Ratu nsiduk Ni nabyar du ma rafbotin safe ma I nfalak
11:1-14
1 Ne ral katutun tukar felany farlan tetekan sasare ber yakw,
ma Ratu nfalak ber yakw,
“Mtwi ma mswar Ningw Das Silai ma snyompe ain.
Ma mfwayaki tomwatar ma rsampayang na iane feti rafir.
2 Nempa kete mswar Ningw Das Silai ne ni latyompur,
fali kobal a ne kal ber tomwatar ma to ralele Yakw.
Ma keta sir rma kote ma kumin a ne ma rfarete ma rtean tomwatar na kote ne doan ngarkar teli lian.
3 Keta Yakw kswiduk nabyar du ma rafbotin safe ma Yakw kfwalak.
Nabyar du a ne keta rfonak rabit memetmar ma rfatutu feti rampalim.
Ma keta rafbotin snyurat nof Yakw doan lere ribun raty du a buty nem.”
4 Nabyar du a ne sir farlan katutun zaitunar du ma diryar du ma faduk namin.
Sir farlan katutnwar ma diryar ma ramin Ratu sounlury.
Ratu ne ninr Mangnrur Silai ma nkuase saryamprene.
5 Ma nabyar du a ne bise ma rose au ma nbie nof babnir la rapu tomwatar ma rmpeang ma rose yatak sir a ne.
Mpa ise motak ma nmpeang ma nose yatak nabyar du a ne keta nmat farane.
6 Nabyar du a ne nir kuase ma repat langit nema udan kete tompur noak ma rafbotin snyurat nof Ratu.
Sir kuase weye matnir monuk na saryamprene mpa bise ma rose weye fen dare.
Ma nir kuase nbal ma rafyatak saryamprene bengfir motak,
ror susar felnir mpane,
rlarat nir mpempeang.
7 Lama rafbotin monuk snyurat nof Ratu e binatang mangarese desar nbie nof tetebin mamate.
Binatang a ne keta nserang a ntuni sir ma nfen sir.
8 Lama rmat e tenir ramin kote silai ne ni srate dalam.
(Na kote ne ain ma luryain e rsangwalu ninr Mangnrur Silai na.
Tomwatar rafngare kote ne feti kote Sodom ma Mesir.
Fali tomwatar ma ramin kote ne nir adat nayatak desar.)
9 Tomwatar rma rof mpenempen ma rof nusar monuk,
liliryar mpane,
ma das matnir mpane,
rma ma rsalan nabyar du ma rmat a ne.
Sir rsalan tenir a ne terik lerar teli lian,
fali to rmpeang ma tomwatar rafonak sir.
10 Tomwatar monuk na saryamprene ma to ralele Ratu ne keta rsenang resi fali nabyar du a ne rmat lo.
Ma raosfesta ma ralikur kadoar fali nabyar du a ne to rose ma rkoman suse lo.
11 Lama lerar teli lian e Ratu nal a nbali sanawe ber nabyar du a ne,
mpa rmorip,
ma rpote sir ma ramdir.
Tomwatar ma rsalan a ne ramtaut desar.
12 Mpe radu a ne rdengar liliry silai nof surga ma nfalak ber sir farye,
“Mya ye!”
Ne tomwatar monuk ma rose yatak sir a ne rsalan ma mutan rbobe sir ma rfangat far surga.
13 Mpe lere ne nbal ruku silai desar.
Iane nwayat ma sepersepuluh nof kote ne nayatak,
ma tomwate ribun itw a rmat.
Ma tomwat walyetar ma to rmat a ne ramtaut desar,
mpa rdangin Ratu na surga.
14 Suse kedua ye omp lo.
Ma suse ketiga ma nma ye nbal.
Malaekat ketujuh noup ni terompet
11:15-19
15 Mpene malaekat ketujuh noup ni terompet.
Ne kdwengar liliryar ketnir nof surga ma ratanuk ror linir silai ma rfalak,
“Kit ninr Mangnrure Ni kuase ma nfarete monuk saryamprene.
I a ne Ray Silai a nbal ma Ratu nfil I ma keta neluk ray ma nfarete dedesar.”
16 Ne mangfarete buty du resin fat ma ramtoran nir kadere na Ratu sounlury a ne,
rsangitil ma rsatngur ber Ratu.
17 Ma rfalak,
“O Ratu ninr Mangnrur Silai ma Ni kuase nlie nlengan,
Ko ye ma mumin nof luryain lo ma mumin terik lere ye.
Kam mose terima kasih ma ber Ko
fali Ko mtabw ma mfwarete mweluk rai mor Nim kuase ma silai ne.
18 Tomwatar monuk ma to ralele Ratu ne rares lo.
Nempa iane ni tewat lo ma Ko mfwatutu feti Ko murese sir.
Ma iane ni tewat a nbal ma mtwetak tomwatar ma rmat a ne nir ngriar.
Ma ni tewat lo ma mal sewe ber Nim mangkaryayar,
ma nabyar,
ma ber Nim tomwatar ma rsampayang ber Ko a ne.
Ma ber tomwatar ma ralang Ko,
boloka tomwat biasar nre tomwat silayar sir.
Ma lere ye ni tewat lo ma Ko mukun tomwatar ma rafyatak tomwatar na saryamprene.”
19 Ne Ratu Ni Das Silai na surga ntakbanril.
Ma kswalan babatak sa ma namin Ratu Ni Das a ne.
Na babatak a ne rnau Ratu Ni faretar ma nal ber Musa.
Mpe fitik idak na mpenempen ma tarpake delak nauran,
ruku silai,
ma udan es ma silai desar.