Yesus nafngamone tomwat mangampalwar sa
8:1-4
1 Noak ma Yesus nrunrur nof lenran,
tomwatar yadin rlarat I.
2 Mpe tomwat mangampalwar sa nma ma nakmat Yesus,
ma nsatngur na sounlury ma nfalak,
“Mangnrure,
yakw kufai feti Ko Nim kuase ma mufngamone yakw,
mpa farlan Ko mpweang e bise ma mufngamone yakw!”
3 Mpene Yesus nsaup limany na tomwate ne betno nfalak,
“Au,
Yakw kmpweang ma mungamon,
mpa mungamon lo.”
Ntabw nof a ne tomwate ne ni mpalwar a rlai ma nangamon desar.
4 Ne Yesus nfalak ber tomwate ne,
“Ka munremi,
kete musaur ngrie ye desar ber se nre se motak.
Nempa ka mtwi mukmat mangsompe ma mfwatutu tenam ber i,
nema nsalan feti mungamon lo.
Betno mlwoik nim snyompe ber Ratu,
farlan ma rarengi na tetetkar ma luryain e Ratu nal ber Musa ne.
Ko mose farane,
iane neluk faniak ber tomwatar feti mungamon lo.”*
Yesus nafngamone suldadu Romar nir ulnir sa ni kawar
8:5-13
5 Noak ma Yesus nait kote Kapernaum,
suldadw Romar nir ulnir sa nma ma nakmat I ma ntak naloloi i ma nfalak,
6 “Maken,
ningw kawar sa namin das.
I nafanas silai nwayat ma namlukut,
mpa nawar desar i.”
7 Ne Yesus nfalak,
“Au la ktwi kufngamone i.”
8 Nempa suldadwar nir ulun a ne nfalak,
“Maken,
yakw to ubangw ma klwangun Ko a na ningw das,
mpa mfwalak motak ngribatnir sa e,
ningw kawar a ne nangamon lo.
9 Fali yakw e tomwatar sa ma nlengan nof yakw ne ma nfarete yakw.
Ma yakw e kfwarete ningw suldadwar a nbal.
Ma farlan kfwalak ber suldadwar sa feti,
‘Mtwi!’
Ne i nti,
ma kfwalak ber sa nbal feti,
‘Mwa!’
Ne i nma.
Nre kfwalak ber ningw kawar,
‘Mose ye!’
Ne i nose desar.”
10 Lama Yesus ndengar tomwate ne ni tnyangkwar,
I nampriang desar.
Ne nfalak ber sir ma rlarat I a ne farye:
“Mdyengar fen ngamone,
nof tomwat Israelar monuk e to lain sa ma ktwungan tomwate ma nalele desar Ratu farlan tomwate ye fuky,
safo tomwate ne to tomwat Israel i.
11 Yakw kfwalak ber a kmi,
botuan feti keta tomwatar yadin ma rma rof timur ma barat.
Sir rma ma ramtoran ma rtame ror nusninrar Abraham,
Ishak,
ma Yakub,
na ain ma Ratu neluk Rai ma nfarete Ni tomwatar.*
12 Luryain e Ratu nfil tomwat Israelar ma reluk Ni tomwatar na Ni Ain farete.
Nempa keta yadin nof sir a ne ma Ratu nyebas sir far ain ma makrokap desar.
Ma keta rtasing dedesar na iano,
ma rkoman suse silai desar.”*
13 Mpe Yesus nfalak ber suldadwar nir ulun a ne,
“Mbwali ko,
mulele Yakw mpa nim kawar a ne nangamon lo.”
Ntabw nof a ne kawar a ne nangamon desar.
Yesus nafngamone tomwatar yadin
8:14-17
14 Ne Yesus nti Simon ni das.
Na iano I nsalan Simon yanany bate ma narwa fali isiny mefanas.
15 Mpe Yesus nti nakmat batmakene ne ma nomat limany.
Ma ntabw nof a ne bate ne isiny to mefanas lo ma nangamon desar.
