ma rdengar anftutwar na Ratu neluk Rai ma nfarete tomwatar nempa to rkaul ral.
Ne smwangat yatkar nir ulun nma ma nal ngribatnir a ne nof dalmir.”
20 Finyar ma rfufw na ompak bati ne farlan tomwatar ma rdengar Ratu Ni ngribatnir ma rlangun desar ror dalmir senange.
21 Nempa Ratu Ni ngribatnir a ne to nawakar na dalmir ma to ramkoran,
mpa ralele Ratu e to dodo.
Ma farlan rkoman suse nre tomwatar rsil a rbabal sir fali rlarat Ratu Ni ngribatnir a ne,
keta sir ratliur Ratu desar.
22 Ma finyar ma rfufw a na skiki-kakari dalam,
iane farlan tomwatar ma rdengar Ratu Ni ngribatnir,
nempa dalmir suse ma rdaun lan nir momorip ma nir anoskai.
Kabanir monuk a ne rose rteri nir andanwar,
mpa Ratu Ni ngribatnir a ne to ubany na nir momorip nwayat ma to rose ral nir adat ngamonar.
23 Ma finyar ma rfufw na ompak mpariang a ne,
farlan tomwatar ma rdengar Ratu Ni ngribatnir ma rkaul ral.
Ma sir rose rlarat ngribatnir a ne mpa ubany desar na nir momorip.
Iane feleles farlan finyar a ne ratrump ma rabu.
Ketnir e rabu terik lain buty tel,
ketnir e rabu terik lain buty nem,
ma ketnir a nbal e rabu terik lain rati.
Tnyanuk pupule na rie ma nma das nor gandum
13:24-30
24 Mpene Yesus nasaur tnyanuk pupule sa nbal.
I nfalak,
“Noak ma Ratu neluk Rai ma nfarete tomwatar e feleles farlan mangosbo sa nose ni let gandum.”
Ne nti nyefar finy ngamonar na ni lete ne.
25 Ni nronram sa e noak ma tomwatar rarwa,
tomwat sa ma nkedan mangosboe ne,
nti let gandum a ne ma nyefar ri fusyar a na nbal.
26 Noak ma gandum a ne ratrump ma rose ma ratberi,
ne riar a ne ratrump a nbal.
27 Mpe mangosboe ne ni mangkaryayar rti rakmat i ma renrat,
“Maken,
ko myefar finy ngamonar ma safema riar ratrump a nbal ye?”
28 Ne mangosboe ne nfalak,
“Tomwatar sa ma nkedan yakw ma nose farane.”
Mpe mangkaryayar a ne rfalak,
“Maken,
mpweang ma kam mpal riar a ne e?”
29 Mangosboe ne nfalak,
“Kete.
Farlan mpyal riar a ne keta gandum rtarpal a nbal.
30 Msyalan lonri motak ma riar ma gandum ma rma das terik ma tal let isnir.
Na lere ne keta klwuan ningw mangkaryayar ma ral let isnir a ne ma rabutin riar a fuky,
betno rkete ma rapu.
Lama rose farane,
klwuan ma rabutin gandum a ne na afyamping ain betno rnau na ningw lumbung.”
Tnyanuk pupule na fini ma marumat desar ma ragi
13:31-35
31 Mpene Yesus nasaur tnyanuk pupule sa nbal ber tomwat ngayadin farye:
“Ratu neluk Rai ma nfarete tomwatar feleles farlan sasawi batina ma marumat desar ma tomwatar sa nal ma ntanam na ni lete.
32 Sasawi batin ye marumat desar nof finyar monuk.
Nempa noak ma natrump e silai i a nlengan nof sayorar monuk,
ma keta neluk katutun.
Iane nwayat ma mangkyar rti rose nir ngengyar a na sangnir.”
33 Ne Yesus nfalak tnyanuk pupule nbal ber tomwat ngayadin,
“Noak ma Ratu neluk Rai ma nfarete tomwatar,
iane feleles farlan ragi ma batar sa nal betno nabali nor terigu ma silai terik ma nbar monuk.”
34 Yesus naftutu tomwat ngayadin a ne nor lan tnyanuk pupule.
I to lain sa ma naftutu tomwatar e to nal tnyanuk pupule.
35 I nose farane la nafdiat safe ma luryain e,
nabyar rfalak:
“Yakw kuftutu sir kor tnyanuk pupule,
ma kufbwotin kabanir ma tomwatar to rafai nof luryain a ne fuky,
noak ma Yakw kose saryamprene.”*
Yesus nfalyole tnyanuk pupule na rie ma natrump nor gandum
13:36-43
36 Lama Yesus naftutu monuk tomwat ngayadin a ne,
I nti a ntate sir ma nbali I far das ma namin a ne.
Ne Ni manglartar rma ma rfalak ber I,
“Maken,
no mfwalyole tnyanuk pupule na rie ma natrump nor gandum a ne isiny ber kam.”
37 Ne Yesus nfalak,
“Tomwate ma nyefar finy ngamone,
I a ne Yakw,
Tomwate Anaky.
38 Lete ne nfatutu saryamprene.
Ma finy ngamone ne nfatutu Ratu Ni tomwatar.
