Ise ma silai i na Ratu sounlury
18:1-5
1 Noak a ne Yesus Ni manglartar rma ma rakmat I ma renrat,
“Tuangguru,
noak ma Ratu neluk Rai ma nfarete tomwatar e ise ma silai i?”*
2 Mpe Yesus ntar kanak sa ma nluan ma namdir twalelenir.
3 Ne Yesus nfalak,
“Mdyengar fen ngamone safe ma kfwalak ye.
Ni botuan e farlan kmi to mtyate mir adat yatkar ma myose felmir farlan kangkir,
keta to myeluk Ratu Ni tomwatar noak ma neluk Rai ma nfarete tomwatar.”*
4 Nempa ise ma nafufu nbali i ma nose felany farlan kangkir,
keta silai i a nlengan nof Ratu Ni tomwatar monuk noak ma nfarete neluk Rai ma nfarete tomwatar.
5 Ma ise ma nalele Yakw ma nlangun tomwatar ma to ubnir sasaf farlan kangkir,
iane feti i nlangun Yakw lo.
Kete twayat ma tomwatar rose sale
18:6-11
6 Ne Yesus nfalak a nbal,
“Ise ma nwayat ma kangkir sa nof kangkir ma ralele Yakw ye rfufw far sale,
ni ngafele e rkete baty silayar sa na tomwate ne nawan ma ryebas i far tasik dalam.”
7 Suse desar ber tomwatar ma rwayat ma tomwat walyetar rose sale.
Botuan feti to bise ma tliak tal kit tof anteman ma nwayat ma kit tose salar.
Nempa tomwate ma nwayat ma tomwat walyetar rose sale keta suse desar ber i.
8 Mpa farlan limir nre emir rwayat ma myose sale e mtyukar kalin limir nre emir a ne ma myebas.
Fali ni ngafele e myorip myor Ratu na surga myor lan limir balin nre emir balin,
nlengan nof ma limir du ma emir du a ramin nempa ryebas a kmi far au ma nfolur dedesar.*
9 Ma farlan matmir rwayat ma myose sale,
myakil kalin ma myebas.
Fali ni ngafele e myorip myor Ratu na surga myor matmir balin,
nlengan nof ma matmir du a ramin,
nempa ryebas a kmi far au dalam.*
10 Yesus nfalak a nbal,
“Ka minremi!
Ka kete mdyaun feti kangkir sa nof kangkir ye to ubnir sasaf.
Yakw kfwalak farane fali ni botuan e malaektar ma rajake sir a ne dedesar ma ramdir Amangw sounlury na surga.
11 [Fali Yakw,
Tomwate Anaky kmwa saryamprene ma kfwair tomwatar ma rmpan sale.”]*
Tnyanuk pupule na domba ma nlai
18:12-14
12 Yesus nfalak a nbal,
“Contoh farye:
farlan nof a kmi ye tomwatar sa ni domba rati,
ne ni domba lese nlai,
keta i nose farpe?
Botuan feti keta i nau kalin ni domba buty siw resin siu ne na lenran,
betno nti nanriak domba ma nlai ne.
13 Yakw kfwalak ber a kmi,
noak ma i ntungan a nbali domba ma nlai ne,
keta nsenang resi nlengan nof domba buty siw resin siu ma to rlai ne.
14 Feleles a nbal farlan Amir a na surga.
I to nmpeang tomwatar sa nbal nof tomwatar ma to ubnir sasaf a ne ma rmpan sale.”
Ka tose farpe ma tulung soranyar ma rose sale ber kit
18:15-20
15 Yesus nfalak a nbal,
“Farlan wamir sa ma nalele Ratu nose sale ber ko,
ka mtwi mukmat i ma mfwalak ni sale ma nose ber ko a ne.
Nempa lan midu ma mifai.
Ma farlan nyoding ni sale ne,
iane feti i neluk waim a nbali lo.”*
16 Nempa farlan to nyoding ni sale ne,
ka mtwi mukmat i nempa ka mor tomwate fen lese nre du a nbal.
