Tnyanuk pupule na bat some ma mangtetak
18:1-8
1 Ler sa e Yesus nasaur tnyanuk pupular sa ber Ni manglartar la naftutu ber sir feti ka dedesar ma sir sampayang ma kete raleti.
2 Yesus nfalak,
“Na kotar sa e,
mangtetak sa to nalang Ratu,
ma to nfaduli tomwate fen lese.
3 Na kote ne nbal bat somar sa nti nakmat mangtetak a ne dedesar ma ntak feti,
‘Amo,
mtwulung yakw na ningw ngrie ye fuky fali to boangw ma kbwangal ningw musu ne.’
4 Luryain e,
mangtetak ne to nfaduli desar nor bat some ne.
Nempa famudi e nfalak na dalamy feti,
‘Boloka yakw to kwalang Ratu ma to kfwaduli tomwate fen lese,
5 nempa bat some ye dedesar nma ma nakmat yakw,
mpa ni ngafele e,
ktwulung i a na ni ngrie ne.
Nema kete nma dedesar koli nose ma yakw sisrat.’”
6 Mangnrur Silai nfalak a nbal,
“Mdyengar fen ngamone safe ma mangtetak to namlonry a ne nfalak!
7 Ni botuan e,
Ratu la ntulung Ni tomwatar ma nfil sir a ne,
ma lere nronram e rtak rtulung rof I dedesar.
Ma keta I to ndaf dodo ma ntulung sir.
8 Yakw kfwalak ber a kmi:
Na lere ne nbal Ratu ntulung sir desar!
Nempa noak ma Yakw,
Tomwate Anaky kmwa kbwali saryamprene e,
keta lolone ktwungan tomwatar ma ralele Yakw nbal nre tate?”
Ratu nlangun tomwatar ma to rafdas sir
18:9-14
9 Yesus nasaur tnyanuk pupule nbal ber tomwatar ma dalmir medase ma rdaun feti to nir salar,
mpa rtayatak tomwat walyetar.a
10 Yesus nfalak farye,
“Lain sa e,
tomwatar du a rti rsampayang na Ratu Ni Das Silai.
Tomwatar sa e nof Farisi,
ma sa nbal e,
mangtak ulbati.
11 Tomwat Farisi ne namdir a nkese i ma nsampayang na dalamy farye,
‘O Ratu,
yakw kose alang ber Ko,
fali yakw to far tomwatar monuk,
ma ramnang,
nir adat yatkar,
nre ralalin.
Ma kose alang a nbal fali yakw to kbwalak mangtak ulbati ne.
12 Yakw kpwuase minggu dalam lain du,
ma yakw klwoik ber Ko sepersepuluh nof yakw ningw karya dalmir monuk.’
13 Nempa mangtak ulbati ne namdir nof dodo motak ma to nfon desar far das.
Mpene nasoke motak mpumpryanyar ma nfalak feti,
‘O Ratu Ko,
mlwompang tomwat sale yakw!’”b
14 * “Yakw kfwalak ber a kmi,
noak ma mangtak ulbati ne nbali i far ni das e,
Ratu nlure ni salar lo nempa Ratu to nlure tomwat Farisi ne.
Fali ise ma nafdas i,
keta Ratu nafufu i,
ma ise ma nafufu i,
keta Ratu nafdas i.”
Yesus nberkat kangkir
18:15-17
15 Tomwatar ror angkir ma lolone marumtar ber Yesus nema nasyol ma nberkat sir.
Ni manglartar rsalan farane,
sir rarese tomwatar a ne.
16 Nempa Yesus ntar kangkir a ne ma nfalak ber Ni manglartar,
“Msyalan lonri motak sir ma rma ma rakmat Yakw!
Kete myose mtyeri sir,
fali tomwatar ma farlan kangkir ye ma keta reluk Ratu Ni tomwatar noak ma Ratu neluk Rai ma nfarete saryamprene.
17 Yakw kfwalak ber a kmi!
Ni botuan e farlan kmi to milele Ratu far kangkir ye,
keta to mimin Ratu Ni ain farete.”
Masumput desar ber mangoskai ma nti Ratu Ni ain farete
18:18-30
18 Mangfaret Yahudyar sa nenrat Yesus,
“Amangw Tuanggurw ngamone ko,
ka kose safe nema konri momorip dedesar?”
