Yudas 1

Yudas ni surat

Salam

1:1-2

1 Ye surat nof yakw Yudas ma kweluk Yesus ninr Ray Silai Ni mangkaryae. Ma yakw waingw ber Yakobus a nbal. Yakw kurengi surat ye ber kmi monuk. Kmi ye ma Amninrar Ratu nfil a kmi ma myeluk Ni tomwatar. I nkamis kmi ma najake kmi ma mimkoran ma milele Yesus ninr Ray Silai, terik ma nma nbali saryamprene. 2 Yakw ktwak ma weni Ratu ntafal ma nfatutu Ni dalam ngamone ma Ni ankamis, ma nal maline ma nlie nlengan ber a kmi.

Ka mijake kmi myof tomwatar ma raftutu anftutw lepuskwar

1:3-16

3 Wangur ma kwamis a kmi, yakw kmpweang desar ma kurengi surat ber a kmi feti felan farpe ma Ratu nfair kit. Nempa yakw kdwaun feti ka kurengi surat ye baluan ber a kmi la kswurat a kmi, nema dedesar ma milele Ratu Ni anftutw botunar. Ma kete myinrang ma tomwatar raftutu anftutw walyetar ber a kmi. Fali Ratu nal Ni anftutw botunar a ne ber kit ma teluk Ni tomwatar, ma lan Ni anftutwar a ne ma keta ramin terik ma dedesar. 4 Yakw kfwalak farye, fali tomwatar ma rfule tomwatar ror nir anftutw lepuskwar a ne lere ye ror a kmi lo. Nempa sir rose felnir far tomwat ngamonar la raftutu nir anftutwar a ne. Sir ye ma rbangal Ratu. Sir ribut tomwatar nema rose kabain yatkar, fali sir rfalak feti kit bise ma tose safe-safe motak tlarat ninr makeus yatkar. Ma rfalak feti farlan dedesar ma tose kabain yatkar e to sasaf, fali keta Ratu dedesar ma nfatutu Ni dalamy ngamone ber kit ma nlure ninr salar. Safo iane to botuan. Sir to ralele Yesus ninr Ray Silai nbal. Safo Yesus ne ninr Mangkuase ma Mangnrure. Ma rarengi na Kitap Lelerap dalam nof luryain lo feti Ratu keta nukun tomwatar ma farane.

5 Wangur, kmi mifai ngriar monuk ye lo. Boloka farane yakw kfwalak a nbal nema minremi feti luryain e, Ratu ninr Mangnrure ne ntulung tomwat Israelar ma rbie rof Mesir. Nempa lama rbie rof Mesir e, I nukun a nfen ketnir nof sir a ne ma to ralele I. 6 Ma minremi nbal malaektar ketnir ma luryain e Ratu nal kuase ber sir a ne. Nempa rmpeang ma rkuase rlengan rof safe ma Ratu nal ber sir, mpa rafla rtate nir karyayar na surga. Iane nwayat ma Ratu nkete sir nor rewe ma nau sir na ain ma makrokap desar. Ma keta rewe ne nkete sir, ma ramin dedesar ain a ne terik lere ma Ratu nukun sir. 7 Kmi minremi nbal safe ma Ratu nose na kote Sodom ma Gomora, ma kotar ma ramin seriny baldu a ne. Tomwatar ma ramin iane nir adat feleles farlan malaektar. Sir ranronr, rayebas sir ma merwane nafsau e merwane ma bate nafsau e bate. Iane nwayat ma Ratu ntolar au ma nfolur dedesar la nukun sir. Ratu nose farane la nfatutu ber tomwatar monuk feti keta I nukun tomwatar ma rose kabain yatkar na au ma to terik.