Ne npote i ma nlangun sir ma rtame.
16 Nait ma lere nfufw e,
tomwatar ror mangafansar yadin ber Yesus.
Tomwatar yadin nof sir a ne ma smwangat yatkar rsung sir.
Ma I nfalak ngribatnir sa motak la natian smwangat yatkar ma rbie rof tomwatar a ne.
Ma nafngamone nbal mangafansar monuk.
17 Yesus nose farane la nafdiat safe ma nabi Yesaya nfalak farye:
“I nalin kit nof ninr maningkyar ma nose ma tangamon.”
Tomwatar ma rmpeang ma rlarat Yesus
8:18-22
18 Na ler sa e,
tomwat ngayadin ramdir a rkolu Yesus.
Ne I nfalak ber Ni manglartar,
“Mya ma ti twemul balisya.”
19 Mpe mangaftutu Musa ni faretar sa nma ma nfalak ber Yesus,
“Tuangguru,
yakw kmpweang ma klwarat Ko far mpenempen motak.”
20 Ne Yesus nfalak ber i,
“Asw alsar e nir klinar ma mangkyar nir ngengyar,
nempa Yakw,
Tomwate Anaky e to ain ma kurwa.”
21 Ne Ni manglartar sa nfalak ber Yesus,
“Maken,
mwinrang ma kbwali yakw far ningw das a fuky.
Nema noak ma amangw a nmat ma kufonak i a fuky,
betno kbwali yakw ma klwarat Ko.”
22 Nempa Yesus nfalak ber i,
“Mlwarat Yakw!
Ma mswalan lonri tomwatar ma rmat a ne ma rafonak nir mangmwate.”
Yesus nafline mnaur uman
8:23-27
23 Mpene Yesus nti nfangat kumal.
Ma Ni manglartar rlarat I a nbal ma rfangat kumal,
ma ral far twemul balisya.
24 Ne metryat e,
mnaur uman nma twemul a ne.
Ma nerar rtef kumal a ne nwayat ma weye nti dalam mpa ketla ratloram.
Ma noak a ne Yesus narwa.
25 Ne Yesus Ni manglartar rpangun I ma rfalak,
“Tuangguru,
mpwote Ko ma mtwulung kit a fuky koli ma tatloram ye lo!”
26 Ne I nfalak ber sir,
“Safema mimtaut,
ali to milele Yakw e?”
Ne Yesus npote I ma ntampu mnaur ma nerar ma rafefar a ne.
Mpe mnaur ma nerar a ne rtolar sir ma twemul a ne namlin desar.
27 Mpe Yesus Ni manglartar a ne rampriang desar ma rafalak ber sir,
“Tomwate ye ise I,
mampe mnaur ma nerar ye rlarat Ni farete.”
Yesus nafngamone tomwatar du ma smwangat yatkar rsung sir
8:28-34
28 Noak a ne Yesus ka rait twemul balisya na nus Gadaraa.
Na iano tomwatar du a rma rof mangmwat anir ma rakmat Yesus.
Sir a ne ma smwangat yatkar rsung sir mpa rares rut ma tomwatar to romat ral sir,
nwayat ma tomwatar to bise ma rmpan rof a ne.
29 Tomwatar du a ne rafwayak,
“Hei,
Ratu Anaky!
Ko mwa ye ma mose farpe kam?
Kete mswiksa kam koli to ni tewat a fuky.”
30 To dodo nof ain a ne,
babyar yadin ranriak nir a tnyame.
31 Mpe smwangat yatkar a ne rtak desar Yesus ma rfalak,
“Farlan mutian kam,
mwinrang ma msung babyar a ne.”
32 Ne Yesus nfalak ber sir,
“Mtyi!
Mpe smwangat yatkar a ne rbie rof tomwatar du a ne,
ma rsung babyar a ne.
Ne babyar a ne rafla ma rputuk rof tetebin far twemul dalam,
ne rlonrur ma rmat.”