19 Ne Yesus nfalak,
“Safema ko mfwalak feti kungamon?”
To tomwate fen lese ma nangamon lan Ratu.
20 Ko mufai monuk Ratu Ni faretar lo:
“Kete munronr,
kete mufen,
kete mumnang,
ka kete mweluk mangtungan lepusuk,
ma mwalang anoi amoi.c”*
21 Tomwate ne nfalak,
“Nof ningw tabweri e,
yakw kose klwarat faretar a ne lo.”
22 Yesus ndengar farane nfalak ber i,
“Bait sa nbal ma ka mose:
Mfwenri monuk nim kabanir,
betno mswaman dotyar a ne ber tomwatar ma rawatan,
nema monri kabanir na surga.
Mose farane betno mlwarat Yakw.”
23 Lama i ndengar ma Yesus nfalak farane,
dalamy suse fali naoskai resi.
24 Yesus nafai feti dalamy suse resi mpa nfalak,
“Masumput desar ber mangoskai ma nti Ratu Ni ain farete!
25 Merawe desar ma unta lese nsung nof nririmase matan,
nlengan nof mangoskayar sa ma neluk Ratu Ni tomwate na Ni ain farete.”
26 Tomwatar rdengar ma Yesus nfalak farane sir rfalak,
“Farlan farane e,
keta ise ma Ratu nfair i?”
27 Yesus nfalak,
“Safe ma tomwatar to bonir ral,
keta Ratu boany nal.
Ratu bise ma nfair ise motak!”
28 Petrus nfalak,
“No mswalan!
Kam mnau kalin kam mamy kabanir monuk lo ma mlarat Ko.”
29 Ne Yesus nfalak ber sir,
“Ise ma nau kalin ni das,
nre sawany,
urany wainy,
enany amany,
nre angkir,
fali nlangun Ratu
30 na are ye,
keta Ratu nal sewe yadin nlengan desar ber i ma keta are ma nma ye i nmorip dedesar nor Ratu.”
Yesus natanuk na Ni mamate
18:31-34
31 Yesus ntar Ni manglarat buti resin du a ne ma nfalak,
“Lere ye kit ti kote Yerusalem ye lo.
Na iano safe-safe monuk ma nabyar rarengi na Yakw,
Tomwate Anaky,
la nafdiat.
32 Fali keta tomwat Yahudyar ranrenre Yakw ber tomwatar ma to Yahudi sir,
ma tomwatar ne keta rkosy a rmalip,
rafbwere,
ma rdikat Yakw.
33 Keta sir raus a rbabal ma rfen Yakw,
nempa keta lerar tel e,
Yakw kmworip a kbwali.”
34 Nempa Yesus Ni manglartar to rkaul ral desar safe-safe monuk ma I nfalak ne,
Fali sir to rafai Ni ngribatnir a ne isnir.
Yesus nafngamone matbolar sa
18:35-43
35 Noak ma Yesus ketla nait kote Yerikho,
matbolar sa namtoran dalamtene seriny ma natak.
36 Tomwate ne ndengar tomwat ngayadin rlanre mpa i nenrat,
“Safe ne?”
37 Sir rfalak,
“Yesus tomwat Nasaret a ne,
nlanre ye.”
38 Ndengar farane i nafwayak,
“Yesus,
Daud empuny!
Mlwompang yakw!”
39 Tomwatar ma rmpan a rbalun a ne,
rares ma rtampu i nema nau.
Nempa i ntafal ma nafwayak a nbal,
“Daud empuny!
Mlwompang yakw!”
40 Ne Yesus namdir a ntabu I ma nluan tomwatar ma ror tomwat matbole ne ber I.
Lama rait e Yesus nenrat i,
41 “Mpweang ma Yakw kose safe ber ko?”
Ne i nbali,
“Maken,
yakw kmpweang ma kukeban.”
42 Mpe Yesus nfalak ber i,
“Mukeban lo!
Fali mulele Yakw mpa mungamon.”
43 Na lere ne nbal i nakeban desar,
ne nlarat Yesus ma ndangin Ratu.
Noak ma tomwat ngayadin a rsalan ngrie ne,
sir rdangin Ratu.