8 Iane farlan tomwatar ma raftutu anftutw lepuskwar ma lere ye ror a kmi a ne. Sir rfalak feti Ratu nfatutu trufar ber sir. Sir ral trufar a ne neluk lole ber sir nema raosangri rlarat nir makeus la rafngeryai tenir. Ma sir to rmpeang ma Ratu nfarete sir, ma rarikan malaekat lelerpar ma ramin surga. 9 Mikhael ye ulun ber malaektar. Noak ma Musa nmat, Mikael radu smwangat yatkar nir ulun rabangal feti keta ise nonri Musa tenany. Boloka Mikael ye ulun ber malaektar nempa to nbaran ma nfasale smwangat yatkar nir ulun ma narikan i. Ma nfalak lan feti la Ratu nukun ko. 10 Nempa tomwatar ma raftutu anftutw lepuskwar a ne rarikan safe ma koko sir to rkaul ral. Ma sir rafai lan ma rose kabanir rlarat nir makeus farlan binatngar ma to nir andaun ma nwayat ma keta rayatak. 11 Botuan feti tomwatar ma raftutu anftutw lepuskwar a ne keta rkoman suse maberat desar fali rlarat Kain ni adat yatak. Sir farlan Bileam ma nmate doit mpa manrilak ma nose ma tomwatar rfufw far sale dalam. Ma sir rbangal Ratu farlan Korah ma luryain e nbangal tomwatar ma rfarete sir. Iane nwayat ma keta sir rkoman suse maberat. 12 Tomwatar a ne rafmweat motak a kmi na mir tnyam faburat. Fali rtame e, rampayatak ma rdaun lan tenir. Sir rose kabanir ma to ubnir sasaf, farlan mnaur naflae kalin mutnar mpa keta to udan. Ma sir farlan katutnwar ma nait ma rabu e sir to rabu, mpa keta rmat ma rtarpal ror wakrir. 13 Sir farlan ner silayar ma rafefar ma rafuse na dol. Nerar a ne keta raflae kamaknisar a rma da, iane feleles farlan ma rfatutu nir adat yatkar la rafmweat a rbali sir. Ma sir a nbal nir andaun to ntai farlan ftunar ma to ramin anir. Ma Ratu nau ain makrokap desar ber sir lo ma nukun sir terik ma dedesar.

14 Henok ye Adam ni dasdalam lapsyar itw. Luryain e, i nafbotin snyurat nof Ratu na tomwatar a ne ma nfalak, “Ni botuan e ninr Mangnrure keta nma nor Ni malaekat lelerpar ma yadin desar, 15 ma keta I nsidang tomwatar monuk na saryamprene ye betno nukun tomwat yatkar fali rbangal Ratu ror nir adat yatkar. Ma keta nukun tomwat salar fali nir ngribatin yatkar ma sir rfalak la rarikan I a ne.” 16 Tomwatar a ne dalmir to rsenang mpa nroke nraki sir la rfasale tomwat walyetar. Ma rmorip e, rose rlarat nir makeus yatkar, ratanuk la rafdas sir. Ma ratanuk la rfas tomwatar nema ronri safe-safe ma rmpeang.

Yudas nsurat soranyar ma ka rmorip e ralele Yesus

1:17-23

17 Wangur ma kwamis a kmi, Yesus ye ninr Mangnrure ma neluk ninr Ray Silai. Ma ka minremi safe ma luryain e Ni mangsidkwar rfalak. 18 Sir rfalak farye, “Noak ma saryamprene ketla namsos, keta tomwatar rma ma rkosy a rmalip a kmi fali milele Ratu. Sir a ne ma rmorip a rlarat lan nir makeus yatkar.” 19 Sir rose nbal ma kmi ma milele Ratu ne mikedan a kmi mpa mikes misam a kmi. Ma rose kabanir rlarat nir makeus yatkar, ma Ratu Smwangtany to namin sir. 20 Nempa wangur ma kwamis a kmi, anftutw botunar nof Ratu ma mdyengar a ne farlan fanderen ber a kmi, mpa ka myal anftutwar a ne nema mtyafal ma mimkoran ma milele Ratu. Ma ka mtyak Ratu Smwangtany ma nfatutu kmi ma msyampayang. 21 Ma na mir momorip e, ka milele feti Ratu nkamis desar a kmi. Ka myorip farane terik ma Yesus nma ma nfatutu Ni dalamy ngamone, ma nal momorip dedesar ber a kmi. Yesus ne ninr Mangnrure ma neluk ninr Ray Silai. 22 Ma ka mlyompang tomwatar ma ralele Ratu ror dalmir tubun. 23 Ma ka msyurat tomwatar ma rmpan sale ne nema rbali sir na dalamten malonri. Iane farlan mikrabut sir myof au dalam. Ma ka mfyatutu mir lolompang ber tomwat yatak walyetar a nbal, nempa ka mijake kmi nema kete myose sale mbyalak sir. Ka mfyatutu mir lolompang ber sir, nempa ka mkyedan nir adat ma rlarat lan nir makeus yatkar a ne. Iane farlan sir rfonak nir rabit rayar.

Yudas nafter ni surat ma ndangin Ratu

1:24-25

24 Mya ma tdangin Ratu ma Ni kuase ma najake kmi, nema kete mfyufw far sale dalam. I nose farane terik ma mimdir sounlury myor Ni snyain ma idak resi. Na lere ne keta dalmir a rsenang resi fali minglerap ma to mir sal. 25 Ni botuan e, Ratu ye lan lese. I ye ma nfair kit nof ninr salar nalyole Yesus. Yesus ye ninr Mangnrure ma neluk ninr Ray Silai. Mpa mya ma tdangin Ratu kit ninr Mangnrure fali silai I, ma Ni kuase ma Ni fakoran a ne nlie nlengan. Ma I nfarete safe-safe nof luryain, lere ye, terik ma dedesar. Amen.