Lukas 9

Yesus nsiduk Ni manglarat buti resin du

9:1-6

(Mat. 10:5-11; Mrk. 6:7-13)

1 Yesus ntar Ni manglarat buti resin du a ne ma rabut sir, betno nal kuase ber sir ma ratian smwangat yatkar ma rafngamone maningkyar. 2 Mpene I nsiduk sir ma rti rafngamone mangafansar ma rafwibar feti keta Ratu nfarete neluk rai. 3 Ne Yesus nfalak ber sir, “Ka mtyi e kete myon sasaf. Kete myon tetekan, lufu, kodnar, nre dotyar, ma kete myon rabit seselu. 4 Ma farlan rlangun a kmi a na dasar sa e, ka mimin iane terik ma mbyali kmi. 5 Nempa farlan tomwatar to rlangun a kmi e, ka mtyi a mtyate kote ne ma mitetar afu myof emir neluk faniak feti keta Ratu nukun sir.”

6 Mpe sir rti mpane pnuar ma rafwibar Ibar Ngamone, ma rafngamone mangafansar na mpenempen.

Herodes ni andaun to ntai na Yesus

9:7-9

(Mat. 14:1-12; Mrk. 6:14-29)

7 Herodes ye rai ma nfarete na nus Galilea. I ndengar kabain mpasalnar ma Yesus nose ne, mpa ni andaun to ntai. Fali tomwatar a rfalak feti, Yesus ye Yohanes Mangadiris ma nmorip a nbali lo. 8 Ketnir a rfalak feti, Yesus ye nabi Elia ma nma nbal e lo. Ma ketnir a nbal e rfalak feti nabi luryanir a ne sa nmorip a nbali. 9 Herodes nfalak, “Yakw kfwarete ma tomwatar rtetak Yohanes uluny lo, ma tomwate ma tomwatar rfalak ye, ise I a nbal?” Mpa Herodes nareke ma natungan nor Yesus.

Yesus nfane tomwate ribun lim

9:10-17

(Mat. 14:13-21; Mrk. 6:30-44; Yoh. 6:1-13)

10 Lama Yesus Ni mangsidkwar a ne rbali sir e, rasaur ber Yesus na safe-safe monuk ma sir rose ne. Ne Yesus nor sir a rbie rof tomwat ngayadin ma rti ain tatutkwar sa nlosir kote Betsaida nema koko sir motak. 11 Tomwat ngayadin rafai feti Yesus ka rti lo, mpa rlarat sir. Yesus nlangun sir ma naftutu feti keta Ratu neluk Rai ma nfarete tomwatar. I nafngamone nbal mangafansar.

12 Noak ma lere ketla nfufw, Yesus Ni manglarat buti resin du a ne rma rakmat I ma rfalak, “Maken, ain ye nkese i a mpa mlwuan tomwatar ma rti pnuar na seriny baldu ye nema bise ma ranriak a tnyame ma anir ma rarwa.”

13 Ne Yesus nfalak, “Ka mfyane sir!”

Nempa manglartar a ne rfalak, “Mamy rotyar lan lim a ma inar du, keta to dengan. Ko mpweang ma mselir tnyamar a mtafal nema bise ma dengan monuk sir e?” 14 (Fali na iano merwanar fafa ribun lim owo.)

Ne Yesus nfalak ber Ni manglartar, “Mifburat tomwatar buty lilim mpane ma ramtoran.” 15 Ne sir rose rlarat safe ma Yesus a nfalak a ne. 16 Mpene Yesus nal rotyar lim ma inar du a ne, ma nmetngade far langit ma nose alang ber Ratu. Betno napuse rotyar ma inar a ne ma nal ber Ni manglartar ma rasaman ber tomwat ngayadin a ne.

17 Sir monuk rtame terik ma rabotan. Ne Yesus Ni manglartar rabutin tnyamar ma nres a ne na boti buti resin du.

Petrus nyoding feti Yesus ye Ray Silai ma Ratu nyoding

9:18-21

(Mat. 16:13-28; Mrk. 8:27; 9:1)

18 Na ler sa e, Yesus koko I a nsampayang ne Ni manglartar rti rakmat I. Mpa nenrat sir, “Tomwatar rfalak feti Yakw ye ise?”

19 Ne Ni manglartar a ne rfalak, “Tomwatar rfalak Ko ye Yohanes mangadiris ma nmorip a nbali, ketnir a rfalak feti Ko ye nabi Elia. Ma ketnir a nbal e, rfalak feti Ko ye nabi luryanir sa ma nmorip a nbali.”

20 Yesus nenrat sir a nbal, “Nof a kmi desar e, Yakw ye ise?”

Ne Petrus nfalak, “Maken, Ko ye Ray Silai ma Ratu nyoding lo.”

