Yohanes nsalan malaekat ma kitap anak ma nalulun
10:1-11
1 Ne yakw kswalan malaekat makoran sa ma ntompur nof surga.
Malaekat a ne mutan nbobe i ma wasbibine nbebar uluny.
Ma souny idak farlan lere ma emnir e nfolur farlan au.
2 I nomat kitap anak sa ma nalulun.
Ma kitap anak a ne ntakbanril lo.
Ma emany fian e ntai tasik ma emany bayal e ntai da.
3 Ne i nose liriny silai far singa ma npor.
Lama nose liriny silai metryat e tarpake delak lain itw farlan ma nbalas i.
4 Lama tarpake ne delak lain itw monuk,
kose ma kurengi safe ma kdwengar kof tarpake ne.
Nempa kdwengar liliri sa nof surga ma nfalak,
“Ka kete murengi safe ma tarpake ne nfalak ma kete musaur a nbal.”
5 Mpe kswalan malaekat ma emany sa ntai tasik ma emany sa ma ntai da ne,
nlobik limany fian far langit.
6 Ma nsompe nor Ratu ma nmorip dedesar a ne ngarany.
Ratu ye ma nose langit ma saryamprene numur ni mparetar ma nose tasik ma safe-safe ramin dalam a ne.
Ne malaekat a ne nsompe ma nfalak,
“Lere ye Ratu to ndaf safe ma I ntetak lo.
7 Fali noak ma malaekat ketujuh ne noup ni terompet,
Ratu nafdiat desar safe ma I ntetak nof luryain a ne.
Ma tomwatar to rafai safe ma ntetak a ne nempa I nafbotin ber Ni mangkaryayar.
Sir a ne Ni nabyar.”
8 Ne liliri ma kdwengar kof surga ne nfalak ber yakw nbal,
“Mtwi mukmat malaekat ma emany sa ntai tasik ma emany sa e ntai da ne ma mwal kitap anak ma nalulun ma ntakbanril a ne.”
9 Mpe ktwi kukmat malaekat a ne ma ktwak ma nal kitap ma nalulun a ne ber yakw.
Ne malaekat a ne nfalak,
“Jo mwal kitap ye ma mune.
Noak ma mune e keta mrwase ngananam na babam farlan wenan nempa nait kampum e maklangw.”
10 Ne kal kitap ma nalulun a ne kof malaekat ma kune.
Noak ma kune kitap a ne,
krwase ngananam na babangw far wenan nempa noak ma ktwelan e kampungw maklangw.
11 Mpe nfalak a nbal ber yakw,
“Ka mtwi mufwibar safe-safe monuk ma Ratu ntetak ma keta nbotin a ne.
Ma ka mufwibar ngriar a ne ber tomwatar monuk ma rof nusar mpane numur nir rayar,
liliryar mpane,
ma das matnir mpane.”