Batar ma rlangun Yesus
8:1-3
1 To dodo a nbal e,
Yesus nmpan a nlole kotar ma pnuar ma nafwibar Ibar Ngamone feti keta Ratu neluk Rai ma nfarete tomwatar.
Ni manglarat buti resin du a ne rmpan a rlarat I.
2 Ma batar ketnir ma Yesus nafngamone nir maningkyar ma natian kalin smwangat yatkar nof sir a ne rlarat I a nbal.
Batar a ne Maria ma rtar feti Magdalena.a
I ye ma Yesus natian kalin smwangat yatkar itw nof i.*
3 Sa nbal e,
Yohana (Yohana ye Khuza sawany ma Khuza ye Herodes ni mangomat doit),
sa nbal e ngarany Susana numur bat walyetar yadin a nbal.
Batar ye koko sir a ral nir dotyar ma rlangun Yesus nor Ni manglartar.
Tnyanuk pupule na tomwate ma nyefar fini
8:4-8
4 Tomwatar rof kotar yadin rti rakmat Yesus dedesar.
Noak ma tomwatar rtafal ma yadin sir e,
Yesus nasaur tnyanuk pupule farye:
5 “Mangosbo sa nti nyefar fini na ni lete.
Noak ma nyefar finyar a ne,
ketnir rfufw a na lalate.
Ne tomwatar ma rlanre rof a ne rtai sir,
ma ketnir a nbal e,
mangkyar rane rafere.b
6 Finyar ketnir e rfufw a na ompak bati.
Nait ma ratrump e,
raplai fali ompak a nmangretw.
7 Ketnir a nbal e,
rfufw na skiki-kakari dalam.
Ne ratrump ror skiki-kakari ne,
mpa skiki-kakari rmpalam sir nwayat ma rmat.
8 Nempa finyar ketnir a nbal e,
rfufw a na ompak mpariang,
ne ratrump e rangafel,
ma nait ma rabu e,
nresy ntaul desar.”c
Yesus nasaur monuk e I nfalak,
“Ka mdyengar fen ngamone safe ma kfwalak ye!”
Yesus nfalyole tnyanuk pupule isiny na tomwate ma nyefar fini
8:9-15
9 Yesus Ni manglartar renrat I feti tnyanuk pupule ye isiny farpe.
10 Ne Yesus nfalak ber sir,
“Ratu nal andaun ngamone ber a kmi lo ma mkyaul myal safe ma tomwatar to rafai fuky.
Iane feti keta Ratu neluk Rai ma nfarete tomwatar na saryamprene felan farpe.
Nempa ber tomwat walyetar Yakw kfwatutu ngrie ne kor tnyanuk pupule,
nema boloka rdengar nempa to rafai isiny,
ma rsalan nempa to rkaul ral sasaf.*
11 Tnyanuk pupule ne isiny farye:
Fini ne Ratu Ni ngribatnir.
12 Finyar ma rfufw a na lalate ne,
farlan tomwatar ma rdengar Ratu Ni ngribatnir,
nempa smwangat yatkar nir ulun nma ma nal ngribatnir a ne nof dalmir,
ne sir to ralele,
mpa Ratu to nfair sir.
13 Finyar ma rfufw a na ompak bati,
farlan tomwatar ma rdengar Ratu Ni ngribatnir,
ma rlangun ror dalmir senange.
Nempa to ramkoran ma ralele Ratu,
ma farlan katutun ma to nawakar.
Noak ma anteman a nma e sir ratliur Ratu.
14 Finyar ma rfufw a na skiki-kakari dalam,
farlan tomwatar ma rdengar Ratu Ni ngribatnir,
nempa dalmir suse ma rdaun lan nir momorip,
nir anoskai ma nir senange.
Kabanir monuk a ne nose ma ratngup,
nwayat ma to ubany ma rdengar Ratu Ni ngribatnir a ne.
15 Ma finyar ma rfufw a na ompak mpariang a ne,
farlan tomwatar ma rdengar Ratu Ni ngribatnir ma rnau na dalmir.
Sir ye ma rlarat dedesar Ratu Ni ngribatnir ma na nir momorip e rose lan ngamone.”
Tnyanuk pupule na damar ma rsungap i
8:16-18
16 “Tomwatar to rtutun damar,
betno ral ngusi la rsungap i,
nre rnau na koi lebaban.