21 Nempa Yesus nose nteri sir, “Ka kete rafbotin desar ngrie ye ber tomwatar.”

Yesus nfalak na Ni suse ma Ni mamate

9:22-27

22 Yesus nfalak a nbal, “Yakw, Tomwate Anaky ka kubare suse yadin. Ma ninr makenar, mangsomp ulnir ma mangaftutu Musa ni faretar keta rasipur Yakw. Tomwatar keta rfen Yakw nempa lerar tel e, kmworip a kbwali.”

23 Mpene I nfalak ber tomwatar monuk ma ramin iane, “Ise nmpeang ma nlarat Yakw, ka kete nlarat ni mpempeang, nempa ka nabare ni sangwalu lerar monuk, ma nlarat Yakw. 24 Ise ma nmorip a nlarat koko i ni mpempeang, keta to nonri momorip dedesar. Nempa ise ma to nmorip a nlarat ni mpempeang terik ma nmat fali nlarat Yakw, keta nonri momorip dedesar. 25 To ubany ber tomwate ma nonri monuk kabain saryamprenar, nempa to nonri momorip dedesar. 26 Ise ma nmeat ma nyoding feti nlarat Yakw ma nmeat ma nlangun Ningw anftutwar, keta Yakw kmweat a nbal ma kyoding i a na Ratu sounlury noak ma Yakw, Tomwate Anaky kmwa saryamprene. Na lere ne keta Yakw kmwa kor dadangin ma Amangw Ratu nal, numur malaekat lelerpar ma Ratu nsiduk sir. 27 Yakw kfwalak ber a kmi: Ni botuan e tomwatar ketnir nof a kmi ma mimin ye keta to myat a fuky terik ma msyalan Ratu nfarete tomwatar neluk Rai.”

Yesus nfatutu Ni snyain ma namamas ber Ni manglartar

9:28-36

(Mat. 17:1-8; Mrk. 9:2-8)

28 Lama Yesus naftutu monuk ngriar a ne, fafa lerar wal a rsak, I nor Petrus, Yohanes ma Yakobus rti bubuar das ma rsampayang. 29 Lolone nsampayang e, souny idak ma Ni rabit nangfuty resi ma namamas. 30-31 Metryat e, tomwatar du a rbotin ror snyain ngaidak nof surga, sir a ne nabi Musa ma nabi Elia. Sir ratanuk ror Yesus na Ni mamate, ma to dodo a nbal e, nafdiat na Yerusalem. 32 Noak a ne Petrus nor tbwarnir rarwa lo. Metryat ma rpote sir e, rsalan Yesus snyain ngaidak ma nabyar du a ramdir ror I. 33 Nait ma tomwatar du a ne rose ma rti a rtate Yesus mpa Petrus nfalak, “Tuangguru, tamin ye e, nangafel resi. Ni ngafele e, kam mafdiri befkar tel: sa ber Ko, sa ber Musa ma sa nbal e, ber Elia.” Petrus nfalak farane nempa to nafai safe ma nfalak a ne.

34 Petrus lolone natanuk, metryat e mutan a nma ma nepat sir, mpa ramtaut. 35 Ne rdengar Ratu liriny nof mutan dalam ma nfalak, “I ye Yakw Anakw ma kfwil I. Ka mdyengar I!”

36 Lama liliri ne nater, sir rsalan e lan Yesus koko I. Yesus Ni manglartar a ne ramlin ma to rasaur safe ma rsalan a ne ber kekes.

Yesus natian kalin smwangat yatak nof kanak sa

9:37-43

(Mat. 17:14-21; Mrk. 9:14-29)

37 Ni bobole ne Yesus nor Ni manglartar tel rnrunrur rof bubuar a ne, mpe tomwatar yadin rti rakmat I. 38 Metryat e, merwanar sa nof tomwat ngayadin a ne nafwayak, “Tuangguru, mtwulung ma mswalan anakw mesan ye fuky! 39 Fali smwangat yatak nsung i nwayat ma fwayak fwoik i, ma ngerw terik ma lalabusar rof babany. Ma smwangat yatak a ne to nlampir ma nbie mpa nawar i. 40 Yakw ktwak Nim manglartar lo ma ratian smwangat yatak a ne, nempa to bonir ral.”

41 Ne Yesus a nfalak, “Hei tomwatar a kmi ma myorip a na are ye, kmi to milele Ratu! Mpyan a mlyarat lan mir mpempengar. Kor a kmi doan ye lo, ma kmi to milele desar Yakw e?” Mpene Yesus nfalak ber makene ne, “Mor angkam a mwa!”

