Kete myayat ma tomwatar rfufw far sale dalam
17:1-4
1 Yesus nfalak ber Ni manglartar,
“Botuan feti kabain yatkar a rwayat ma tomwatar rose sale.
Nempa suse desar ber tomwate ma nwayat ma tomwatar rose sale!*
2 Ni ngafele e,
rkete baty silai na tomwate ne nawany,
ma ryebas i far tasik dalam.
Rose farane nema kete nwayat tomwatar sa nof tomwatar ma dalmir to ramkoran a fuky ye nose sale.
3 Mpa mijak fen ngamone!
Farlan soranyar sa ma nose sale ber ko,
ka mtwampu i nema ka kete nose farane lo.
Farlan nasesal i e,
ka mlwure i.*
4 Farlan i nose sale ber ko lere lese e lain itw,
ma nma lain itw ma ntak ma mlwure i,
ka mlwure i.”*
Ka mimkoran ma milele Ratu
17:5-6
5 Ne Yesus Ni mangsidkwar a rfalak ber I,
“Mangnrur Silai,
mtwulung kam ma mamkoran ma malele Ratu.”
6 Yesus ninr Mangnrur Silai nfalak,
“Farlan milele Ratu boloka slyain lan sasawi batin,
bise ma mfyalak ber katutun silai ye ma ntarpal nof ompak ma nti natkyal a na sawak dalam,
ne keta katutun a ne nlarat safe ma mfyalak a ne.”a
Safe ma Ratu nfalak, ka myose monuk myor dalmir kateman
17:7-10
7 Mpene Yesus nfalak,
“Farlan tomwatar sa nof a kmi ye ni karwar sa ma nabali ompak na lete nre neluk mangajak dombayar.
Nait ma kawar a ne nbali i e,
keta tomwate ne to nfalak ber i feti,
‘Mwa mumtoran ma mtwame?’
8 Nempa keta nfalak ber kawar a ne feti,
‘Mose tnyame ber yakw.
Mfwonak rabit ngalerap ma myangar yakw titerik ma ktwame monuk;
betno ko mtwame.’
9 Keta ndangin kawar a ne nre tate?
Fali nkaryae monuk safe ma nruany a nfalak a ne,
tate nre?
10 Kmi a nbal.
Farlan mkyaryae monuk safe ma Ratu nal ber a kmi a ne lo e,
ka mfyalak feti,
‘Kam ye mangkarya biase motak;
kam mkaryae mlarat lan safe ma Ratu nal ber kam.’”
Tomwat Samariar sa ma nose alang ber Ratu
17:11-19
11 Noak ma Yesus nor Ni manglartar rmpan far Yerusalem,
sir ralyole yampren Samaria ma Galilea snyap.
12 Lama Yesus nait pnu sa e,
mangampaul buti rti rakmat I.b
Nempa ramdir dodo rof I
13 ne rafwayak ma rfalak,
“Yesus!
Tuangguru!
Mlwompang kam!”
14 Ne Yesus nfon sir ma nfalak,
“Mtyi mikmat ninr mangsompar,
nema rlolak tenmir feti mingamon lo nre lolone.”*
Noak ma lolone dalamtene let e,
sir rangamon lo.c
15 Tomwatar sa nof sir nsalan tenany e nangamon lo,
mpa nbali i ma nampumpuki i ma ndangin Ratu.
16 Ne i nsatngur na Yesus sounlury,
ma nose alang ber I.
Tomwate ne tomwat Samaria.
17 Mpene Yesus nfalak,
“Dine Yakw kufngamone tomwate buti kmi nre?
Ma rasiu a ne sir mpe?
18 Fali safe ma lan tomwat mangum ye ma nbali i ma nose alang ber Ratu ma Yahudyar a ne tate?”
19 Ne Yesus nfalak ber tomwate ne,
“Mumdir,
ma mbwali ko.
Ko mulele Yakw,
mpa mungamon.”
Ratu nma ma nfarete neluk Rai
17:20-37
20 Tomwat Farisyar ketnir renrat Yesus bengfir e Ratu neluk Rai ma nfarete tomwatar na saryamprene ye.
Yesus nbali,
“Keta Ratu neluk Rai ma nfarete tomwatar nempa to fanikar ma sir rsalan,
21 mpa keta tomwatar to bise ma rfalak feti,
‘Ratu neluk Rai ma nfarete na ye nre,
na i a no!’
Fali botuan e,
Ratu neluk Rai ma nfarete na kmi dalmir lo.”
22 Mpene Yesus nfalak ber Ni manglartar,
“Keta nait ni tewat e,
kmi mpyeang resi ma myor Yakw,
Tomwate Anaky boloka lan lere lese,
nempa to bise.
23 Keta tomwatar rfalak ber a kmi feti,
‘Mya ma msyalan,
I a na ye!’
Nre ‘Msyalan I a na iano!’
Nempa kete mtyi.
24 Fali noak ma Yakw,
Tomwate Anaky kmwa,
keta tomwatar monuk rafai.
Iane farlan fitik ma idak nodir langit nof tubnir sa nti nait tubun walyetar.
25 Nempa luryain e Yakw,
Tomwate Anaky ka kubare susar yadin ma tomwatar na are ye rasipur Yakw.
26 Noak ma Yakw,
Tomwate Anaky kmwa,
keta tomwatar nir momorip feleles farlan na are nabi Nuh.*
27 Tomwatar rtame renum,
ma rafasawe sir;
nti nait na lere ma nabi Nuh nti kabal dalam betno kjaip silai nma ma nloram tomwatar a ne ma rmat monuk.*
28 Farlan a nbal na are Lot.
Tomwatar rtame renum,
rabel kabain,
raosbo ma rafdiri nir dasar.*
29 Nempa na lere ne nbal,
noak ma Lot a nti a ntate kote Sodom,
Ratu ntolar au ma belerang nof langit farlan udan ma napu sir titerik ma rmat monuk.
30 Na lere ma Yakw,
Tomwate Anaky kmwa kbwali saryamprene keta feleles a nbal na are Nuh ma Lot.d
31 Na lere ne tomwatar ma ramin bubungan das ka kete rtompur ma rti das dalmir ma ral safe-safe.
Farlan tomwatar ma ramin letar kete rbali sir far nir dasar a nbal.e*
32 Ka minremi safe ma diat Lot sawany lo!*
33 Tomwatar ma to ral nir momorip ber Ratu,
keta to ronri momorip dedesar.
Nempa tomwatar ma ral nir momorip na saryamprene ye ber Ratu la ronri momorip dedesar.*
34 Yakw kfwalak ber a kmi:
Na nronram ma kbwali Yakw e,
tomwatar du a rarwa na arwan ain lese,
nempa Ratu keta nor sa ma nau kalin sa ne fali i to nalele Yakw.
35 Batar du a rloli gandum,
keta Ratu nor sa ma nau kalin sa.
36 [Farlan tomwatar du a rkarya na lete,
keta Ratu nfair tomwatar sa ma nau kalin sa.”]
37 Yesus Ni manglartar renrat feti,
“Mangnrur Silai,
keta Ko mwa mbwali saryamprene na mpe?”
Ne Yesus nal tnyanuk pupule ma nbali,
“Na ain ma mpusuk bobar ne ramin,
iane ma manik akar rabut sir ma rane.
Keta felan farlan ma kmwa kbwal.
Yakw kmwa e to kumudim ma keta tomwatar monuk a rsalan.”f