Ko mose farane iane feleles farlan ma rarengi na tetetkar ma Ratu nal ber Musa feti,
“Ka mor tomwatar fen du nre tel ma reluk mangtungan na ngriar sa betno bise ma tetak ngrie ne.”*
17 Nempa farlan to ndengar safe ma kmi mfyalak a ne,
ka mifbotin ngrie ne ber soranyar.
Ma farlan to ndengar soranyar nir snyurtar a nbal e ka sir rdaun feti tomwate ne to nafai Ratu,
ma rdaun feti i farlan mangtak ulbatyar.
18 Yakw kfwalak ber a kmi,
“Ni botuan e safe-safe monuk ma myose mtyeri na saryamprene ye,
keta Ratu nose nteri na surga nbal.
Ma safe-safe monuk ma myinrang na saryamprene ye,
keta Ratu ninrang na surga nbal.”*
19 Ma kfwalak ber a kmi a nbal:
Na saryamprene ye farlan tomwatar du nof a kmi a ne rfat ma lese ma rtak kabanir sa nof Amangw na surga,
keta I nal safe ma mtyak a ne.
20 Fali farlan tomwatar fen du nre tel rafburat sir ma rsampayang ma rtar ngarangw,
keta kor sir na iane nbal.
Yesus naftutu kit ma tlure tomwat walyetar ma rose sale ber kit
18:21-35
21 Mpene Petrus nma nakmat Yesus ma nfalak,
“Tuangguru,
farlan wangur sa ma nalele Ratu nose sale ber yakw,
ka klwure i lain fir?
Lain itw e?”*
22 Ne Yesus nfalak,
“Tate.
Ko to mlwure lain itw motak,
nempa ka mlwure i terik lain buty itw ma mose farane terik lain itw a nbal.”
23 Yakw kfwalak ma myose farane fali noak ma Ratu neluk Rai ma nfarete tomwatar,
keta feleles farlan ansaur ma farye:
Ler sa e rayar sa nma ma nsalan ni mangkaryayar feti rbaras monuk nir utngar a na i lo nre lolone.
24 aNoak ma nfayaki e sir ror ni mangkaryayar sa na sounlury.
Mangkaryae ne ni utang juta yadin na rai ne.
25 Nempa mangkaryae ne to nbaras nal ni utngar a ne,
mpa rai ne nfarete ma rfenri ni mangkaryae ne nor sawany anaky ma ni safe kabain,
la nbaras ni utngar a ne.
26 Lama mangkaryae ne ndengar farane,
i nsatngur na rai ne sounlury ma ntak naloloi i ma nfalak,
“Maken,
la kbwaras monuk ningw utngar a ne nempa mwal let ber yakw fuky nre la!”
27 Mpe rai ne nlompang desar i,
nwayat ma ntate i ma nkes kalin ni utngar monuk a ne.
28 Nempa noak ma mangkaryae ne nti burit e i natungan nor tbwariny mangkarya sa nbal.
Tbwariny a ne ni utang lan ribun rati na ib.
Ne i nomat tbwariny a ne ma nmenrak ni dongur ma nfalak,
“Mbwaras nim utang a ne!”
29 Ne tbwariny a ne nsatngur a na sounlury ma nfalak,
“Awa la kbwaras monuk ningw utngar a ne nempa mwal let ber yakw a fuky nrela!”
30 Nempa mangkaryae ne to nlampir ma nau tbwariny a ne na sel terik ma nbaras monuk ni utngar a ne.
31 Noak ma mangkarya ne tbwariny walyetar rsalan farane,
sir dalmir suse mpa rti rafbotin ngrie ne ber rai.
32 Mpe rai ne nluan ma rtar mangkaryae ne ma nfalak ber i,
“Hei tomwat yatak ko!
Ko mswatngur ber yakw ma klwompang ko mpa kwes kalin monuk nim utngar lo.
33 Ma safema ko to mlwompang tbwarim a ne farlan ma yakw klwompang ko?”
34 Ne rai ne nares desar mpa nluan ni mangajakar ma ror mangkarya yatak a ne ma rnau i a na sel,
ma rsiksa i terik ma nbaras monuk ni utngar.
35 Ne Yesus nfalak,
“Iane feleles farlan Amangw ma namin surga nose ber kmi a nbal,
farlan to mlyure tomwat walyetar nir salar myor dalmir kateman.”