Nempa ka rtikloi damar na impan nema tomwatar rma das dalam e rkeban ngaodir.*
17 Farlan safe-safe monuk ma ramudim a ne,
keta Ratu nafbotin.
Ma safe-safe monuk ma tomwatar to rafai keta I nfatutu ber sir.*
18 Mpa mdyengar fen ngamone safe ma kfwalak.
Ise nmpeang ma nafai yadin ma nkaul nal Ratu Ni ngribatnir,
la Ratu nal andaun ngamone ber i ma ntafal ni anfai.
Nempa ise ma to nmpeang ma nafai,
la Ratu nkokap ni andaun nema ntafal ma to nafai sasaf.”*
Tomwatar ma rmpan a rlarat Ratu Ni ngribatnir sir farlan Yesus enany ma wanir
8:19-23
19 Ler sa e,
Yesus enany ma wanir rma ma rakmat I nempa to let ma rti rait I,
fali tomwatar yadin.
20 Mpa tomwat sa nfalak ber I,
“Maken,
anoi ma wamyar a ramin burit a no,
sir rmpeang ma ratungan ror Ko.”
21 Nempa Yesus nfalak,
“Tomwatar ma rdengar Ratu Ni ngribatnir ma rmpan a rlarat,
sir a ne enangw ma wangur.”
Yesus nafline mnaur uman
8:22-25
22 Na ler sa e,
Yesus nor Ni manglartar rfangat kumal,
ne Yesus nfalak ber sir,
“Mya ma ti twemul balisya.”
Ne raktem a rti.
23 Lolone let e,
Yesus narwa lo.
Metryat farye mnaur uman nma twemul a ne,
mpa weye nti kumal a ne dalam nwayat ma ketla ratloram.d
24 Yesus Ni manglartar rpangun I ma rfalak,
“Tuangguru,
Tuangguru,
mpwote Ko koli ketla tmat!”
Ne Yesus npote I ma ntampu mnaur ma nerar ma rafefar a ne.
Mnaur ma nerar a ne rtolar sir ma twemul a ne namlin desar.
25 Ne Yesus nfalak ber sir,
“Kmi to milele Yakw e?”
Sir rampriang ma ramtaut.
Ma raenrat sir,
“Tomwate ye ise I,
mampe mnaur ma nerar ye rlarat Ni farete?”
Yesus natian kalin smwangat yatak nof tomwat Gerasa sa
8:26-39
26 Yesus nor Ni manglartar rafla raloran ma rti rsaran a na nus Gerasa,e
na twemul Galilea balisya timur.
27-29 Lama Yesus ntompur far da e,
merwan sa nof kote ne nti nakmat Yesus.
Tomwate ne smwangat yatkar rsung i ma namlus doan ye lo.
I to namin das ma namin lan bangar,
iane kubur anir.
Smwangat yatkar biase raklibur i.
Iane nwayat ma ral rewe la rkete limany emany ma rajake i,
nempa bise ma nosit.
Ma smwangat yatak nor i far ain tatutuk.
Noak ma nsalan Yesus e,
i nafwayak ma nsatngur a na Yesus sounlury.
Mpa Yesus natian kalin smwangat yatkar a ne nof i.
Ne smwangat yatkar a ne rfalak,
“Hei Yesus!
Ratu Anaky Mangamin medase Ko!
Mpweang ma mose farpe yakw?
Kete mswiksa yakw nrela!”
30 Ne Yesus nenrat i,
“Ngaram ise?”
I nfalak,
“Legion.”
(Legion isiny feti yadin fali smwangat yatkar yadin a rsung i.)
31 Mpene smwangat yatkar a ne raloloi sir ma rtak Yesus,
nema kete natian sir far tetebin mamate.
32 Sesedin ain a ne babyar yadin ranriak nir tnyame na bubuar lebaban.
Ne smwangat yatkar a ne rtak Yesus ma rfalak ber Yesus nema ninrang sir ma rsung far babyar a ne,
mpa Yesus ninrang sir.
33 Mpe smwangat yatkar a ne rbie rof tomwate ne,
ma rsung babyar a ne.
Ne babyar a ne rafla ma rputuk rof tetebin far twemul dalam,
ne rlonrur ma rmat.
34 Mangajak babyar rsalan farane rafla ma rti rasaur ngrie ne na kotar ma pnuar seriny baldu.
35 Tomwatar ma rdengar ansaur a ne rafla rbie rof kotar ma pnuar ma rsalan ngrie ma Yesus nose ne lo.
Lama rait e,
rsalan tomwate ma smwangat yatkar rbie rof i a ne,
namtoran a nlosir Yesus emnir.