Ma riar e nfatutu smwangat yatkar nir ulun ni tomwatar.
39 Tomwate ma nyefar ri fusyar a ne nfatutu smwangat yatkar nir ulun.
Ma ni tewat ma ral let isnir e nfatutu lere ma Ratu ntetak tomwatar nir ngriar.
Ma tomwatar ma ral let isnir a ne rfatutu malaektar.
40 Riar ma rabutin ma rapu ne feleles a nbal farlan safe ma keta diat tomwat yatkar noak ma Ratu nukun saryamprene.
41 Yakw,
Tomwate Anaky keta klwuan Ningw malaektar ma rafburat tomwatar monuk ma rwayat ma tomwat walyetar rose sale,
ma tomwatar monuk ma rose kabain yatkar.
Ma rakese sir nof Ningw tomwatar ma kweluk rai ber sir a ne.
42 Ma keta ryebas sir monuk far au ma nfolur dedesar a ne.
Na iano keta sir rtasing ma rkoman suse maberat desar.
43 Noak a ne tomwatar ma rose rlarat Ratu Ni mpempeang,
keta nir snyain idak farlan lere ma nbet,
iane lere ma Amnir Ratu nfarete neluk Rai.
Mpa ka mdyengar fen ngamone safe ma kfwalak ye!”
Ratu neluk Rai ma nfarete ninr momorip iane farlan kit tonri kabanir ma kotkir
13:44-46
44 Wangur,
farlan Ratu neluk Rai ma nfarete tomwatar iane farlan tomwatar sa ma nonri kabanir ma kotkir.
Iane farlan tnyanuk pupule farye:
“Tomwatar sa nkeban kabanir ma kotkir na ompak dalam.
Ma nkal ompak ma namudim a nbali kabanir a ne.
Ma fali dalamy nsenang resi nwayat ma nti nfenri monuk ni kabanir betno nbali i ma nselir ompak ma kabanir ma kotkir ramin a ne.
45 Ma Ratu neluk Rai ma nfarete tomwatar keta feleles a nbal farlan tnyanuk pupule ye:
Mangafenry kabanir sa ma nanriak mutiara ma kotkyan.
46 Noak ma i nkeban mutiara ma kotkyan a ne,
i nti nfenri monuk ni kabanir betno nbali i ma nselir mutiara ne.”
Tnyanuk pupule na fuat
13:47-50
47 Yesus nfalak a nbal,
“Noak ma Ratu neluk Rai ma nfarete tomwatar iane farlan tomwatar ma ryebas nir fuat na twemul ma rtei inar felnir mpane.
48 Lama fuat a ne ntey inar yadin e sir rakrabut fuat a ne far da.
Mpe sir ramtoran ma rasisi inar a ne,
ian ngamonar e rnau na loyang ma yatkar e ryebas.
49 Iane feleles farlan na ler famudi nbal.
Keta malaektar rma ma rakese tomwat yatkar rof tomwatar ma rose rlarat Ratu Ni mpempeang.
50 Mpe keta ryebas tomwat yatkar a ne far au ma nfolur dedesar.
Na iano sir keta rtasing dedesar ma rkoman suse maberat desar.”
Anftutw wangim ma anftutw beberi feleles nor kabain beberi ma kabain wangim
13:51-52
51 Ne Yesus nenrat Ni manglartar,
“Kmi mkyaul myal tnyanuk pupular monuk ma kfwalak ber a kmi a ne e?”
Ne sir rfalak,
“Au,
kam mkaul mal!”
52 Ne Yesus nfalak ber Ni manglartar,
“Mangaftutu Musa ni faretar ma rkaul ral lo feti Ratu keta neluk Rai ma nfarete tomwatar,
sir farlan das nruany ma nalin kalin ni kabanir ma rawangim ma beberyar nof ain ma nau ni kabanir a nab.”
Tomwat Nasaretar rasipur Yesus
13:53-58
53 Lama Yesus nasaur monuk tnyanuk pupular a ne,
I nti a ntate ain a ne.
54 Ma nbali I far Ni pnue sori.
Na iano I naftutu tomwatar na tomwat Yahudyar nir das sampangar.
Tomwatar ma rdengar Ni anftutwar a ne rampriang desar ma rfalak,
“Ise ma naftutu I nwayat ma Ni andaun nangamon desar ye?
Ma ise ma nal kuase ber I a nbal ma nose kabain mpasalnar ye?
55 I ye amany tukang motak nre!
Ma enany ber Maria ma wanir ber Yakobus,
Yusuf,
Simon,
ma Yudas nre!
56 Ma urnir e ror kit a nbal na pnue ye nre!
Ma I nonri andaun ngamone ma kuase ne nof mpe?”
57 Iane nwayat ma to rmpeang ma ralele Yesus.
Mpe Yesus nfalak ber sir,
“Nabyar sa biase nti mpenempen motak e tomwatar ralang i.
Nempa na ni pnue sori ma ni dasdalam e to ralang i.”*
58 Ma fali sir to ralele Yesus mpa I to nose ngrimpasalan yadin ber sir.