Domba Anak nalin kalin meterai ketujuh
8:1-5
1 Noak ma Domba Anaky nalin kalin meterai ketujuh nof kitap ma rlulun a ne,
metryat e nuse ntatutuk a na surga fafa stenga jam.
2 Ne kswalan malaektar itw ma ramdir Ratu sounlury ma leles mpane ronri terompet.
3 Mpe malaekat sa nbal nma ma namdir nlosir snyompe ain.
Malaekat a ne nonry dupa ain ma rose rof mase.
Ne kswalan ma ral natan ma angat nangafel a ne yadin ma ber i.
Ne i nal natan numur sampangar nof Ratu Ni tomwatar,
ma nau na dupa mase ne.
I nal dupa ain a ne ma nloik ber Ratu neluk snyompe na rai ni kadere sounlury.
4 Ne masu nof natan numur sampangar nof Ratu Ni tomwatar,
rbie ma ral far das terik ma ti nait Ratu.
5 Mpe malaekat a ne nal au bwaran nof snyompe ain ma nau na dupa ain a ne.
I nose farane betno nyebas dupa ain a ne far saryamprene.
Ne metryat e fitik ma tarpake delak namimiri,
ma ruku silai desar.
Malaektar roup terompet fat
8:6-13
6 Mpe malaektar itw ma romat terompetar a ne rose ma roup nir terompetar.
7 Mpene malaekat pertama noup ni terompet.
Ne udan es farlan bati,
rlomp au ma dare rfufw a rtompur far saryamprene.
Ne rapu saryamprene ma katutnwar sepertiga,
ma urwar e rapu rafere monuk.
8 Mpene malaekat kedua noup ni terompet.
Ne kswalan kabanir sa farlan bubuar silai ma nfolur ma nayebas far tasik.
Ne sepertiga nof tasik a ne neluk dare,
9 mpa sepertiga nof binatngar monuk ma ramin tasik a ne rmat,
ma sepertiga nof kaplar e ratloram a nbal.
10 Mpene malaekat ketiga noup ni terompet.
Ne kswalan ftun silayar sa ma nfolur far obor nfufw nof langit.
Ftune ne nfufw ma ntait sepertiga nof keswar ma wey matnir monuk ma ramin saryamprene.
11 Ftune ne ngarany maklangw.
Ma nose ma sepertiga nof weyar monuk na saryamprene ye ma maklangw.
Iane nwayat ma tomwatar yadin a rmat fali renum weyar a ne.
12 Mpene malaekat keempat noup ni terompet.
Mpe metryat e kabar sa nti nafyatak sepertiga nof lere,
bulan ma ftunar.
Iane nwayat ma sepertiga nof kabanir a ne to idkir lo.
Mpa noak ma ler fardu langit e sepertiga nof lere ne makrokap.
Ma noak ma nronram e sepertiga nof bulan ma ftunar a ne makrokap a nbal.
13 Ne kswalan manik langam sa ma nturim a na langit.
Ma kdwengar ma manik ne nfalak nor liriny silai,
“Myat lo,
keta suse maberat diat tomwatar a kmi a na saryamprene.
Fali keta malaekat walyetar tel a nbal ma roup nir terompet.”