Yesus Ni anftutwar na ene sawe
19:1-12
1 Lama Yesus naftutu monuk tomwatar na Galilea,
I nti propinsi Yudea.
Propinsi Yudea ye namin wer Yordan balisya.
2 Mpe tomwat ngayadin rlarat I ma nafngamone sir a na iane.
3 Ne tomwat Farisyar ketnir rma ma rateman Yesus ma rfalak,
“Maken,
nof kit ninr agame ni yayatrwar e merwanar bise ma rose safe-safe motak ma neluk lole ber sir la ryebas sawnir e?”
4 Ne Yesus nfalak,
“Kmi mbyaca safe ma rarengi na Kitap Lelerap lo nre,
feti noak ma Ratu nose tomwate luryain a ne,
I nose bate ma merwane.*
5 Ma Ratu nfalak feti,
merwane ka nti a ntate enany amany,
ma nafsaw nor sawany nwayat ma radu a rmorip e lese.”*
6 Mpa na Ratu sounlury e tomwatar ma rafsau ne to du lo nempa lese motak.
Iane nwayat ma merwane ma bate ma Ratu nkete sir ma lese ne lo to tomwate fen lese ma bise ma nakese sir.
7 Ne tomwat Farisyar rfalak ber Yesus,
“Farlan farane safema Musa ninrang merwane ma nyebas sawany a ne ka nal surat talak ber sawany a ne?”*
8 Ne Yesus nfalak,
“Kmi ulmir arwaluk mpa Musa ninrang a kmi ma myebas sawmir,
nempa ni botuan e Ratu to ninrang ma farane nof luryain lo.”
9 Yakw kfwalak ber a kmi:
“Merwane ma nafsau lo to bise ma nyebas sawany.
Ma farlan sawany nanronr,
merwane bise ma nyebas i.
Nempa farlan sawany to nanronr ma merwane nyebas i betno nafsau nor bat walyete iane nanronr lo.”*
10 Ne Yesus Ni manglartar rfalak ber I,
“Farlan fasawe ni yayatrwar ma farane ma nose ma nawar kit e ni ngafele e kete tafsau lo.”
11 Nempa Yesus nfalak,
“To tomwatar monuk ma rkaul ral safe ma kmi mfyalak ye,
lan sir ma Ratu nfil sir a ne lo ma keta rkaul ral anftutwar a ne.”
12 Tomwatar ketnir to rafsau,
fali noak ma ramtoranbabe sir e farane lo.
Ma ketnir e to rafsau fali tomwat walyetar rose ma sir farane.
Ma ketnir a nbal e rtetak ma to rafsau fali rmpeang lan ma rkarya ber Ratu.
Tomwate ma nlangun anftutwar a ne,
ni ngafele e i nose nlarat.
Yesus nberkat kangkir
19:13-15
13 Na ler sa e tomwatar ror angkir ber Yesus nema nsaup limnir a na sir ma nberkat sir.
Nempa Ni manglartar rarese tomwatar a ne.
14 Mpa Yesus nfalak,
“Msyalan lonri motak kangkir a ne rma ma rakmat Yakw!
Ma kete myose mtyeri sir,
fali tomwatar ma farlan kangkir ye keta reluk Ratu Ni tomwatar noak ma I neluk Rai ma nfarete saryamprene.”
15 Ne Yesus nsaup limnir a na sir ma nberkat sir,
betno I nti a ntate ain a ne.
Suse ber mangoskayar ma rnau kalin nir anoskai ma rlarat Yesus
19:16-30
16 Ler sa e tomwat sa nma ma nakmat Yesus ma nfalak,
“Tuangguru,
yakw ka kose adat ngamone ma farpe nema konri momorip dedesar?”
17 Ne Yesus nfalak,
“Safema ko mwenrat Yakw na safe ma nangamon?
Lan Lese ma nangamon.
Mpa farlan mpweang ma monri momorip dedesar e ka mose mlwarat Ratu Ni faretar monuk.”
18 Ne tomwate ne nfalak ber Yesus,
“Ratu Ni faret mpe ye?”
Yesus nfalak:
“Kete mufen,
kete munronr,
kete mumnang,
ka kete mweluk mangtungan lepusuk,*
19 ka mwalang anoi-amoi,
ma mkwamis tomwat walyetar farlan ma mkwamis ko a mbwali.”*
20 Ne tabweri ne nfalak,
“Yakw kose klwarat faretar a ne monuk lo,
ma bait safe nbal ma ka kose?”
21 Ne Yesus nfalak,
“Farlan mpweang ma Ratu nsalan ma mungamon a na sounlury,
mtwi mfwenri monuk nim kabanir betno mswaman dotyar a ne ber tomwatar ma rawatan,
ma keta monri kabanir a na surga.
Ko mose farane betno mlwarat Yakw.”
22 Lama tabweri ne ndengar ma Yesus nfalak farane,
nbali i e dalamy suse desar fali naoskai resi.
23 Mpe Yesus nfalak ber Ni manglartar,
“Mdyengar ma kfwalak,
masumput desar ber mangoskayar sa ma neluk Ratu Ni tomwate noak ma I nfarete neluk Rai.
24 Yakw kfwalak ber a kmi,
merawe ber unta lese nsung nof nririmase matan,
nlengan nof mangoskayar sa ma neluk Ratu Ni tomwate na Ni ain farete.”
25 Noak ma Yesus Ni manglartar rdengar farane,
sir rampriang ma rfalak,
“Farlan masumput ber mangoskayar ma reluk Ratu Ni tomwate noak ma I nfarete neluk Rai e keta ise ma Ratu nfair i?”
26 Ne Yesus nfon sir ma nfalak,
“Tomwatar to bonir ral ma rfair a rbali sir,
nempa Ratu boany nal,
fali Ratu bise ma nose safe-safe motak.”
27 Ne Petrus nfalak ber Yesus,
“Tuangguru,
no mswalan!
Kam mnau kalin kam mamy kabanir monuk lo ma mlarat Ko,
mpa keta monri safe?”
28 Ne Yesus nfalak ber Ni manglartar,
“Yakw kfwalak ber a kmi,
ni botuan e noak ma Ratu nafbweberi nbali saryamprene,
keta Yakw,
tomwate Anaky,
kumtoran Ningw kadere ma nangafel resi ma kfwarete.”
Noak a ne kmi ma mlyarat Yakw ye,
keta mimtoran a nbal na kadere buti resin du ma mfyarete Israel nir nuse buti resin du.*
29 Ma ise ma nau kalin ni das,
urany wainy,
enany amany,
angkir,
nre ni lete aun.
Farlan i nau kalin ni safe-safe monuk a ne fali nlarat Yakw,
keta Ratu nal sewe ber i fen lain rati nlengan nof safe-safe ma i nau ne.
Ma keta i nonri momorip dedesar a nbal.
30 Nempa tomwatar yadin ma lere ye reluk tomwat silayar,
keta famudi e reluk tomwatar ma to ubnir sasaf.
Ma tomwatar ma lere ye to ubnir sasaf,
keta famudi e reluk tomwat silayar.*