Nfonak i ma ni andaun nangamon lo,
mpe sir ramtaut.
36 Tomwatar ma rsalan desar ngrie ne,
rasaur ber tomwat walyetar na Yesus ma nafngamone tomwate ma smwangat yatkar rsung i a ne.
37 Ne tomwatar monuk na nus Gerasa rtak desar Yesus,
ma weni nbie nof sir fali ramtaut resi.
Mpa Yesus nfangat kumal ma nbali I far Galilea.
38 Tomwate ma smwangat yatkar a rbie rof i a ne,
ntak Yesus ma nlarat I a nbal.
Nempa Yesus nfalak ber i,
39 “Mbwali ko far nim das ma musaur safe ma Ratu nose ber ko a ne lo.”
Ne tomwate ne nti nlole monuk kotar ma nasaur safe-safe monuk ma Yesus nose ber i a ne.
Yesus nafmorip Yairus anaky ma nafngamone batar sa ma ni olimpane nma e to nater
8:40-56
40 Lama Yesus nbali I nof twemul balisya,
tomwatar yadin rkakal I fali sir monuk rdaf I lo.
41 Mpene tomwat sa nma,
ngarany Yairus.
I ye ulun na das sampayang na ain a ne.
I nsatngur a na Yesus sounlury ma ntak naloloi i nema nti ni das,
42 fali anaky bate ne nafanas ma ketla nmat.
Ma kanak a ne mesan ma ni ngarak buti resin du.
Ne Yesus nlarat ma raktem a rti.
Sir lolone dalamtene let e,
tomwatar yadin rasesekan sir ma rlosir Yesus.
43 Na tomwat ngayadin a ne,
batar sa ma dare nbotin i,
to nater.
Ni maninik a ne ngarak buti resin du lo.
[I nfenri monuk ni kabanir la nfarobat ni maninik].
Nempa to tomwate fen lese ma nafngamone nal i.
44 Bate ne nmpan nof mudy ma nti nlosir Yesus,
betno nasyol Yesus Ni rabit melawas suin,
ne darany nater desar.f
45 Ne Yesus nenrat,
“Ise ma nasyol Yakw ye?”
Nempa to tomwate fen lese nbali.
Mpa Petrus nfalak,
“Tuangguru,
tomwatar yadin rasesekan sir ma rkolu Ko.”
46 Ne Yesus nfalak,
“Yakw kwoman e tomwatar sa nasyol Yakw,
fali Ningw kuase nbie nof Yakw.”
47 Mpe bate ne nfenai feti Yesus nafai i lo.
Mpa i nti nakmat Yesus e,
ngangasar.
I nsatngur a na Yesus sounlury,
ne nasaur ber tomwat ngayadin feti safema nasyol Yesus ma nasyol e nangamon desar.
48 Mpene Yesus nfalak ber bate ne,
“Ano,g
ko mulele Yakw mpa mungamon lo.
Mbwali ko mor maline!”
49 Yesus lolone natanuk e,
tomwatar sa nof Yairus ni das a nma ma nfalak ber i,
“Angkam a nmat lo,
mpa kete mufngol Tuangguru ma nti nim das lo!”
50 Ndengar ibar a ne,
Yesus nfalak ber Yairus,
“Kete mumtaut,
mulele motak,
fali keta angkam a nangamon.”
51 Rait Yairus ni das e,
Yesus to ninrang tomwate fen lese ma nlarat I far kamar dalam,
lan Petrus,
Yohanes ma Yakobus,
ma kanak a ne enany amany.
52 Tomwatar monuk rtasing ma ralol fali kanak a ne nmat lo.
Nempa Yesus nfalak ber sir,
“Kete mtyasing,
i to nmat nempa narwa motak!”
53 Ne rmalip I,
fali rafai feti kanak a ne nmat lo.
54 Mpene Yesus nomat kanak a ne limany ma nfalak,
“Ano,
mpwote ko.”
55 Kanak a ne smwangtany nsung a nbali i ma npote i desar ma namdir.
Ne Yesus nfalak ma ral tnyame ber i.
56 Kanak a ne enany amany rampriang desar.
Nempa Yesus nfalak ber sir ma kete rasaur ngrie ne ber tomwatar.