Malaekat kelima noup ni terompet
9:1-12
1 Mpene malaekat kelima noup ni terompet.
Ne kswalan ftunar sa nfufw nof langit far saryamprene.
Ftune ne nomat kukusy tetebin mamate.
2 Mpe nbanril fofolat tetebin mamate ne.
Ma masun nbie nof dalam farlan masun ma nbie nof likut silai.
Masun ne nteri lere ma langit nwayat ma makrokap.
3 Ma tokdisar rbie rof masun ne ma rtompur far saryamprene.
Ratu nose ma tokdisar a ne nir racun feleles farlan seplakruar.
4 Ma nsurat sir ma kete rafyatak urwar,
nre katutnwar na saryamprene.
Nempa rti ma rose suse lan tomwatar ma Ratu Ni meterayar to rlatan dednir.
5 Ma Ratu to ninrang sir ma rfen tomwatar nempa ninrang lan ma rose suse sir doan bulnar lim.
Ma sir rkoman suse fali tokdisar a ne rkarat sir farlan seplakruar ma rkarat tomwatar.
6 Na noak a ne tomwatar rareke ma rmat na bulnar lim a ne,
nempa to bise.
Sir rmpeang ma rmat motak nempa sir to bise ma rmat fali Ratu to ninrang ma sir rmat.
7 Tokdisar a ne felnir farlan kudar ma tomwatar rfangat ma rose ma rti raprang.
Ma na ulnir e kabar sa farlan makot mase,
ma sonir e farlan tomwate.
8 Ulnir e melaswar rbalak batar ulnir,
ma nifnir e rbalak singa nifnir.
9 Ma rteri mpumprir ror rabit besi.
Ma slyapnir e delkir farlan kudar ma rakei keretar ma rafla far prang dalam.
10 Ma ikwrir e racun namin farlan seplakrue ni racun.
Mpa rpaki ikwrir a ne ma rose suse tomwatar doan bulnar lim.
11 Rai sa nfarete sir.
I a ne malaekat ma nkuase tetebin mamate.
Na Ibrani liriny rfalak feti Abadon.
Ma na Yunani liriny e rfalak feti Apolion (isiny feti mangafyatak).
12 Suse maberat pertama e omp lo.
Ma bait susar du a nbal ma rma ne.
Malaekat keenam noup ni terompet
9:13-21
13 Mpene malaekat keenam noup ni terompet.
Ne kdwengar liliri nof snyompe ain susnir fat.
Snyompe ain a ne rose rof mase,
ma namin Ratu sounlury.
14 Ma liliri ne nfalak ber malaekat keenam ma nomat ni terompet a ne,
“Mtwate malaektar fat ma rkete sir nlosir kewas silai Efrat a ne!”
15 Mpa nti ma ntate sir.
Ma nof luryain e Ratu ntetak jam,
lere,
bulan,
ma ngarak ber sir lo,
nema nait ni tewat e sir rfen tomwatar sepertiga na saryamprene.
16 Ma kdwengar tomwatar sa ma nfalak feti malaektar fat a ne rnrure suldadwar ma rfangat kudar juta raty du.
17 Ma noak a ne yakw kswalan kudar ma tomwatar ma rfangat kudar a ne.
Iane farlan ma kutrufe.
Tomwatar a ne rfonak teteri ma rose rof besi la rteri mpumprir.
Teteri besi ne ketnir e memey ngaidak,
ketnir e rabiru farlan baty permata,
ma ketnir a nbal e rakuning farlan belerang.
Kudar a ne ulnir farlan singa ulnir.
Ma au,
masun,
ma belerang rbie rof suknir.
18 Au,
masun,
ma belerang ma rbie rof suknir a ne rwayat ma tomwatar sepertiga na saryamprene ye rmat.
Mpa kabanir tel a ne ma rwayat tomwatar na saryamprene ye rkoman suse ma rmat.
19 Kudar a ne nir fakoran ma rfen tomwatar e namin suknir ma ikwrir a nbal.
Fali ikwrir farlan kasi uluny ma bise nkarat a nfen tomwatar.
20 Nempa to tomwatar monuk rmat fali susar ma sir rkoman a ne.
Boloka rkoman susar a ne nempa to rmpeang ma rtate nir adat yatkar ma sir rose ne.
Ma dedesar ma rsampayang ber smwangat yatkar ma waltwar ma rose rof mase,
perak,
tembaga,
bati,
ma katutun.
Safo kabanir ma rsampayang ber sir a ne iane kabanir ma to bise rakeban,
to bise ma radengar,
ma to bise ma rmpan.
21 Ma sir a nbal e to rtate nir adat ma rafen,
rsafak,
ranronr,
ma ramnang.