Ratu nal meterayar ber tomwatar ribun rati buty fat resin fat ma nfatutu feti sir reluk Ni tomwatar
7:1-8
1 Mpene kswalan malaektar fat ramdir mpane saryamprene susnir fat ma rteri mnaur ma nof susnir fat a ne.
Sir rteri mnaur a ne nema to mnaur a na dol,
na da,
nre katutnwar.
2 Ratu nal kuase ber malaektar fat a ne ma rafyatak saryamprene ma tasik.
Ne kswalan malaekat sa nbal ma nbotin nof timur.
I nonry meterai nof Ratu ma nmorip a ne.
Ne malaekat ne nfalak nor liriny silai ber malaektar fat a ne.
3 I nfalak,
“Kete mifyatak saryamprene,
tasik,
ma katutnwar a ne fuky,
fali ka kam mal meterayar ma mfaniak kit ninr Ratu Ni mangkaryayar dednir.”
4 Ne kdwengar ma tomwatar sa nfalak a nbal feti sir ma rfaniak dednir ror meterai ne,
sir monuk tomwate ribun rati buty fat resin fat.
Sir ye ma rof dasdalam Israel buty resin du a ne.
5-8 Mpe ral tomwate ribun buty resin du rof dasdalmir mpane.
Sir a ne rof dasdalam:
Yehuda,
Ruben,
Gad,
Asyer,
Naftali,
Manasye,
Simeon,
Lewi,
Isakhar,
Zebulon,
Yusuf ma Benyamin.
Tomwatar ma ramdir Ratu sounlury a ne to rfayaki ral sir
7:9-17
9 Mpene yakw kswalan a nbal tomwatar yadin desar ma to kfwayaki kal sir.
Sir rma rof mpenempen na saryamprene far ma rof nusar,
das matnir,
ma liliryar mpane.
Sir ramdir rai ni kadere ma Domba Anak sonirlury.
Ma sir rfonak rabit melawas mafutyar ma romat kanur donyar.
10 Ne sir rfalak ror lirnir silai,
“Mya ma tdangin Ratu ma namtoran rai ni kadere,
ma tdangin Domba Anak!
Fali lan Sir ma rfair kit tof ninr salar.”
11 Malaektar monuk ma mangfaretar numur kabanir fat ma rmorip farlan binatngar a ne ramin iane nbal.
Sir ramdir a rkolu rai ni kadere ne.
Noak ma rdengar ma tomwat ngayadin a ne rdangin Ratu e sir rsangitil a na rai ni kadere ne sounlury ma rsatngur ber Ratu.
12 Ma rfalak,
“Amen!
Mya tdangin Ratu ma tose alang ber I.
Mya ma talang I.
Lan I ma Ni andaun ngamone,
Ni fakoran,
ma Ni kuase terik ma dedesar!
Amen.”
13 Tomwat sa nof mangfaretar nenrat yakw,
“Sir ma rfonak rabit melawas mafutyar a ne mpear sir ma sir rof mpe?”
14 Ne kfwalak,
“Maken,
yakw to kufai.
Ma ko mufai sir a mpa mfwalak ber yakw.”
Ne nfalak,
“Sir ye ma rkoman suse silai desar nempa bonir ral ma rabare nir suse ne.
Ma Domba Anak darany ma rtarbui ne la rtefe nir rabit melaswar terik ma rangfuty.
15 Iane nwayat ma sir ramdir Ratu Ni kadere sounlury ma lere nronram e rlangun I a na Ni Das.
Ma Ratu ma namtoran rai ni kadere ne keta najake sir ma nor sir dedesar.
16 Ma keta to rkoman ngese lafar lo.
Ma keta to rkoman lere ni mefanas a nbal.
17 Fali Domba Anak ma namtoran a na rai ni kadere balisya ne ma keta nrure sir far weye matan momorip.
Ma Ratu keta nkur lunir monuk.”