42 Noak ma kanak a ne ketla nlosir Yesus, smwangat yatak ne npelak kanak a ne far ompak ma nose ma ngerw. Nempa Yesus nfarete smwangat yatak a ne ma nbie nof i, mpa nangamon desar. Betno nal a nbali i ber amany. 43 Tomwatar monuk a ne rampriang desar fali rsalan Ratu Ni kuase ma nlie nlengan.

Yesus a nfalak na Ni mamate nbal

9:44-45

(Mat. 17:22-23; Mrk. 9:30-32)

Noak ma sir monuk rampriang ma rsalan ngrimpasalan ma Yesus nose ne e, I nfalak ber Ni manglartar, 44 “Mdyengar fen ngamone, ma minremi safe ma kfwalak: Keta tomwatar ranrenre Yakw, Tomwate Anaky ber mangfaretar.” 45 Nempa Ni manglartar to rkaul ral safe ma I nfalak a ne, fali Ratu namudim isiny ber sir. Ma ramtaut ma renrat isiny a nbal rof Yesus.

Manglartar rabangal sir feti ise ma silai i a nlengan nof sir

9:46-48

(Mat. 18:1-5; Mrk. 9:33-37)

46 Na ler sa e, Yesus Ni Manglartar rabangal feti ise ma silai i a nlengan nof sir. 47 Nempa Yesus nafai nir andanwar, mpa nal kangkir sa ma namdir I seriny. 48 Betno nfalak ber sir, “Tomwate ma nlangun kanak ye fali nalele Yakw, iane i nlangun Yakw. Tomwate ma nlangun Yakw, iane nlangun Ratu ma nsiduk Yakw. Nof a kmi e, ise ma to nafdas i keta silai i!”

Tomwatar ma to rbangal a kmi iane tbwarmir

9:49-50

(Mrk. 9:38-40)

49 Yohanes nfalak, “Tuangguru, kam msalan ma tomwat sa nal Ko ngaram la natian kalin smwangat yatak. Mpa mose mteri tomwate ne, fali i to nlarat kit.”

50 Ne Yesus a nfalak, “Kete myose mtyeri i, fali tomwate ma to nbangal a kmi i a ne tbwarmir.”

Tomwat Samariar to rlangun Yesus

9:51-56

51 Ketla nait ni tewat ma Yesus nfangat far surga, I dalamy a nfalak ma nti Yerusalem. 52 Ne I nsiduk ni manglartar ketnir ma rbalun. Sir a ne rti pnu sa na nus Samaria ma rasusan safe kabain ber Yesus. 53 Nempa tomwatar na pnue ne to rmpeang ma rlangun I, fali sir rafai feti nose ma nti Yerusalem. 54 Ni manglartar du Yakobus ma Yohanes rafai ngrie ne, mpa rfalak, “Mangnrure Silai, Ko mpweang ma kam mtak au nof langit ma napu sir e?”

55 Nempa Yesus nmange I ma nfon sir ma ndotar sir. 56 Mpene sir rti pnu walyet.

Tomwatar ma rmpeang ma rlarat Yesus

9:57-62

(Mat. 8:19-22)

57 Noak ma Yesus nor Ni manglartar raloran nir mpampane far Yerusalem, na dalamtene let e, tomwat sa nfalak ber Yesus, “Tuangguru, yakw kmpweang ma klwarat Ko far mpenempen motak!”

58 Ne Yesus nfalak ber i, “Asw alsar e nir klinar ma mangkyar nir ngengyar, nempa Yakw, Tomwate Anaky e, to ain ma kurwa.” 59 Ne Yesus nfalak ber tomwat sa, “Mlwarat Yakw!”

Nempa tomwate ne nfalak, “Maken, mwinrang ma kbwali yakw far ningw das a fuky. Nema noak ma amangw a nmat ma kufonak i a fuky, betno kbwali yakw ma klwarat Ko.”

60 Yesus a nfalak, “Tomwate ma to nalele Yakw, i farlan mangmwate, mpa mswalan lonri tomwatar ma rmat a ne ma rafonak nir mangmwate. Nempa ko e, mtwi mufwibar feti Ratu neluk Rai ma nfarete tomwatar.”

61 Tomwat sa nbal e nfalak, “Maken, yakw kmpweang ma klwarat Ko, nempa mwinrang ma kbwali yakw ma ktwul ningw das dalam a fuky.”

62 Nempa Yesus nfalak ber i, “Tomwate ma nabali ompak, nempa nfon far lan mudy keta ni karyae ne to nsor. Farlan tomwate ma nlarat Yakw ma nanremi lan ni safe kabain, keta to ubany na Ratu Ni ain farete.”